ଦେଶରେ ଗତ ୨୪ଘଣ୍ଟାରେ ୨୫ହଜାର ନୂଆ ମାମଲା ବଢାଇଲା ଚିନ୍ତା !
ନୂଆଦିଲ୍ଲୀ: ଦେଶରେ କରୋନା ସଂକ୍ରମିତଙ୍କ ସଂଖ୍ୟା କ୍ରମାଗତ ଭାବେ ବଢିବାରେ ଲାଗୁଛି । ଆଜି ପ୍ରଥମ ଥର ପାଇଁ ୨୪ଘଣ୍ଟାରେ ୨୫ ହଜାର ପାଖାପାଖି କରୋନା ମାମଲା ସାମ୍ନାକୁ ଆସିଛି । ଏବେ ଦେଶରେ ସଂକ୍ରମିତଙ୍କ ସଂଖ୍ୟା ସାଢେ ୭ଲକ୍ଷ ପାଖରେ ପହଞ୍ଚିଛି । ଗତ ୨୪ ଘଣ୍ଟାରେ ୨୪ହଜାର ୮୭୯ଜଣ ନୂଆ ପଜିଟିଭ୍ ଚିହ୍ନଟ ହୋଇଥିବା ବେଳେ ୪୮୭ଜଣଙ୍କର ମୃତ୍ୟୁ ହୋଇଛି । ଦେଶରେ ମୋଟ୍ ପଜିଟିଭ୍ ସଂଖ୍ୟା ୭ଲକ୍ଷ ୬୭ହଜାର ୨୯୬କୁ ବୃଦ୍ଧି ପାଇଥିବା ବେଳେ ଆକ୍ଟିଭ୍ କେସ୍ ରହିଛି ୨ଲକ୍ଷ ୬୯ହଜାର ୭୮୯ ।
ଏହାସହ ଦେଶରେ ୪ଲକ୍ଷ ୭୬ହଜାର ୩୭୮ଜଣ ସୁସ୍ଥ ହୋଇଥିବା ବେଳେ ମୃତ୍ୟୁସଂଖ୍ୟା ୨୧ହଜାର ୧୨୯ରେ ପହଞ୍ଚିଛି । କେନ୍ଦ୍ର ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ ଏନେଇ ସୂଚନା ଦିଆଯାଇଛି । ମହାରାଷ୍ଟ୍ରରେ ୨ଲକ୍ଷ ୨୩ହଜାର ୭୨୪ ସଂକ୍ରମିତ ହୋଇଥିବା ବେଳେ ୯ହଜାର ୪୪୮ଜଣ ପ୍ରାଣ ହରାଇଛନ୍ତି । ତାମିଲନାଡୁରେ ଲକ୍ଷେ ୨୨ହଜାର ୩୫୦ ସଂକ୍ରମିତ ହୋଇଥିବା ବେଳେ ୧୭ଶହ ଜଣଙ୍କ ମୃତ୍ୟୁ ହୋଇଛି । ଦିଲ୍ଲୀରେ ଲକ୍ଷେ ୪୮ଶହ ୬୪ସଂକ୍ରମିତ ହୋଇଥିବା ବେଳେ ୩୨ଶହ ୧୩ଜଣ ପ୍ରାଣ ହରାଇଛନ୍ତି ।
ବିଶ୍ୱର ତୃତୀୟ ସବୁଠୁ ଅଧିକ ପ୍ରଭାବିତ ହୋଇଥିବା ଦେଶ ହେଉଛି ଭାରତ
କରୋନା ସଂକ୍ରମିତଙ୍କ ହିସାବରେ ଭାରତ ହେଉଛି ବିଶ୍ୱର ୩ୟ ସବୁଠୁ ବେଶୀ ପ୍ରଭାବିତ ଦେଶ । ଆମେରିକା ବ୍ରାଜିଲ ପରେ କରୋନା ମହାମାରୀରେ ସବୁଠୁ ଅଧିକ ପ୍ରଭାବିତ ଦେଶ ହେଉଛି ଭାରତ । ଯଦି ଆମେ ପ୍ରତି ୧୦ଲକ୍ଷ ଜନସଂଖ୍ୟାରେ ସଂକ୍ରମିତ ମାମଲା ଏବଂ ମୃତ୍ୟୁ ସଂଖ୍ୟାର ହିସାବ କରିବା ତେବେ ଭାରତର ସ୍ଥିତି ବହିତ ଭଲ ଅଛି । ଭାରତରୁ ଅଧିକ ମାମଲା ଆମେରିକା ଏବଂ ବ୍ରାଜିଲରେ ରହିଛି ।
