ଦେଶରେ ବଢ଼ୁଛି ସଂକ୍ରମଣ, ସ୍ୱାସ୍ଥ୍ୟ କର୍ମୀଙ୍କୁ ଦିଆଯାଇପାରେ ବୁଷ୍ଟର ଡୋଜ୍
ନୂଆଦିଲ୍ଲୀ: ଦେଶରେ ପୁଣି ଥରେ କରୋନା ସଂକ୍ରମଣ ମାମଲା ବୃଦ୍ଧି ପାଉଛି । ସଂକ୍ରମଣ ବଢ଼ୁଥିବାରୁ ଦେଶର ସମସ୍ତ ସ୍ୱାସ୍ଥ୍ୟକର୍ମୀଙ୍କୁ ଟିକାର ବୁଷ୍ଟର ଡୋଜ୍ ଦେବାକୁ ପ୍ରସ୍ତୁତି ଆରମ୍ଭ ହୋଇଛି । ମିଡିଆ ରିପୋର୍ଟ ଅନୁସାରେ ଖୁବଶୀଘ୍ର ଏନେଇ ନିଷ୍ପତ୍ତି ନେଇପାରନ୍ତି କେନ୍ଦ୍ର ସରକାର ।
ମେଡିକାଲ ଜର୍ଣ୍ଣାଲ ନେଚରରେ ପ୍ରକାଶିତ ଖବର ଅନୁସାରେ, କେତେକ ଦେଶର ବୈଜ୍ଞାନିକ ମିଳିତ ଅଧ୍ୟୟନ କରିଥିଲେ । କରୋନା ଭ୍ୟାକ୍ସିନର ୨ଟି ଡୋଜ୍ ନେବା ପରେ ମଧ୍ୟ ବହୁତ ସ୍ୱାସ୍ଥ୍ୟକର୍ମୀ ଡେଲ୍ଟା ଭାରିଆଣ୍ଟରେ ସଂକ୍ରମିତ ହୋଇଛନ୍ତି । ତେବେ ଆଶ୍ୱସ୍ତିକର କଥା ହେଉଛି ସଂକ୍ରମିତ ହୋଇଥିବା ସ୍ୱାସ୍ଥ୍ୟକର୍ମୀଙ୍କ ଠାରେ ଗମ୍ଭୀର ଲକ୍ଷଣ ଦେଖା ଯାଉନଥିଲେ ମଧ୍ୟ ଆଇସୋଲେସନରେ ରହିବାକୁ ପଡ଼ୁଛି ।
ଆଇଜିଆଇବିର ନିର୍ଦ୍ଦେଶକ ଡ. ଅନୁରାଗ ଅଗ୍ରୱାଲଙ୍କ ଅନୁସାରେ, କରୋନାର ବଢ଼ୁଥିବା ମାମଲା ମଧ୍ୟରେ ସ୍ୱାସ୍ଥ୍ୟକର୍ମୀଙ୍କ ପାଇଁ ବୁଷ୍ଟର ଡୋଜର ଆରମ୍ଭ କରିବା ଦରକାର । ସେହିଭଳି ସ୍ୱାସ୍ଥ୍ୟ ମନ୍ତ୍ରଣାଳୟ ସହ ଜଡ଼ିତ ବରିଷ୍ଠ ଅଧିକାରୀ କହିଛନ୍ତି, ବୁଷ୍ଟର ଡୋଜ୍ ନେଇ ବୈଜ୍ଞାନିକଙ୍କ ଅଧ୍ୟୟନ ଯଥେଷ୍ଟ ନୁହେଁ । ଆଇସିଏମଆରର ଏଟ ଟିମ୍ ଏହା ଉପରେ କାମ କରୁଛି । ଟିକାକୁ ନେଇ ଗଠିତ ରାଷ୍ଟ୍ରୀୟ ବୈଷୟିକ ପରାମର୍ଶଦାତା କମିଟିର ଜଣେ ସଦସ୍ୟଙ୍କ ଅନୁସାରେ, ସ୍ୱାସ୍ଥ୍ୟକର୍ମୀଙ୍କୁ କୋଭିସିଲ୍ଡ ଓ କୋଭାକ୍ସିନର ବୁଷ୍ଟର ଡୋଜ୍ ଦେବାକୁ ପ୍ରସ୍ତୁତି ଚାଲିଛି ।
