ଟଙ୍କା ଗଣି ନପାରିବାରୁ ଶିଶୁପାଳ ହୋଇ ଫେରିଲା ବର

ଫାରୁଖାବାଦ: ଧୂମଧାମରେ ବାଜା ରୋସଣୀ କରି ବାହା ହେବାକୁ ବାହାରିଲା ବର । ନାଚଗୀତରେ ବରଯାତ୍ରୀ ରାସ୍ତାରେ କଲେ ଧମାଲ । ରାତି ପ୍ରାୟ ଗୋଟାଏରେ ବର ପହଞ୍ଚିଲା କନ୍ୟା ଘରେ । ତା’ପରେ ସବୁ ଓଲଟ ପାଲଟ ହୋଇଗଲା । କାରଣ ବାଟବରଣୀ ବେଳେ ଜଣା ପଡ଼ିଲା ବର ଅପାଠୁଆ । ଟଙ୍କା ବି ଗଣି ପାରିଲେନି । ଏହାପରେ ଅପାଠୁଆ ଯୁବକଙ୍କୁ ବାହା ହେବାକୁ ରୋକଠୋକ ମନା କରିଦେଲା କନ୍ୟା । ଫଳରେ ଶିଶୁପାଳ ହୋଇ ଘରକୁ ଫେରିବାକୁ ପଡିଲା ବରକୁ ।

ଘଟଣା ଉତ୍ତରପ୍ରଦେଶର ଫାରୁଖାବାଦର । ବାଟବରଣୀ ସମୟରେ କନ୍ୟାର ଭାଇ ବରକୁ ଟଙ୍କା ଗଣିବାକୁ ଦେଇଥିଲେ । ନୋଟ୍ ଗଣିବା ଛାଡନ୍ତୁ, ଖୁଚୁରା ପଇସାବି ବର ଗଣି ପାରି ନଥିଲେ । ଏ ଖବର କନ୍ୟା ଜାଣିବା ପରେ ଅପାଠୁଆ ଯୁବକଙ୍କୁ ବିବାହ କରିବାକୁ ମନା କରିଦେଇଥିଲେ । ଏହାପରେ ଉଭୟ ପରିବାର ମଧ୍ୟରେ ବିବାଦ ଦେଖା ଦେଇଥିଲା । କଥା କଟାକଟି ହେବା ସହ ଘଟଣା ଥାନାକୁ ଯାଇଥିଲା । ପରେ ବିବାହ କରା ନଯିବାକୁ ଥାନାରେ ବୁଝାମଣା ହୋଇଥିଲା । ଏହାପରେ ବର ଫେରି ଯାଇଥିଲା ।

ଖବର ଅନୁସାରେ ଦୁର୍ଗାପୁର ଗାଁର ଯୁବତୀଙ୍କ ବିବାହ ଦୁଇମାସ ପୂର୍ବରୁ ମେନପୁର ଥାନା ବିଛମା ଗାଁର ବବିନା ସାରାରେ ରହୁଥିବା ଯୁବକଙ୍କ ସହ ଠିକ ହୋଇଥିଲା । ଗୁରୁବାର ବର ଆସିଥିଲା । ରାତି ଗୋଟାଏରେ ବାଟବରଣୀ ସମୟରେ ବର ଅପାଠୁଆ ବୋଲି କୌଣସି କାରଣ ସନ୍ଦେହ କରିଥିଲେ । ଯୁବତୀଙ୍କ ଭାଇ ପଣ୍ଡିତଙ୍କୁ ୨୧୦୦ ଟଙ୍କା ଦେଇ ବରକୁ ଗଣାଇବାକୁ କହିଥିଲେ । ତାଙ୍କ ସନ୍ଦେହ ସତ ହେବା ପରେ ଏନେଇ ସେ ପରିବାର ଲୋକଙ୍କୁ ସୂଚନା ଦେଇଥିଲେ । ଏହାପରେ ଯୁବତୀ ବିବାହ କରିବାକୁ ମନା କରି ଦେଇଥିଲେ ।

ଯୁବତୀ ବିବାହ କରିବାକୁ ମନା କରିବା ପରେ ଘଟଣା ଥାନାକୁ ଯାଇଥିଲା । ପୋଲିସ ଉଭୟ ପକ୍ଷଙ୍କୁ ଥାନାକୁ ନେଇଯାଇଥିଲା । ଥାନାରେ ଘଣ୍ଟା ଘଣ୍ଟା ଆଲୋଚନା ହେବା ପରେ ବିବାହ ବନ୍ଦ ହୋଇଥିଲା ।