ମହାଶିବରାତ୍ରିରେ ଅଘଟଣ: ଦୀପ ନିଆଁରେ ଦୁଇ ମହିଳା ଗୁରୁତର
ନନ୍ଦିଘୋଷ ବ୍ୟୁରୋ: ମହାଶିବରାତ୍ରିକୁ ନେଇ ସବୁଠି ଉତ୍ସାହର ମାହୋଲ । ଶୈବପୀଠରେ ଦୀପ ଜାଳି ଶ୍ରଦ୍ଧାଳୁ ଭୋଳେନାଥଙ୍କୁ ନିଜର ଭକ୍ତି ଜଣାଉଛନ୍ତି । ଆଉ ଏହାରି ଭିତରେ ବାଲେଶ୍ବର ଓ ଆନନ୍ଦପୁରରୁ ଦୁଇଟି ଅଘଟଣ ଖବର ଆସିଛି । ଉଭୟ ସ୍ଥାନରେ ଦୀପ ନିଆଁରୁ ଦୁଇ ଜଣ ମହିଳା ଆହତ ହୋଇଥିବା ଜଣାପଡିଛି ।
ବାଲେଶ୍ୱର ଜିଲ୍ଲାର ଖଇରା ବ୍ଲକ ଗଣ୍ଡିବେଡ ଗାଁର ଭଗବାନ ବେହେରାଙ୍କ ପତ୍ନୀ ରଞ୍ଜୁସ୍ମିତା ବେହେରା ଦୀପ ନିଆଁରେ ଆହତ ହୋଇଛନ୍ତି । ସେ ଗ୍ରାମର ଥିବା ଲଙ୍କେଶ୍ୱର ମହାଦେବଙ୍କ ମନ୍ଦିରକୁ ପୂଜା କରିବାକୁ ଯାଇଥିଲେ । ସେଠାରେ ଦୀପ ଜାଳିବା ବେଳେ ପୂର୍ବରୁ ଜଳୁଥିବା ଦୀପରୁ ତାଙ୍କ ଶାଢ଼ୀରେ ନିଆଁ ଲାଗି ଯାଇ ଗୁରୁତର ଆହତ ହୋଇଛନ୍ତି । ତାଙ୍କୁ ବାଲେଶ୍ୱର ବଡ ମେଡିକାଲରେ ଭର୍ତ୍ତି କରାଯାଇଛି ।
ସେହିପରି କେଉଁଝର ଜିଲ୍ଲା ହାଟଡିହି ବ୍ଲକ ବଞ୍ଚୋରେ ମଧ୍ୟ ଜଣେ ମହିଳା ଦୀପ ନିଆଁରେ ଆହତ ହୋଇଛନ୍ତି । ମହିଳା ଜଣଙ୍କ ଶିବରାତ୍ରି ଅବସରରେ ବଟେଶ୍ବର ମହାଦେବ ମନ୍ଦିରକୁ ପୂଜା କରିବାକୁ ଯାଇଥିଲେ । ସେଠାରେ ଦୀପରୁ ନିଆଁ ତାଙ୍କ ଶାଢ଼ୀରେ ଲାଗି ଯାଇଥିଲା । ତାଙ୍କୁ ଗୁରୁତର ଅବସ୍ଥାରେ ଆନନ୍ଦପୁର ଉପଖଣ୍ଡ ଚିକିତ୍ସାଳୟରେ ଭର୍ତ୍ତି କରାଯାଇଛି । ଠାକୁର ଦର୍ଶନ ସମୟରେ ଅସାବଧାନତାରୁ ଦୀପ ନିଆଁ ତାଙ୍କ ଶାଢ଼ିରେ ଲାଗିଯାଇଥିଲା ।
