ବଢୁଛି ସାଇବର ଅପରାଧ ସଂଖ୍ଯା: ୧୦୦ ରାଷ୍ଟ୍ରକୁ ନେଇ ସର୍ଭେରେ ଭାରତର ସ୍ଥାନ ୧୦ମ

ନୂଆଦିଲ୍ଲୀ: ସାରା ବିଶ୍ବରେ ବଢୁଛି ସାଇବର ଅପରାଧ ସଂଖ୍ଯା। ଦୈନିକ ହଜାର ହଜାର ଲୋକ ସାଇବର ଅପରାଧୀଙ୍କ ଶିକାର ହେଉଛନ୍ତି। ତଥ୍ୟ ଅନୁସାରେ, ଭାରତ ୧୦ ନମ୍ବରରେ ସ୍ଥାନରେ ରହିଛି। ୧୦୦ଟି ରାଷ୍ଟ୍ରକୁ ନେଇ ବିଶ୍ବ ସାଇବର କ୍ରାଇମ ସୂଚୀ ପ୍ରସ୍ତୁତ ହୋଇଥିବା ବେଳେ ଏହାର ଭୟଙ୍କରିତା ସମ୍ପର୍କରେ ଉଲ୍ଲେଖ କରାଯାଇଛି । ରାନସମଓ୍ବେର, କ୍ରେଡିଟ କାର୍ଡ ଜରିଆରେ ଲୁଟ, ସ୍କାମ ଆଦିକୁ ବିଚାର କରାଯାଇ ଏହି ତଥ୍ୟ ପ୍ରସ୍ତୁତ ହୋଇଛି। ଏହି ତାଲିକାର ଶୀର୍ଷରେ ଋଷିଆ ରହିଥିବା ବେଳେ ତା ପଛକୁ ୟୁକ୍ରେନ, ଚୀନ, ଆମେରିକା, ନାଇଜେରିଆ, ରୋମାନିଆ ରହିଛନ୍ତି।

ସେହିପରି ସପ୍ତମ ସ୍ଥାନରେ ନର୍ଥ କୋରିଆ, ଅଷ୍ଟମ ସ୍ଥାନରେ ବ୍ରିଟେନ ଓ ନବମ ସ୍ଥାନରେ ବ୍ରାଜିଲ ରହିଛନ୍ତି। ଭର୍ଚୁଆଲରେ ହେଉଥିବା ଅପରାଧଗୁଡିକର ସଂଖ୍ୟା ବହୁସଂଖ୍ୟାରେ ବଢିଥିବା କୁହାଯାଇଛି। ରାନସମଓ୍ବେର, ମାଲଓ୍ବେର, ହ୍ଯାକିଂ, ମନିଲଣ୍ଡରିଂ, ଭର୍ଚୁଆଲ କରେନ୍ସି ଆଦିକୁ ଆକଳନ କରି ଏହି ରିପୋର୍ଟ ପ୍ରକାଶ ପାଇଛି। ସାଇବର କ୍ରାଇମର ପ୍ରକାର ଭେଦକୁ ନେଇ ରିପୋର୍ଟ ପ୍ରସ୍ତୁତ ହୋଇଛି। ଟେକ୍ନିକାଲ ସାଇବରକ୍ରାଇମ କ୍ଷେତ୍ରରେ ଋଷିଆ ଓ ୟୁକ୍ରେନ ହବ୍ ପାଲଟିଛନ୍ତି।