ପାକିସ୍ତାନରେ ଇମ୍ରାନଙ୍କ ଦଳ ବେହାଲ,ନାହିଁ ନିର୍ବାଚନ ଚିହ୍ନ ନାହାନ୍ତି ନେତା

ଇସଲାମାବାଦ:  ବଢୁଛି ପାକିସ୍ତାନ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାଁଙ୍କ ଅଡୁଆ ।  ଗୋଟିଏ ପରେ ଗୋଟିଏ ସମସ୍ୟାର ସମ୍ମୁଖୀନ ହେଉଛନ୍ତି ଇମ୍ରାନ । ପ୍ରଥମେ ତାଙ୍କ ପାର୍ଟି ପିଟିଆର ନିର୍ବାଚନୀ ଚିହ୍ନ ନିର୍ବାଚନ ଆୟୋଗ ଛଡାଇ ନେଇଥିଲେ  । ଠିକ୍ ସେହିପରି ଏବେ ଇମ୍ରାନଙ୍କ ପାର୍ଟି ତହରିକ୍-ଏ- ଇନସାଫ ନେତୃତ୍ୱ ବିହୀନ ହୋଇ ପଡିଛି  ।

ଦୀର୍ଘ ସମୟ ଅପେକ୍ଷା ପରେ ଫେବୃଆରୀରେ ପାକିସ୍ତାନରେ ନିର୍ବାଚନ ଅନୁଷ୍ଠିତ ହେବାକୁ ଯାଉଛି । ଭୋଟ୍ ପାଇଁ ମଧ୍ୟ ଦୁଇ ମାସରୁ କମ୍ ସମୟ ବାକି ଅଛି | ଆଇନଗତ ମାମଲା ଏବଂ ଦଣ୍ଡ ଦ୍ୱାରା ଘେରି ରହିଥିବା ଇମ୍ରାନ ଖାନଙ୍କୁ ନିର୍ବାଚନ ପୂର୍ବରୁ ହିଁ ଦେଶର ନିର୍ବାଚନ ଆୟୋଗ ତାଙ୍କୁ ଏକ ବଡ଼ ଝଟକା ଦେଇଛନ୍ତି।  ଫେବୃଆରୀ ୮ରେ ହେବାକୁ ଥିବା ନିର୍ବାଚନ ପୂର୍ବରୁ ରବିବାର ପାକିସ୍ତାନର ନିର୍ବାଚନ ଆୟୋଗ ୧୭୫ ଟି ରାଜନୈତିକ ଦଳର ତାଲିକା ପ୍ରକାଶ କରିଛନ୍ତି।

ପଞ୍ଜୀକୃତ ରାଜନୈତିକ ଦଳ ଭାବରେ ଏହି ସମସ୍ତ ଦଳ ଆସନ୍ତା ନିର୍ବାଚନରେ ​​ଭାଗ ନେବେ। ଆଶ୍ଚର୍ଯ୍ୟର କଥା ଯେ, ପାକିସ୍ତାନ ତାହରିକ-ଏ-ଇନସାଫର ନେତା ହୋଇ ମଧ୍ୟ ଇମ୍ରାନ ଖାନଙ୍କ ନାମ ଏହି ତାଲିକାରେ ନାହିଁ। ଯଦି ପାକିସ୍ତାନ ନିର୍ବାଚନ ଆୟୋଗଙ୍କ ଅନୁଯାୟୀ ଦେଖିବାକୁ ଗଲେ ପିଟିଆଇ ବର୍ତ୍ତମାନ ଏକ ନେତୃତ୍ୱ ବିହୀନ ଦଳ ହୋଇ ରହିଯାଇଛି ।

ଏହାପୂର୍ବରୁ ଇମ୍ରାନ ଖାନଙ୍କ ପାର୍ଟି ପାକିସ୍ତାନ ତହରିକ-ଏ-ଇନସାଫ ନିଜ ନିର୍ବାଚନ ପ୍ରତୀକ ‘ବ୍ୟାଟ୍’ ହରାଇଛି।  ପିଟିଆଇରେ ଅନୁଷ୍ଠିତ ଆଭ୍ୟନ୍ତରୀଣ ନିର୍ବାଚନରେ ​​ନିର୍ବାଚନ ଆୟୋଗ ସନ୍ତୁଷ୍ଟ ନଥିଲେ, ଯାହାର ପରିଣାମରେ ସେ ଏହିପରି ନଷ୍ପତ୍ତି ନେଇଥିଲେ ।