ଏସିଆନ ଚାମ୍ପିଆନ୍ସ ଟ୍ରଫି ହକି: ପାକିସ୍ତାନକୁ ଏକତରଫା ଭାବେ ହରାଇଲା ଭାରତ

ଚେନ୍ନାଇ: ଚେନ୍ନାଇରେ ପାକିସ୍ତାନକୁ ଏକତରଫା ଭାବେ ହରାଇଛି ଭାରତୀୟ ହକି ଟିମ୍ । ଏସିଆନ ଚାମ୍ପିୟନ୍ସ ଟ୍ରଫିର ଶେଷ ଲିଗ୍‌ ମ୍ୟାଚରେ ଭାରତ ୪-୦ରେ ପାକିସ୍ତାନକୁ ପରାସ୍ତ କରିଛି । ଏଥିସହ ୧୩ ପଏଣ୍ଟ ପାଇ ଟେବୁଲ ଟପ୍‌ ସହ ସେମିରେ ପ୍ରବେଶ କରିଛି । ଭାରତ ପକ୍ଷରୁ ଅଧିନାୟକ ହରମନପ୍ରୀତ ସିଂହ ଦୁଇଟି ଗୋଲ ସ୍କୋର କରିଥିବା ବେଳେ ଯୁଗରାଜ ସିଂ ଓ ଆକାଶଦୀପ ସିଂହ ଗୋଟିଏ ଲେଖାଏଁ ଗୋଲ ଦେଇଛନ୍ତି । ପାକିସ୍ତାନ ଏହି ମ୍ୟାଚ୍‌ରେ ଗୋଲ ଦେବାକୁ ଯଥା ସମ୍ଭବ ଚେଷ୍ଟା କରିଥିଲେ ମଧ୍ୟ ଭାରତୀୟ ଡିଫେଣ୍ଡରଙ୍କ ଆଗରେ ଦଳର କୌଣସି ରଣନୀତି କାମ କରିନି ।

ଆଜିର ମ୍ୟାଚରେ ଭାରତ ନିକଟରୁ ପରାଜୟ ପରେ ଦଳ ଏବେ ସେମି ଫାଇନାଲ ଦୌଡ଼ରୁ ବାଦ ପଡ଼ିଛି । ହାଇଭୋଲେଟଜ୍ ଭାରତ-ପାକ୍ ଲଢ଼େଇ ବେଶ ଦମଦାର ଢଙ୍ଗରେ ଆରମ୍ଭ ହୋଇଥିଲା । ପ୍ରଥମ କ୍ୱାର୍ଟରରୁ ହିଁ ଭାରତୀୟ ଟିମ୍ ଆଟାକିଂ ଖେଳ ପ୍ରଦର୍ଶନ କରିଥିଲା । ପ୍ରଥମ କ୍ବାଟରରେ ହରମନପ୍ରୀତ ସିଂହ ଗୋଲ ଦେଇ ୧-୦ରେ ଆଗୁଆ କରି ଦେଇଥିଲେ । ଦ୍ବିତୀୟ କ୍ବାର୍ଟରରେ ମଧ୍ୟ ଭାରତର ଦବଦବା ଦେଖିବାକୁ ମିଳିଥିଲା । ଦ୍ବିତୀୟ ଗୋଲକୁ ମଧ୍ୟ ହରମନପ୍ରୀତ ସିଂହ ଦେଇଥିଲେ ।