ଦେଶରେ ୨୪ ଘଣ୍ଟାରେ ୬୧ ହଜାର କରୋନା ନୂଆ ମାମଲା, ୮୪୮ ଜଣଙ୍କର ମୃତ୍ୟୁ
ନୂଆଦିଲ୍ଲୀ: ଭାରତରେ କରୋନା ଭୂତାଣୁ ହୁହୁ ହୋଇ ବଢ଼ିବାରେ ଲାଗିଛି । କରୋନା ଜାଲରେ ଛନ୍ଦି ହୋଇଛି ପୁରା ବିଶ୍ୱ । ଭାରତରେ କରୋନା ରୋଗୀଙ୍କ ମୋଟ ସଂଖ୍ୟା ୩୧ ଲକ୍ଷ ଅତିକ୍ରମ କରିଛି । ଦେଶରେ ଗତ ୨୪ ଘଣ୍ଟା ମଧ୍ୟରେ ୬୦,୯୭୫ ନୂଆ କରୋନା ରୋଗୀ ଚିହ୍ନଟ ହୋଇଛନ୍ତି, ୮୪୮ ଜଣଙ୍କର ମୃତ୍ୟୁ ହୋଇଛି । ଯଦି ବିଶ୍ୱ କଥା ଦେଖିବା ତେବେ ଆମେରିକା ଏବଂ ବ୍ରାଜିଲରେ ଗତ ଦିନରେ ୪୧,୪୪୮ ଏବଂ ୨୧,୪୩୪ ଟି ନୂଆ ମାମଲା ରୁଜୁ ହୋଇଛି । ଏହାପୂର୍ବରୁ ଅଗଷ୍ଟ ୨୨ ରେ ଭାରତରେ ରେକର୍ଡ ୬୯,୮୭୮ କରୋନା ମାମଲା ରିପୋର୍ଟ ହୋଇଥିଲା ।
ସ୍ୱାସ୍ଥ୍ୟ ମନ୍ତ୍ରଣାଳୟର ସର୍ବଶେଷ ତଥ୍ୟ ଅନୁଯାୟୀ, ବର୍ତ୍ତମାନ ପର୍ଯ୍ୟନ୍ତ ୩୧ ଲକ୍ଷ ୬୭ ହଜାର ୩୨୩ ଲୋକ କରୋନାରେ ସଂକ୍ରମିତ ହୋଇଛନ୍ତି । ସେଥିମଧ୍ୟରୁ ୫୮,୩୯୦ ଜଣଙ୍କର ମୃତ୍ୟୁ ହୋଇଛି । ସକ୍ରିୟ ମାମଲା ସଂଖ୍ୟା ୭ ଲକ୍ଷ ୪ ହଜାରକୁ ବୃଦ୍ଧି ପାଇଛି ଏବଂ ୨୪ ଲକ୍ଷ ଲୋକ ଆରୋଗ୍ୟ ହୋଇଛନ୍ତି । ସଂକ୍ରମଣର ସକ୍ରିୟ ମାମଲା ତୁଳନାରେ ସୁସ୍ଥ ଲୋକଙ୍କ ସଂଖ୍ୟା ପ୍ରାୟ ତିନି ଗୁଣ ଅଧିକ ରହିଛି ।
ତେବେ ଦେଶରେ ମୃତ୍ୟୁହାରରେ କ୍ରମାଗତ ହ୍ରାସ ଏବଂ ସକ୍ରିୟ ମାମଲା ହାର ରେକର୍ଡ କରିବାରେ ଲାଗିଛି କରାଯାଉଛି । ମୃତ୍ୟୁ ହାର ୧.୮୪% କୁ ଖସି ଆସିଛି । ଏହା ବ୍ୟତୀତ ଚିକିତ୍ସିତ ହେଉଥିବା ସକ୍ରିୟ ମାମଲା ହାର ମଧ୍ୟ ୨୩% କୁ ଖସି ଥିବା ବେଳେ ପୁନରୁଦ୍ଧାର ହାର ୭୫%ରେ ପହଞ୍ଚିଛି । ଭାରତରେ ପୁନରୁଦ୍ଧାର ହାର କ୍ରମାଗତ ଭାବେ ବୃଦ୍ଧି ପାଉଛି ।
ଆଇସିଏମଆର ଅନୁଯାୟୀ, ଅଗଷ୍ଟ ୨୪ ପର୍ଯ୍ୟନ୍ତ ମୋଟ ୩ କୋଟି ୭୨ ଲକ୍ଷ ନମୁନା କରୋନା ପରୀକ୍ଷା କରାଯାଇଛି, ସେଥିମଧ୍ୟରୁ ଗତକାଲି ୯ ଲକ୍ଷ ନମୁନା ପରୀକ୍ଷା କରାଯାଇଛି । ଦେଶରେ ସଂକ୍ରମଣ ହାର ୭ ପ୍ରତିଶତରୁ କମ ରହିଛି ।
