ଆଫଗାନ ପ୍ରସଙ୍ଗରେ ମୁହଁ ଖୋଲିଲେ ଇମ୍ରାନ ଖାଁ, କହିଲେ ତାଲିବାନ ସରକାର କଲେ ଗୃହଯୁଦ୍ଧ ନିଶ୍ଚିତ

କାବୁଲ: ଆଫଗାନିସ୍ତାନ ବ୍ୟାପାରରେ ମୁହଁ ଖୋଲିଲେ ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାଁ। କହିଲେ ୧୯୮୯ରେ ଋଷ ଆଫଗାନିସ୍ତାନ ଛାଡିବା ପରେ ଯେପରି ରକ୍ତପାତ ସୃଷ୍ଟି ହୋଇଥିଲା, ଠିକ୍ ସେପରି ଆମେରିକା ଛାଡିବା ପରେ ସେହି ଅବସ୍ଥା ସୃଷ୍ଟି ହେବା ନେଇ ସେ ଆଶଙ୍କା ପ୍ରକାଶ କରିଛନ୍ତି। ସମଗ୍ର ଆଫଗାନିସ୍ତାନକୁ ତାଲିବାନ ପରିଚାଳନା କରିପାରିବ ନାହିଁ। ଯଦି ସାମରିକ ଭାବେ ଏହା କରିବାକୁ ତାଲିବାନ ଉଦ୍ୟମ କରେ ତେବେ ଦେଶରେ ଗୃହଯୁଦ୍ଧ ହେବ ବୋଲି ସେ ଚେତାବନୀ ଦେଇଛନ୍ତି।

ତାଲିବାନ ଉପରେ ପାକିସ୍ତାନ ଚାପ ସୃଷ୍ଟି କରୁଛି ବୋଲି ହେଉଥିବା ଅଭିଯୋଗକୁ ଖଣ୍ଡନ କରିବା ସହ ଇମ୍ରାନ କହିଛନ୍ତି ଏକ ସଖୀ କଣ୍ଢେଇ ସରକାର ଜରିଆରେ ଆଫଗାନିସ୍ତାନ ଚାଲିପାରିବ ନାହିଁ। ଠିକ୍ ପଥରେ ଯିବା ଲାଗି ହିଁ ତାଲିବାନକୁ ପରାମର୍ଶ ଦିଆଯାଇପାରିବ। ଆଫଗାନିସ୍ତାନ ବ୍ୟାପାରରେ ପାକିସ୍ତାନ ହସ୍ତକ୍ଷେପ କରିବା ନେଇ ଯେଉଁ ଚର୍ଚ୍ଚା ଚାଲିଛି ତାହା କପୋଳକଳ୍ପିତ। ଆଫଗାନିସ୍ତାନ ସରକାରରେ ହକାନି ନେଟଓ୍ୱର୍କକୁ ସାମିଲ କରିବା ଲାଗି ପାକିସ୍ତାନ ଚାପ ପକାଇଛି ବୋଲି ଯେଉଁ ଅଭିଯୋଗ ହେଉଛି ତାହା ବି ଭୁଲ।

ଦେଶରେ ମହିଳାଙ୍କ ଅଧିକାର କ୍ଷୁର୍ଣ୍ଣ ହେଉଛି ବୋଲି ଯେଉଁ ଅଭିଯୋଗ ହେଉଛି ସେ ସମ୍ପର୍କରେ ଇମ୍ରାନ କହିଛନ୍ତି ଆଫଗାନିସ୍ତାନର ଭବିଷ୍ୟତ ନେଇ କେହି ବି କିଛି ପ୍ରାକ୍ ଅନୁମାନ କରିପାରିବେ ନାହିଁ । ଦେଶରେ ତାଲିବାନ ନିଜ ନୀତି ଅନୁସାରେ ମାନବିକ ଅଧିକାର ପରିଚାଳନା କରୁଛି। ୧୯୬୨ରୁ ୨୦୦୧ ଯାଏଁ ସେମାନେ ଆନ୍ତର୍ଜାତିକ ଗ୍ରହଣୀୟତା ଦିଗରେ ପଦକ୍ଷେପ ନେଇ ନଥିଲେ।

ସେମାନେ ବାହ୍ୟ ଶକ୍ତି ଦ୍ୱାରା ପରିଚାଳିତ ହୋଇପାରନ୍ତି ନାହିଁ ବୋଲି ଇତିହାସ କହୁଛି। ଦେଶରେ କୌଣସି ସଖୀ କଣ୍ଢେଇ ସରକାର ଲୋକଙ୍କ ଦ୍ୱାରା ମମର୍ଥିତ ନୁହଁନ୍ତି। ତେଣୁ କେବଳ ସରକାର ପରିଚାଳନା ଦିଗରେ ତାଲିବାନକୁ ପରାମର୍ଶ ଦିଆଯିବା ବ୍ୟତୀତ ଅନ୍ୟ କିଛି କରାଯାଇପାରିବ ନାହିଁ।