ରାୟ ପୂର୍ବରୁ ହାତାହାତି, ସୁପ୍ରିମକୋର୍ଟ ବାହାରେ ଓକିଲ-ପୋଲିସ ଖଣ୍ଡଯୁଦ୍ଧ
ଇସଲାମାବାଦ: କଣ ହେବ ଇମ୍ରାନଙ୍କ ଭାଗ୍ଯ ? କୌଣସି ବି ମୁହୂର୍ତ୍ତରେ ଆସିପାରେ ସୁପ୍ରିମକୋର୍ଟଙ୍କ ରାୟ । ସୁପ୍ରିମକୋର୍ଟଙ୍କ ୫ ଜଣିଆ ଖଣ୍ଡପୀଠ ଇମ୍ରାନ ସରକାରଙ୍କ ବିରୋଧରେ ଆସିଥିବା ଅନାସ୍ଥା ଓ ସଂସଦ ଭଙ୍ଗ ଉପରେ ରାୟ ଶୁଣାଇବେ । ରାୟ ପୂର୍ବରୁ ପାକିସ୍ତାନରେ ରାଜନୈତିକ ଗତିବିଧି ଜୋର୍ ଧରିଛି । ଇମ୍ରାନ ଖାନ କହିଛନ୍ତି, କୋର୍ଟ ଯାହା ନିଷ୍ପତ୍ତି ନେବେ ତାହା ମୁଁ ଓ ମୋ ଦଳ ମାନିବ । ରାୟ ପୂର୍ବରୁ ପାକିସ୍ତାନ ସୁପ୍ରିମକୋର୍ଟ ବାହାରେ ସୁରକ୍ଷା ବ୍ୟବସ୍ଥାକୁ ବଢ଼ାଇ ଦିଆଯାଇଛି । ଅତିରିକ୍ତ ପୋଲିସ ଫୋର୍ସ ମୁତୟନ ହୋଇଛନ୍ତି ।
ବିପୁଳ ସୁରକ୍ଷା କର୍ମୀ ମୁତୟନ ସତ୍ତ୍ୱେ କୋର୍ଟ ବାହାରେ ଓକିଲ ଓ ପୋଲିସ ଧସ୍ତାଧସ୍ତି ହୋଇଥିବା ଦେଖିବାକୁ ମିଳିଛି । ମାମଲାର ଶୁଣାଣି କରୁଥିବା ୫ ଜଣିଆ ଖଣ୍ଡପୀଠ ସ୍ଥିତି ବିଗୁଡ଼ିଥିବା ଦେଖି କୋର୍ଟ କବାଟକୁ ବନ୍ଦ କରି ଦେଇଛନ୍ତି । ନିଷ୍ପତ୍ତି ଶୁଣାଇବା ପୂର୍ବରୁ ଖଣ୍ଡପୀଠରେ ଥିବା ସମସ୍ତ ବିଚାରପତି ପରସ୍ପର ମଧ୍ୟରେ ଆଲୋଚନା କରୁଛନ୍ତି ।
ଏଥିସହ ବଢ଼ନ୍ତୁ: ଅନାସ୍ଥା ପ୍ରସ୍ତାବ ଖାରଜ ନିଷ୍ପତ୍ତିକୁ ଭୁଲ୍ କହିଲେ ପାକିସ୍ତାନ ସୁପ୍ରିମକୋର୍ଟ
ନିଷ୍ପତ୍ତି ଶୁଣାଇବା ପୂର୍ବରୁ ପ୍ରଧାନ ବିଚାରପତି ନିର୍ବାଚନ ଆୟୋଗଙ୍କୁ ଜବାବ ମାଗିଥିଲେ । ନିର୍ବାଚନ ଆୟୋଗର ସଚିବ ଆଇନ୍ ଟିମ୍ ସହିତ କୋର୍ଟରେ ପହଞ୍ଚିଛନ୍ତି । ନିର୍ବାଚନ ଆୟୋଗ କହିଛନ୍ତି, ୯୦ ଦିନ ମଧ୍ୟରେ ନିର୍ବାଚନ ସମ୍ଭବ ନୁହେଁ । କୋର୍ଟରେ ନିର୍ବାଚନ ଆୟୋଗ ପକ୍ଷ ରଖି କହିଛନ୍ତି, ନିର୍ବାଚନ ପାଇଁ ୪ ମାସ ସମୟ ଦରକାର । ଅକ୍ଟୋବର ସୁଦ୍ଧା ସମସ୍ତ ପ୍ରକ୍ରିୟା ସରିଯିବ ।
