ଟ୍ରାକରେ ଦୌଡୁଛି ରାଜ୍ୟ ଅର୍ଥନୀତି, ଆର୍ଥିକ ସୁପରିଚାଳନାକୁ IMF ୱାର୍ଲ୍ଡ ଇକୋନୋମିକ ଆଉଟଲୁକର ପ୍ରଶଂସା
1 min read
ଭୁବନେଶ୍ୱର: ବଢୁଛି ଜିଡିପି, ବଢୁଛି ମୁଣ୍ଡପିଛା ଆୟ । ସଠିକ୍ ଟ୍ରାକରେ ଦୌଡୁଛି ରାଜ୍ୟ ଅର୍ଥନୀତି । ଆସନ୍ତା ୫ ବର୍ଷରେ ରାଜ୍ୟରେ ଆହୁରି ଅର୍ଥନୈତିକ ବିକାଶ ହେବା ସହ ସାମଗ୍ରିକ ଘରୋଇ ଉତ୍ପାଦ ୨୫ ଟ୍ରିଲିୟନ ଛୁଇଁବ ବୋଲି ରାଜ୍ୟ ଅର୍ଥ ବିଭାଗ ଏଭଳି ଆକଳନ କରିଛି । କୋଭିଡ୍ ମହାମାରୀ ସତ୍ତ୍ୱେ ରାଜ୍ୟର ଅର୍ଥନୀତି ବିଶେଷ ପ୍ରଭାବିତ ହୋଇନି । ଏପରିକି ବିକଶିତ ରାଜ୍ୟ ତୁଳନାରେ ମଧ୍ୟ ରାଜ୍ୟର ଅର୍ଥନୈତିକ ଅଭିବୃଦ୍ଧି ଅଧିକ ରହିଛି । ଏଥିସହିତ ଆର୍ଥିକ ପରିଚାଳନାରେ ସଂସ୍କାର ଯୋଗୁଁ ରାଜ୍ୟରେ ମୁଦ୍ରାସ୍ଫୀତି ମଧ୍ୟ ନିୟନ୍ତ୍ରଣରେ ରହିଛି । ଆଇଏମ୍ଏଫ ୱାର୍ଲ୍ଡ ଇକୋନୋମିକ ଆଉଟଲୁକ୍ ମଧ୍ୟ ରାଜ୍ୟର ଆର୍ଥିକ ସୁପରିଚାଳନାକୁ ପ୍ରଶଂସା କରିଛି ।
ଦ୍ରୁତ ବିକାଶ ପଥରେ ଓଡ଼ିଶା । କୋଭିଡ୍ ମହାମାରୀ, ପ୍ରାକୃତିକ ବିପର୍ଯ୍ୟୟ, କେନ୍ଦ୍ର ଅବହେଳା ସତ୍ତ୍ୱେ ଏକାକୀ ଲଢ଼ି ବି ରାଜ୍ୟ ବିକାଶ ପଥରେ ଆଗେଇ ଚାଲିଛି । ବିଶ୍ୱର ୧୨୧ ରାଷ୍ଟ୍ର ତୁଳନାରେ ଓଡ଼ିଶାର ମୋଟ ଘରୋଇ ଉତ୍ପାଦ ଅଧିକ । ୨୦୨୧-୨୨ରେ ଓଡ଼ିଶାର ଜିଡିପି ୮୫.୭ ବିଲିୟନ ଡଲାର । ଆଇଏମଏଫ ୱାର୍ଲ୍ଡ ଇକୋନୋମିକ ଆଉଟଲୁକ୍ ଏଭଳି ଆକଳନ କରିଛି । ସେପଟେ ରାଜ୍ୟ ଅର୍ଥ ବିଭାଗର ଆକଳନ ଅନୁଯାୟୀ ଆସନ୍ତା ୫ ବର୍ଷରେ ରାଜ୍ୟ ଅର୍ଥନୀତି ୨୫ ଟ୍ରିଲିୟନ ଛୁଇଁବ ।
