ନ୍ୟୁଜିଲାଣ୍ଡ: ବ୍ଳାକ୍ କେପସ୍ ବିପକ୍ଷ ଟି-୨୦ ସିରିଜ୍ରେ ଟିମ୍ ଇଣ୍ଡିଆର କ୍ଳିନ୍ ସୁଇପ୍ । ଓ୍ୱେ ଓଭାଲରେ ଖେଳାଯାଇଥିବା ଅନ୍ତିମ ବା ଶେଷ ଦିନିକିଆକୁ ଜିତିବା ସହ ୫-୦ ସିରିଜି ହାତେଇଛି ଭାରତ । ଅପରପକ୍ଷରେ ଭଲ ଖେଳ ପ୍ରଦର୍ଶନ ସତ୍ତ୍ୱେ ବିଜୟରୁ ବଞ୍ଚିତ ହୋଇଛି କିଓ୍ୱି ଟିମ୍ ।
ରବିବାର ଖେଳାଯାଇଥିବା ମ୍ୟାଚ୍ରେ ପ୍ରଥମ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଟମ୍ ଇଣ୍ଡିଆ । ନିର୍ଦ୍ଧାରିତ ଓଭରରେ ୩ ୱିକେଟ୍ ହରାଇ ୧୬୩ ରନ୍ କରିବାକୁ ସକ୍ଷମ ହୋଇଥିଲା ଟିମ୍ ।
ବିରାଟ୍ କୋହଲିଙ୍କ ସ୍ଥାନରେ କ୍ୟାପଟେନ୍ ଦାୟିତ୍ୱ ତୁଲାଉଥିବା ରୋହିତ୍ ଟପ୍ ସ୍କୋରର ଭାବେ ସର୍ବାଧିକ ୬୦ ରନ୍ କରିଥିବା ବେଳେ ରାହୁଲ୍ ୪୫ ରନର ମହତ୍ତ୍ୱପୂର୍ଣ୍ଣ ଇନିଂସ୍ ଖେଳିଥିଲେ। ଜବାବରେ ନ୍ୟୁଜିଲ୍ୟାଣ୍ଡ୍ ଟିମ୍ ୨୦ ଓଭରରେ ୯ ୱିକେଟ୍ ହରାଇ ୧୫୬ ରନ୍ କରି ପରାସ୍ତ ହୋଇଛି।
୧୬୪ ରନର ଲକ୍ଷ୍ୟର ପିଛା କରୁଥିବା କିୱି ଟିମର ଆରମ୍ଭ ବହୁତ ଖରାପ ରହିଥିଲା। ଦଳ ୧୭ ରନରେ ୩ ୱିକେଟ୍ ହରାଇ ବଡ଼ ସଙ୍କଟରେ ପଡ଼ିଥିଲା । ଦୁଇ ଓପ୍ନର ମାର୍ଟିନ୍ ଗପ୍ଟିଲ୍ (୨)ଙ୍କୁ ଯଶପ୍ରୀତ ବୁମ୍ରାଙ୍କ ପ୍ୟାଭିଲିୟନ୍ ପଠାଇଥିବା ବେଳେ କଲିନ୍ ମୁନରୋ (୧୫)ଙ୍କୁ ୱାଶିଂଟନ୍ ସୁନ୍ଦର କ୍ଲିନ୍ ବୋଲ୍ଡ କରିଥିଲେ ।
ତେବେ ମଧ୍ୟକ୍ରମରେ ଟିମ୍ ସିଫର୍ଟ ଓ ରସ୍ ଟେଲର ପୁଣିଥରେ ଦଳ ପାଇଁ ଲଢ଼ିଥିଲେ ଏବଂ ଚତୁର୍ଥ ୱିକେଟ୍ ପାଇଁ ୮୯ ରନର ମଜଭୁତ୍ ପାର୍ଟନରସିପ୍ କରି ଦଳକୁ ବିଜୟ ନିକଟତର କରାଇଥିଲେ। ଏହା ମଧ୍ୟରେ ଶିବମ ଦୁବେଙ୍କ ଗୋଟିଏ ଓଭରରେ କିୱି ବ୍ୟାଟ୍ସମ୍ୟାନ୍ ୩୪ ରନ୍ କରିଥିଲେ, ଯାହା ଭ୍ରମଣକାରୀ ଦଳ ପାଇଁ ଟର୍ଣ୍ଣିଂ ପଏଣ୍ଟ ହୋଇଥିଲେ। କିନ୍ତୁ ଏହି ଯୋଡ଼ିକୁ ଭାଙ୍ଗି ନବଦୀପ ସାଇନି ମ୍ୟାଚରେ ଭାରତକୁ ପ୍ରତ୍ୟାବର୍ତ୍ତନ କରିଥିଲେ । ସାଇନି ଉଭୟ ସିଫର୍ଟ ଓ ଟେଲରଙ୍କୁ ପ୍ୟାଭିଲିୟନ୍ ପଠାଇଥିଲେ। ଏହାପରେ ଭାରତ ନୟନ୍ତ୍ରଣକୁ ଆସିଯାଇଥିଲା ମ୍ୟାଚ୍ । ୧୨ ରନ୍ ଦେଇ ୩ ଓ୍ୱିକେଟ ନେଇଥିବା ଯଶପ୍ରୀତ ବୁମ୍ରାଙ୍କୁ ମ୍ୟାନ୍ ଅଫ୍ ଦି ମ୍ୟାଚ୍ ବିବେଚିତ ହୋଇଥିବା ବେଳେ ସିରିଜିରେ ସର୍ବାଧିକ ୨୨୪ ରନ୍ କରିଥିବା କେଏଲ୍ ରାହୁଲ ମ୍ୟାନ୍ ଅଫ୍ ଦି ସିରିଜ୍ ବିବେଚିତ ହୋଇଥିଲେ ।
