ସୀମାରେ ଯବାନଙ୍କ ପ୍ରସ୍ତୁତି ପରଖିବେ ରାଜନାଥ ସିଂହ, ଶତ୍ରୁ ବିମାନକୁ ନିମିଷେକେ ଧ୍ୱଂସ କରିବ ଭାରତୀୟ ମିଜାଇଲ୍
1 min read
ଲଦାଖ: ଏବେ ବି ଲଦାଖ ସୀମାରେ ସ୍ଥିତି ଗମ୍ଭୀର ରହିଛି । ବାରମ୍ବାର ଆଲୋଚନା ସତ୍ତେ ଚୀନ୍ ପଛକୁ ହଟିବାକୁ ନାରାଜ । ଗୋଟିଏ ପଟେ ଆଲୋଚନା ମାଧ୍ୟମରେ ସୀମା ବିବାଦ ସମାଧାନ ହେବ ବୋଲି ଚୀନ୍ କହୁଥିବା ବେଳେ ଅନ୍ୟପଟେ ସୀମାରେ ଅଧିକରୁ ଅଧିକ ଫୋର୍ସ ମୁତୟନ କରୁଛି । ଶାନ୍ତିର ଭାଷା ବୁଝିବାକୁ ଚୀନ୍ ନାରାଜ ।
ଚୀନ୍ର ଏଭଳି ଆଭିମୁଖ୍ୟ ଦେଖି ଭାରତ ବି ପ୍ରସ୍ତୁତ ହୋଇଛି । ଅଧିକରୁ ଅଧିକ ଯବାନଙ୍କୁ ସୀମାରେ ମୁତୟନ କରିବା ଆରମ୍ଭ କରିଛି ଭାରତ । ଚୀନ୍ର କୌଣସି ବି କାର୍ଯ୍ୟକଳାପର ମୁହଁତୋଡ଼ ଯବାବ ଦେବା ପାଇଁ ଯବାନମାନେ ସବୁ ସ୍ତରରେ ପ୍ରସ୍ତୁତ ଅଛନ୍ତି । ଭାରତୀୟ ସେନାର ଏଭଳି ପ୍ରସ୍ତୁତିକୁ ପରଖିବା ପାଇଁ ଆସନ୍ତାକାଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ ଲେହରେ ପହଞ୍ଚିବେ । ରାଜନାଥଙ୍କ ସହ ସେନା ମୁଖ୍ୟ ମନୋଜ ମୁକୁନ୍ଦ ନରଓ୍ୱାଣେ ମଧ୍ୟ ଲେହରେ ପହଞ୍ଚିବେ । ଗତ ସପ୍ତାହରେ ମଧ୍ୟ ଲେହ ଏବଂ ଲଦାଖରେ ସ୍ଥିତି ପରିଖିବା ପାଇଁ ନରଓ୍ୱାଣେ ପହଞ୍ଚିଥିଲେ ।
ଗତ ମାସ ଆରମ୍ଭରୁ ଯେତେବେଳେ ଚୀନ୍ ସେନା ଭାରତୀୟ ସୀମାରେ ଅନୁପ୍ରବେଶ କରିବାକୁ ଚେଷ୍ଟା କଲା, ସେତେବେଳୁ ହିଁ IAF ପୂର୍ବ-ଲଦାଖ ସେକ୍ଟରକୁ Su-30MKI ପଠାଇଥିଲା । ଚାଇନିଜ୍ମାନେ କ୍ରମାଗତ ଭାବେ ଭାରତୀୟ ଆକାଶ ମାର୍ଗରେ ବୁଲୁଥିଲେ । LAC ସେପାଖରେ ଚୀନ୍ ପ୍ରାୟ 10 କିଲୋମିଟର ଦୂରରେ ଅନେକ କନ୍ଷ୍ଟ୍ରକ୍ସନ୍ କାର୍ଯ୍ୟ ଆରମ୍ଭ କରିଛି । ଏହି ବିମାନଗୁଡ଼ିକ ଏହି କନ୍ଷ୍ଟ୍ରକ୍ସନ କାମ ଚାରିପଟେ ରୁଟିନ୍ ଉଡ଼ାଣ କରନ୍ତି ।
ସୀମାରେ ଚୀନ୍ର ପ୍ରତ୍ୟେକ ଗତିବିଧି ଉପରେ ନଜର ରଖିବାକୁ ଏବଂ ମୁକାବିଲା କରିବାକୁ ବାୟୁସେନା ପ୍ରସ୍ତୁତ ଅଛି । ସମଗ୍ର ସେକ୍ଟରରେ ଆଡ୍ଭାନ୍ସ ଓ ଦ୍ରୁତପ୍ରତିକ୍ରିୟାଶୀଳ ମିଜାଇଲ୍ ଉତ୍କ୍ଷେପଣର ବ୍ୟବସ୍ଥା କରାଯାଇଛି । ଯାହାକି କିଛି ସେକେଣ୍ଡରେ ଶତ୍ରୁପକ୍ଷ ଯୁଦ୍ଧ ବିମାନକୁ ଧ୍ୱଂଶ କରିଦେବ । ପୂର୍ବ ଲଦାଖକୁ ‘ଆକାଶ’ କ୍ଷେପଣାସ୍ତ୍ର ମଧ୍ୟ ପଠାଇଛି ସେନା । IAF ଯୁଦ୍ଧ ବିମାନ ପୂର୍ବରୁ ହିଁ ବହୁତ ସକ୍ରିୟ ଅଛି ।
