ଭାରତ ମହାସାଗରରେ ଚୀନକୁ କାଉଣ୍ଟର କରିବାକୁ ଭାରତ ଓ ଶ୍ରୀଲଙ୍କା ମଧ୍ୟରେ ଚୁକ୍ତି

ନନ୍ଦିଘୋଷ ବ୍ୟୁରୋ: ଭାରତ ମହାସାଗର ଅଞ୍ଚଳରେ ଚୀନର ପ୍ରଭାବକୁ କରାଯିବ କାଉଣ୍ଟର । ଭାରତ ଓ ଶ୍ରୀଲଙ୍କା ମଧ୍ୟରେ ପ୍ରତିରକ୍ଷା ଚୁକ୍ତି ସ୍ବାକ୍ଷରିତ । ଏହାସହ ଶକ୍ତି, ଡିଜିଟାଲ ଭିତ୍ତିଭୂମି, ସ୍ବାସ୍ଥ୍ୟ, ବାଣିଜ୍ୟ କ୍ଷେତ୍ରରେ ବି ଚୁକ୍ତି ସମ୍ପାଦିତ ହୋଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଶ୍ରୀଲଙ୍କା ଗସ୍ତ ଅବସରରେ ଏହି ଚୁକ୍ତି ସ୍ବାକ୍ଷରିତ ହୋଇଛି ।

ଶ୍ରୀଲଙ୍କା ପକ୍ଷରୁ ଚୁକ୍ତିରେ ସ୍ବାକ୍ଷର କରିଛନ୍ତି ରାଷ୍ଟ୍ରପତି ଅନୁରା କୁମାରା ଦିଶାନାଏକେ । ୨୦୨୨ରେ ଶ୍ରୀଲଙ୍କା ଆର୍ଥିକ ଦୁଃସ୍ଥିତିରେ ଗତି କରୁଥିବାବେଳେ ଭାରତ ସହାୟତାର ହାତ ବଢ଼ାଇଥିଲା । ଶ୍ରୀଲଙ୍କାକୁ ଭାରତ ଦେଇଥିଲା ୪ ନିୟୁତ ଡଲାର । ଏହାସହ ଶ୍ରୀଲଙ୍କାର ବିକାଶ ଓ ପୁନର୍ଗଠନ ଲାଗି ସହାୟତା ଜାରି ରହିବ ବୋଲି ଭାରତ ଘୋଷଣା କରିଥିଲା । ଦୁଇ ଦେଶ ମଧ୍ୟରେ ପାରସ୍ପରିକ ସହଯୋଗ ଲାଗି ବ୍ଲୁ ପ୍ରିଣ୍ଟ ପ୍ରସ୍ତୁତ ହୋଇଛି । ଶ୍ରୀଲଙ୍କାକୁ କମ ସୁଧହାରରେ ସହୟତା ଦେବା ଲାଗି ଭାରତ ନିଷ୍ପତ୍ତି ନେଇଛି । ଭାରତର ନ୍ୟାସନାଲ ଥର୍ମାଲ ପାୱାର କର୍ପୋରେସନ ଓ ଶ୍ରୀଲଙ୍କାର ସିଲନ ଇଲେକ୍ଟ୍ରିସିଟି ବୋର୍ଡ ମଧ୍ୟରେ ୧୨୦ ମେଗାୱାଟ ସୋଲାର ପାୱାର ପ୍ଲାଣ୍ଟ ପ୍ରସଙ୍ଗରେ ଚୁକ୍ତିନାମା ସ୍ବାକ୍ଷରିତ ହୋଇଛି ।