୨୦୨୧-୨୨ ବର୍ଷରେ ଓଡ଼ିଶାରେ ୧୦.୧ ପ୍ରତିଶତ ଜିଏସଡିପି ଅଭିବୃଦ୍ଧି ହାସଲ ହୋଇପାରିଛି । ୨୦୧୯-୨୦ ରୁ ୨୦୨୧-୨୨ ମଧ୍ୟରେ ଦେଶର ପ୍ରକୃତ ଜିଡିପିରେ ୬.୪ ପ୍ରତିଶତ ବୃଦ୍ଧି ପରିଲକ୍ଷିତ ହୋଇଥିବା ବେଳେ ଓଡିଶାର ୮.୧ ପ୍ରତିଶତ ଅଭିବୃଦ୍ଧି ହୋଇଛି । ସେହିଭଳି ମୁଣ୍ଡପିଛା ଆୟ ମଧ୍ୟ ବଢିଛି । ୨୦୧୨-୧୩ ରୁ ୨୦୨୧-୨୨ ମଧ୍ୟରେ ଓଡ଼ିଶାରେ ମୁଣ୍ଡପିଛା ଆୟରେ ହାରାହାରି ଅଭିବୃଦ୍ଧି ୧୦.୩ ପ୍ରତିଶତ ରହିଛି । ୨୦୧୧-୧୨ରେ ରାଜ୍ୟର ମୁଣ୍ଡପିଛା ଆୟ ୪୮ ହଜାର ୪୯୯ ଟଙ୍କା ରହିଥିବା ବେଳେ ୨୦୨୧-୨୨ରେ ଏହା ବୃଦ୍ଧି ପାଇ ୧ ଲକ୍ଷ ୨୭ ହଜାର ୩୮୩ ଟଙ୍କାରେ ପହଞ୍ଚିଛି ।
୨୦୨୧-୨୨ ରେ ଅର୍ଥନୀତିର ଦ୍ରୁତ ଅଭିବୃଦ୍ଧି ପାଇଁ ପୁଣି ଉତ୍ପାଦନ କ୍ଷେତ୍ରକୁ ଦାୟୀ କରାଯାଇଛି । ୨୦୨୧-୨୨ରେ ଏହି କ୍ଷେତ୍ର ୧୪.୩ ପ୍ରତିଶତ ବୃଦ୍ଧି ପାଇଛି । ଜାତୀୟ ସ୍ତରରେ ଉତ୍ପାଦନ କ୍ଷେତ୍ରରେ ଅଭିବୃଦ୍ଧି ୫.୫ ପ୍ରତିଶତ । ବେକାରୀ ହାର କମିବା ଏବଂ ମୁଦ୍ରାସ୍ଫୀତିରେ ଭାରସାମ୍ୟ ବଜାୟ ରହିବା ରାଜ୍ୟ ଅର୍ଥନୈତିକ ସୁପରିଚାଳନାର ଉଦାହରଣ ବୋଲି ବିଶେଷଜ୍ଞମାନେ କହିଛନ୍ତି ।
ଉଭୟ ଗ୍ରାମାଞ୍ଚଳ ଏବଂ ସହରାଞ୍ଚଳର ଶ୍ରମିକମାନେ କୃଷି ଠାରୁ ଶିଳ୍ପ କ୍ଷେତ୍ରକୁ ଟାଣି ହୋଇ ଆସିଛନ୍ତି । ଶିଳ୍ପ କ୍ଷେତ୍ରରେ ଗ୍ରାମାଞ୍ଚଳରେ ସମୁଦାୟ ରୋଜଗାରରେ ୯ ପ୍ରତିଶତରୁ ୨୬ ପ୍ରତିଶତକୁ ବୃଦ୍ଧି ପାଇଛି । ସହରାଞ୍ଚଳରେ ମଧ୍ୟ ସମାନ ବୃଦ୍ଧି ପରିଲକ୍ଷିତ ହେଉଛି ।
