ନୂଆଦିଲ୍ଲୀ: କରୋନା ସଂକ୍ରମଣକୁ ପ୍ରତିହତ କରିବା ଲାଗି ଦେଶରେ ଟିକାକରଣ ଜାରି ରହିଛି । ହେଲେ ଏପରିସ୍ଥଳେ ଟିକା ସଙ୍କଟ ମଧ୍ୟ ଦେଖାଦେଇଛି । ଯାହାକୁ ଦୃଷ୍ଟିରେ ରଖି ବିଭିନ୍ନ ପ୍ରକାର ପଦକ୍ଷେପ ମଧ୍ୟ ଗ୍ରହଣ କରାଯାଇଥିବା ବେଳେ ଅନେକ ଟିକାକୁ ଅନୁମତି ମଧ୍ୟ ମିଳୁଛି ।
ଏଭଳି ସ୍ଥଳେ ଖୁବଶୀଘ୍ର ଭାରତକୁ ବିଦେଶୀ ଟିକା ଫାଇଜର ଆସିବ ବୋଲି ସୂଚନା ମିଳିଛି। ତେବେ ଅନ୍ୟ ଦେଶରେ ବ୍ୟବହାର ଲାଗି ଅନୁମତି ମିଳିଥିବା ଟିକାଗୁଡ଼ିକର ବ୍ରିଜିଂ ଟ୍ରାଏଲ କରାଯିବ ନାହିଁ ବୋଲି ସ୍ୱାସ୍ଥ୍ୟ ମନ୍ତ୍ରଣାଳୟ କହିବା ପରେ ବିଦେଶୀ ଟିକା ଖୁବ୍ ଶୀଘ୍ର ଉପଲବ୍ଧ ହେବା ଆଶା ବଢ଼ିଛି ।
ଆହୁରି ମଧ୍ୟ ଜୁଲାଇ ସୁଦ୍ଧା ଭାରତକୁ ଟିକା ଯୋଗାଇଦେବା ପାଇଁ ଫାଇଜର ପକ୍ଷରୁ ସଙ୍କେତ ଦିଆଯାଇଛି ବୋଲି ନୀତି ଆୟୋଗ ସଦସ୍ୟ ଡା. ବିକେ ପଲ୍ ସୂଚନା ଦେଇଛନ୍ତି। ଏନେଇ ସରକାର ଆଲୋଚନା କରୁଛନ୍ତି । ଅପରପକ୍ଷେ ଜୁଲାଇ ସୁଦ୍ଧା ଟିକା ବ୍ୟବହାର ଲାଗି ଅନୁମତି ମିଳିପାରେ ବୋଲି ସୂଚନା ମିଳିଛି।
ଉଲ୍ଲେଖଯୋଗ୍ୟ, ଦେଶରେ ଗତ ୨୪ ଘଣ୍ଟାରେ ଲକ୍ଷେ ୩୪ହଜାର ୧୫୪ ସଂକ୍ରମିତ ଚିହ୍ନଟ ହୋଇଥିବା ବେଳେ ୨୪ ଘଣ୍ଟାରେ ସୁସ୍ଥ ହୋଇଛନ୍ତି ୨ ଲକ୍ଷ ୧୧ହଜାର ୪୯୯ । ଏବଂ ୨ ହଜାର ୮୮୭ ସଂକ୍ରମିତଙ୍କ ପ୍ରାଣ ନେଇଛି କରୋନା । ତେବେ ମୋଟ୍ କରୋନା ସଂକ୍ରମିତଙ୍କ ସଂଖ୍ୟା ୨ କୋଟି ୮୪ ଲକ୍ଷ ୪୧ ହଜାର ୯୮୬ । ମୋଟ୍ ସୁସ୍ଥ ହୋଇଛନ୍ତି ୨କୋଟି ୬୩ଲକ୍ଷ ୯୦ ହଜାର ୫୮୪ । ମୋଟ୍ କରୋନା ମୃତ୍ୟୁସଂଖ୍ୟା ୩ଲକ୍ଷ ୩୭ହଜାର ୯୮୯ । ଆକ୍ଟିଭ କେସ୍ ୧୭ଲକ୍ଷ ୧୩ହଜାର ୪୧୩।
