ପଶ୍ଚିମବଙ୍ଗରେ ଆରମ୍ଭ ହେଲା ପୋଷ୍ଟାଲ ଭୋଟ, ବାସନ୍ତୀ ପ୍ରଥମ ମତଦାତା

ପଶ୍ଚିମବଙ୍ଗରେ କ୍ୟାମ୍ପେନ୍ ଓ୍ୱାର୍ । ନିର୍ବାଚନର ୯ ଦିନ ପୂର୍ବରୁ ବିଜେପି-ଟିଏମ୍‌ସିର ହାଇଭୋଲଟେଜ୍ ପ୍ରଚାର । ପ୍ରଥମ ପର୍ଯ୍ୟାୟ ନିର୍ବାଚନକୁ ଆଉ ମାତ୍ର ୯ଦିନ ବାକି ଥିବା ବେଳେ ଜୋର୍ ଧରିଛି ପ୍ରଚାର ରାଜନୀତି । ବିଜେପିର ବହୁ ହାଇଭୋଲଟେଜ୍ ନେତାଙ୍କ ବିପକ୍ଷରେ ଏକାକି ମଇଦାନରେ ଲଢୁଛନ୍ତି ମମତା । ସେପଟେ ଧର୍ମ ନାଁରେ ନିର୍ବାଚନୀ ବୈତରଣୀ ପାର ହେବାକୁ ଚେଷ୍ଟା ଚଳାଇଛି ବିଜେପି ବୋଲି ମମତା କରିଛନ୍ତି ସମାଲୋଚନା ।

ଗୁରୁବାର ପଶ୍ଚିମବଙ୍ଗ ଗସ୍ତ କରି ଦଳୀୟ କାର୍ଯ୍ୟକ୍ରମରେ ସାମିଲ ହେବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ପୁରୁଲିଆଠାରେ ହେବାକୁ ଥିବା ଏକ ରାଲିରେ ମୋଦି ସାମିଲ ହେବେ । ସେପଟେ ନିର୍ବାଚନ ପାଇଁ ବୁଧବାର ପଶ୍ଚିମବଙ୍ଗରେ ଇସ୍ତାହାର ଜାରି କରିଛି ତୃଣମୁଳ କଂଗ୍ରେସ । ମା, ମାଟି, ମାନୁଷ ପାଇଁ ଏହି ଇସ୍ତାହାର ପ୍ରକାଶ ହୋଇଛି ବୋଲି ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ।

ସେହିପରି ଗୁରୁବାର ପଶ୍ଚିମବଙ୍ଗରେ ୩ଟି ରାଲିକୁ ସମ୍ବାଧିତ କରିବେ ଦିଦି । ରାଲିରେ ଯୋଗଦେବା ଅବସରରେ ଇସ୍ତାହାରରେ ଟିଏମ୍‌ସି ଦେଇଥିବା ପ୍ରତିଶ୍ରୁତିକୁ ମମତା ଦୋହରାଇବା ସହ ବିଜେପିକୁ ଟାର୍ଗେଟ କରିପାରନ୍ତି ବୋଲି ଆଶଙ୍କା କରାଯାଉଛି । ୨୭ ମାର୍ଚ୍ଚରେ ପ୍ରଥମ ପର୍ଯ୍ୟାୟ ଭୋଟ ଥିବା ବେଳେ ପୋଷ୍ଟାଲ ଭୋଟ ଗ୍ରହଣ ଆରମ୍ଭ ହୋଇଛି । ଝରିଗ୍ରାମର ୮୦ ବର୍ଷିୟା ବୃଦ୍ଧା ବାସନ୍ତୀ ପ୍ରଥମ ଭୋଟ୍ ଦେଇଛନ୍ତି । ବାସନ୍ତୀଙ୍କ ସମେତ ଅନ୍ୟ ୬ଜଣ ବୃଦ୍ଧା ମଧ୍ୟ ବାଲାଟରେ ଭୋଟ ଦେଇଛନ୍ତି । ନିର୍ବାଚନ ଆୟୋଗଙ୍କ ଏକ ଟିମ୍ ଓ ସିଆର୍‌ପିଏଫ୍ ଦଳ ସେମାନଙ୍କ ଘରେ ପହଞ୍ଚି ଭୋଟ ଗ୍ରହଣ କରିଥିଲେ । ଏ ସମସ୍ତ ପ୍ରକିୟାର ଭିଡିଓ ରେକର୍ଡ କରାଯାଇଥିବା ନିର୍ବାଚନ କମିଶନ ପକ୍ଷରୁ କୁହାଯାଇଛି ।