ଓଣ୍ଟାରିଓରେ ଶହ ଶହ ହିନ୍ଦୁଙ୍କ ବିକ୍ଷୋଭ , ପୋଲିସ ଅଧିକାରୀ ସସପେଣ୍ଡ

ନୂଆଦିଲ୍ଲୀ : କାନାଡା ବ୍ରମ୍ପଟନରେ ହିନ୍ଦୁସଭା ମନ୍ଦିର ଉପରେ ହୋଇଥିବା ଆକ୍ରମଣକୁ ନେଇ ଜୋରଦାର ବିରୋଧ। ଓଣ୍ଟାରିଓରେ ବିକ୍ଷୋଭ କରିଛନ୍ତି ଶହ ଶହ କାନାଡାନିବାସୀ ହିନ୍ଦୁ। ସେପଟେ ବ୍ରମ୍ପଟନର ଏକ ହିନ୍ଦୁ ମନ୍ଦିର ନିକଟରେ ହେଉଥିବା ଖଲିସ୍ତାନୀ ସପକ୍ଷବାଦୀ ଆନ୍ଦୋଳନରେ ସାମିଲ ହୋଇ ସସପେଣ୍ଡ ହୋଇଛନ୍ତି ଜଣେ ପୋଲିସ ଅଧିକାରୀ। ସସପେଣ୍ଡ ହୋଇଥିବା ପୋଲିସ ଅଧିକାରୀ ହେଉଛନ୍ତି ହରିନ୍ଦର ସୋହି। ଏପରିକି ସେ ଖଲିସ୍ତାନୀ ପତାକା ଧରିଥିବା ବି ଦେଖାଯାଇଥିଲା।

ଆନ୍ଦୋଳନକାରୀମାନେ ଭାରତ ବିରୋଧୀ ସ୍ଲୋଗାନ ଦେଉଥିବାବେଳେ ସେଠାରେ ହରିନ୍ଦର ଉପସ୍ଥିତ ଥିଲେ। କମ୍ଯୁନିଟି ସେଫଟି ଆଣ୍ଡ ପଲିସି ଆକ୍ଟ ଅନୁସାରେ ତାଙ୍କୁ ସସପେଣ୍ଡ କରାଯାଇଛି। ହିନ୍ଦୁ ମନ୍ଦିର ବାହାରେ କିପରି ଖଲିସ୍ତାନୀ ସପକ୍ଷବାଦୀ ଆନ୍ଦୋଳନ ଚାଲିଲା ସେନେଇ ତଦନ୍ତ ଜାରି ରଖିଛି ପୋଲିସ। ବ୍ରାମ୍ପଟନରେ ହିନ୍ଦୁ ସଭା ମନ୍ଦିର ଉପରେ ହୋଇଥିବା ଆକ୍ରମଣ ପରେ ପରେ ଅନ୍ଯ ଏକ ମନ୍ଦିରରେ ଏପରି ଏକ ଘଟଣା ପ୍ରଶ୍ନ ସୃଷ୍ଟି କରିଛି। କାନାଡାରେ ହୋଇଥିବା ମନ୍ଦିର ଆକ୍ରମଣ ଘଟଣାକୁ ଭାରତ ପକ୍ଷରୁ ବିରୋଧ କରାଯାଇଛି। କାନାଡାରେ ଧାର୍ମିକ ପୀଠଗୁଡିକର ସୁରକ୍ଷା ଜରୁରୀ ବୋଲି କହିଛନ୍ତି ଭାରତର ବୈଦେଶିକ ବ୍ଯାପାର ବିଭାଗ ମୁଖପାତ୍ର ରଣଧୀର ଜୈସୱାଲ।