ପ୍ରେମିକକୁ ବାନ୍ଧି ପ୍ରେମିକାକୁ ଗଣ ଦୁଷ୍କର୍ମ, ୩ ଅଭିଯୁକ୍ତ ଗିରଫ

ନୟାଗଡ଼: ପ୍ରେମିକକୁ ବାନ୍ଧି ତା’ ଆଗରେ ପ୍ରେମିକାକୁ ଗଣ ଦୁଷ୍କର୍ମ । ଆଉ ଦୁଷ୍କର୍ମ ବେଳର ଭିଡିଓ କଲେ ଉତ୍ତୋଳନ । ପରେ ଭିଡିଓ ଦେଖାଇ ବ୍ଲାକମେଲିଂ କରିବା ସହ ଯୁବତୀଙ୍କୁ ଆସିବାକୁ କଲେ ବାଧ୍ୟ । ଯୁବତୀ ନଆସିବାରୁ ଭିଡିଓ କଲେ ଭାଇରାଲ । ଏମିତି ଅଭିଯୋଗରେ ପୋଲିସ ୩ ଦୁଷ୍କର୍ମ ଅଭିଯୁକ୍ତଙ୍କୁ ଗିରଫ କରିଛି ।

ଘଟଣା ଘଟିଛି ନୟାଗଡ଼ ଫତେଗଡ଼ ଅଞ୍ଚଳରେ । ଅଭିଯୋଗ ଅନୁସାରେ, ଫତେଗଡ଼ ରାମ ମନ୍ଦିର ଦର୍ଶନ କରିବାକୁ ଯାଇଥିଲେ ଜଣେ ଯୁବକ ଓ ତାଙ୍କ ମହିଳା ବନ୍ଧୁ। ସେମାନେ ଫେରୁଥିବା ବେଳେ ଭାପୁର ରାସ୍ତାର ପିଠାଖାଇ ଜଙ୍ଗଲରେ କିଛି ଯୁବକ ସେମାନଙ୍କୁ ଅଟକାଇଥିଲେ । ପୁରୁଷ ବନ୍ଧୁଙ୍କୁ ବାନ୍ଧି ମାଡ଼ ମାରିବା ସହ ଯୁବତୀଙ୍କୁ ଗଣଦୁଷ୍କର୍ମ କରିଥିଲେ । ଏପରିକି ଭିଡିଓ ରେକର୍ଡିଂ କରିଥିଲେ । ପରେ ଉଭୟଙ୍କୁ ଯିବାକୁ ଦେଇଥିଲେ ।

ପରେ ଭିଡିଓକୁ ନେଇ ବ୍ଲାକ୍ ମେଲ୍ କରି ଟଙ୍କା ମାଗିଥିଲେ । ଯୁବତୀ ଜଣକ ନ ଆସିବାରୁ ଭିଡିଓକୁ ଭାଇରାଲ କରି ଦେଇଥିଲେ । ଥାନାରେ ଯୁବତୀ ଜଣକ ଅଭିଯୋଗ କରିବା ପରେ ପୋଲିସ ତନାଘନା କରିବା ସହ ୩ ଅଭିଯୁକ୍ତଙ୍କୁ ଗିରଫ କରିଛି । ପୋଲିସ ଓ ସାଇଣ୍ଟିଫିକ୍ ଟିମ୍ ଘଟଣାର ତଦନ୍ତ କରୁଛନ୍ତି । ଆଜି ସିନ୍ ରିକ୍ରିଏସନ୍ କରାଯିବ ବୋଲି ଜଣାପଡ଼ିଛି ।