୨୪ ଦିନ ପୂର୍ବରୁ ସୋସିଆଲ ମିଡ଼ିଆରେ ଇମ୍ରାନ କରିଥିଲେ ଶେଷ ପୋଷ୍ଟ, ମୁନିରଙ୍କୁ ନେଇ କହିଥିଲେ…
ନନ୍ଦିଘୋଷ ବ୍ୟୁରୋ: ପାକିସ୍ତାନର ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନ୍ ଜୀବିତ ଅଛନ୍ତି ନା ତାଙ୍କୁ ଜେଲ ଭିତରେ ହତ୍ୟା କରାଯାଇଛି । ସାରା ବିଶ୍ବରେ ତାଙ୍କୁ ହତ୍ୟା କରାଯାଇଥିବା ନେଇ ଚର୍ଚ୍ଚା ଜୋର ଧରିଛି । ଆଉ ଏହାରି ଭିତରେ ସୋସିଆଲ ମିଡିଆରେ ତାଙ୍କ ଦ୍ବାରା କରାଯାଇଥିବା ଶେଷ ପୋଷ୍ଟ ଏବେ ଚର୍ଚ୍ଚାର କାରଣ ପାଲଟିଛି । ଏହି ପୋଷ୍ଟରେ ସେ ପାକିସ୍ତାନ ସେନା ପ୍ରମୁଖ ଅସୀମ ମୁନିରଙ୍କୁ ନେଇ କହିଛନ୍ତି ବଡ଼ କଥା ।
ଏହି ପୋଷ୍ଟରେ ଇମ୍ରାନ ଖାନ୍ ମୁନିରଙ୍କୁ କଡ଼ା ଭାଷାରେ ଟାର୍ଗେଟ କରିଥିଲେ । ନଭେମ୍ବର ୪ ତାରିଖରେ ସୋସିଆଲ ମିଡ଼ିଆ ସାଇଟ ଏକ୍ସରେ ଇମ୍ରାନ ଏହି ପୋଷ୍ଟ କରିଥିଲେ ।
ମୁନିରଙ୍କୁ ନେଇ କ’ଣ ଲେଖିଥିଲେ ?
ଇମ୍ରାନଙ୍କ ଆକାଉଣ୍ଟରୁ କରାଯାଇଥିବା ଏହି ପୋଷ୍ଟରେ ଲେଖାଯାଇଥିଲା, ଅସୀମ ମୁନିର ପାକିସ୍ତାନ ଇତିହାସରେ ସବୁଠାରୁ ନିଷ୍ଠୁର ଏକଛତ୍ରବାଦୀ ଓ ମାନସିକ ସ୍ତରରେ ବିଚଳିତ ବ୍ୟକ୍ତି । ତାଙ୍କ ଶାସନ ସମୟରେ ଅତ୍ୟାଚାର ସୀମା ଟପିଛି । କ୍ଷମତା ଲୋଭରେ ମୁନିର କିଛି ବି କରିପାରିବେ । ସେ, ମୋତେ ଓ ମୋ ପତ୍ନୀଙ୍କୁ କ୍ଷତି ପହଞ୍ଚାଇବାକୁ ସବୁ ପ୍ରକାର ଚେଷ୍ଟା କରୁଛନ୍ତି ।
ମୃତ୍ୟୁକୁ ନେଇ ଚର୍ଚ୍ଚା କାହିଁକି ?
ଇମ୍ରାନଙ୍କ ଏହି ପୋଷ୍ଟ ପରେ ତାଙ୍କର କୌଣସି ଫଟୋ କି ଭିଡିଓ ଆସିନି । ଏପରିକି ତାଙ୍କୁ ସାର୍ବଜାନୀନ ଭାବେ ଦେଖିବାକୁ ବି ମିଳିନି । ଏମିତି ସ୍ଥିତିରେ ତାଙ୍କ ସ୍ବାସ୍ଥ୍ୟ ଓ ସୁରକ୍ଷାକୁ ନେଇ ଆଶଙ୍କା ବଢ଼ିବାରେ ଲାଗିଛି । ତାଙ୍କ ପୁଅ କାସିମ ଖାନ ଅଭିଯୋଗ କରିଛନ୍ତି, ଦୀର୍ଘ ସମୟ ହେବ ପରିବାର ଲୋକଙ୍କୁ ତାଙ୍କ ସହ ଭେଟ କରିବାକୁ ଅନୁମତି ଦିଆଯାଉନି । ତେଣୁ ସେ ଜୀବିତ ଥିବାର ପ୍ରମାଣ ମାଗିବାକୁ ଆମେ ବାଧ୍ୟ ହେଉଛୁ । ସେ ଆଡୁରି କହିଛନ୍ତି, ତାଙ୍କୁ ଏକ ଡେଥ୍ ସେଲରେ ରଖାଯାଇଛି । ତାଙ୍କ ସହ ଭେଟ କରିବା କଥା ଛାଡନ୍ତୁ, ପରିବାର ଲୋକଙ୍କୁ ଫୋନ କି ତାଙ୍କ ଦସ୍ତଖତ ଥିବା ନୋଟ ବି ଦିଆଯାଉନି । ସେପଟେ ଜେଲରେ ଇମ୍ରାନଙ୍କ ସହ ମାଡ଼ପିଟ କରାଯାଉଥିବା ଅଭିଯୋଗକୁ ପୋଲିସ ଅସ୍ବୀକାର କରିଛି । ଯାହାକୁ ନେଇ ତାଙ୍କର ବର୍ତ୍ତମାନ ସ୍ଥିତିକୁ ନେଇ ପ୍ରଶ୍ନ ଉଠିବାରେ ଲାଗିଛି ।
