ଭାରତୀୟଙ୍କୁ କରୋନା ଟିକାର ତୃତୀୟ ଡୋଜ୍ ନେଇ ଆସନ୍ତା ସପ୍ତାହରେ ବୈଠକ
ନୂଆଦିଲ୍ଲୀ: ଖୁବ୍ଶୀଘ୍ର କରୋନାର ତୃତୀୟ ଡୋଜ ନେବେ ଭାରତୀୟ । ଆସନ୍ତା ସପ୍ତାହରେ ଏନେଇ କେନ୍ଦ୍ରର ବରିଷ୍ଠ ଅଧିକାରୀ ମାନେ ଆଲୋଚନା କରିବେ । ଏହାକୁ ବୁଷ୍ଟର ଡୋଜ୍ ବୋଲି କୁହାଯିବ ନାହିଁ ବରଂ ଏହାକୁ ଆଡିସନାଲ୍ ବା ଅତିରିକ୍ତ ଡୋଜ୍ ବୋଲି କୁହାଯିବ । ଏଥିପାଇଁ ସ୍ୱତନ୍ତ୍ର ନିୟମ ପ୍ରସ୍ତୁତ ହେବ । କରୋନାର ଦୁଇଟି ଯାକ ଡୋଜ ନେବାର କିଛି ମାସ ପରେ ତୃତୀୟ ଡୋଜ ଦିଆଯିବ । ସମ୍ପୂର୍ଣ୍ଣ ସୁସ୍ଥ ଲୋକ ମଧ୍ୟ ଏହି ଟିକା ନେବେ ।
ଅକ୍ଟୋବର ମାସରେ ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ ତୃତୀୟ ଡୋଜ୍ ଦେବାକୁ ବିଭିନ୍ନ ଦେଶକୁ ଅପିଲ୍ କରାଯାଇଥିଲା । ସରକାର ଚାହିଁଲେ ତୃତୀୟ ଡୋଜ୍ ଦେଇ ଲୋକଙ୍କୁ ସୁରକ୍ଷିତ କରିପାରିବେ ବୋଲି ବିଶ୍ୱ ସ୍ୱାସ୍ଥ୍ୟ ସଂଗଠନ ପକ୍ଷରୁ କୁହାଯାଇଥିଲା । ଭାରତରେ ୧୧୫ କୋଟିରୁ ଅଧିକ ଲୋକ ଟିକା ନେଇଥିବା ବେଳେ ୭୫ ଲକ୍ଷରୁ ଅଧିକ ଲୋକ ପ୍ରଥମ ଡୋଜ୍ ଏବଂ ୩୮ ଲକ୍ଷରୁ ଅଧିକ ଲୋକ ଦୁଇଟି ଯାକ ଡୋଜ୍ ନେଇ ସାରିଛନ୍ତି ।
