ନୂଆଦିଲ୍ଲୀ: ପୁଣି ଦେଶକୁ ଫେରିଲା କ୍ରିକେଟ ଫିଭର । ଆଜିଠୁ ଆରମ୍ଭ ହେଉଛି ଇଂଲଣ୍ଡ ବିପକ୍ଷ ଘରୋଇ ଶୃଙ୍ଖଳା । ଯେଉଁଥିରେ ପ୍ରଥମେ ଖେଳାଯିବ ଫଟାଫଟ କ୍ରିକେଟ ଓ ପରେ ପରେ ଦିନିକିଆ କ୍ରିକେଟ । ଏହାକୁ ନେଇ ସାରା ଦେଶରେ ଉତ୍ସାହ ଆରମ୍ଭ ହୋଇଯାଇଥିବା ବେଳେ ଆଜି କୋଲକାତାରେ ଖେଳାଯିବ ପ୍ରଥମ ଟି-ଟ୍ବେଣ୍ଟି । ମୋଟ ୫ଟି ଟି-ଟ୍ବେଣ୍ଟି ଓ ୩ଟି ଏକ ଦିବସୀୟ ମ୍ୟାଚ୍ ଖେଳାଯିବ । ତେବେ ଦୁଇ ଦଳ କୋଲକାତାରେ ପହଞ୍ଚି ଜୋରଦାର ପ୍ରାକ୍ଟିସ କରିଛନ୍ତି । ତେବେ ବର୍ଡର ଗାଭାସ୍କର ଟ୍ରଫିରେ ପରାଜୟକୁ ଭୁଲି ନୂଆ ପାଳି ଆରମ୍ଭ କରିବା ମୁଡରେ ଅଛି ମେନ ଇନ ବ୍ଲ୍ଯୁ । ମ୍ୟାଚ୍ ଭାରତୀୟ ସମୟ ସନ୍ଧ୍ୟା ୭ଟାରେ ଆରମ୍ଭ ହେବ। ଭାରତ ପାଇଁ ଏହି ସିରିଜ ବେଶ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି । କାରଣ ଆସନ୍ତା ବର୍ଷ ୨୦୨୬ ଟି-୨୦ ବିଶ୍ୱକପ ପାଇଁ ଦଳକୁ ଏବେ ଠାରୁ ହିଁ ରଣନୀତି କରିବାକୁ ପଡିବ । ଟିମ ସନ୍ତୁଳନ ରକ୍ଷା କରିବାକୁ ପଡିବ ।
ରୋହିତ ଶର୍ମା, ବିରାଟ କୋହଲି ଓ ରବୀନ୍ଦ୍ର ଜାଡେଜା ଟି-୨୦ରୁ ଅବସର ନେଇ ସାରିଛନ୍ତି। ଦଳ ଏବେ ନୂଆ ଅଧିନାୟକ ସୂର୍ଯ୍ୟ କୁମାର ଯାଦବଙ୍କ ନେତୃତ୍ୱରେ ଖେଳୁଛି। କିନ୍ତୁ ଘରୋଇ ମାଟିରେ ଇଂଲଣ୍ଡକୁ ସାମ୍ନା କରିବା ଭାରତ ପାଇଁ ସେତେଟା ସହଜ ହେବନି। ସେହିପରି କାକର ମଧ୍ୟ ପୂରା ସିରିଜରେ ବେଶ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିବ। ଇଂଲଣ୍ଡ ମଧ୍ଯ ଜୋରଦାର ପ୍ରସ୍ତୁତି ଚଳାଇଛି । ଜୋସ ବଟଲରଙ୍କ ଅଧିନାୟକତ୍ବରେ ପଡିଆକୁ ଓହ୍ଲାଇବା ବ୍ରିଟିଶ ବାହିନୀ ।
