ଦୁଇ ବର୍ଷ ପରେ ଫେସବୁକ ଓ ୟୁଟ୍ୟୁବକୁ ଫେରିଲେ ଡୋନାଲ୍ଡ ଟ୍ରମ୍ପ୍
1 min read
ଓ୍ୱାଶିଂଟନ: ଫେସବୁକ୍ ଓ ୟୁଟ୍ୟୁବକୁ ଫେରିଲେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲଡ ଟ୍ରମ୍ପ । ଗତ ୨୦୨୧ ଜାନୁଆରୀରେ ଓ୍ବାଶିଂଟନରେ ହଙ୍ଗାମା ସୃଷ୍ଟି କାରଣରୁ ତାଙ୍କୁ ହଟାଇ ଦେଇଥିଲେ ଦୁଇ କମ୍ପାନୀ । ତେବେ ଆଜି ଫେସବୁକକୁ ଫେରି I AM BACK! ବୋଲି ୧୨ ସେକଣ୍ଡର ଏକ ଭିଡିଓ କ୍ଲିପ ଜାରି କରିଛନ୍ତି ଟ୍ରମ୍ପ । ବିଭିନ୍ନ ବିବାଦୀୟ ବୟାନବାଜି କାରଣରୁ ତାଙ୍କୁ ଦୁଇ ବର୍ଷ ତଳେ ଫେସବୁକ ଓ ୟୁଟ୍ୟୁବରୁ ହଟାଇଦିଆଯାଇଥିଲା । ଫେସବୁକରେ ୭୬ ବର୍ଷ ବୟସ୍କ ରିପବ୍ଲିକାନ ନେତା ଟ୍ରମ୍ପଙ୍କ ୩୪ ନିୟୁତ ଫଲୋୟର୍ସ ରହିଥିବାବେଳେ ୟୁଟ୍ୟୁବରେ ରହିଛନ୍ତି ୨୬ ଲକ୍ଷ ଫଲୋୟର ।
ଗତ ୨୦୨୧ ଜାନୁଆରୀ ୬ରେ ଟ୍ରମ୍ପଙ୍କ ହଜାର ହଜାର ସମର୍ଥକ ଓ୍ବାଶିଂଟନସ୍ଥିତ କ୍ୟାପିଟଲ ସମ୍ମୁଖରେ ନାରାବାଜି କରିବା ସହ ରାଷ୍ଟ୍ରପତି ଭାବେ ବିଜୟୀ ହୋଇଥିବା ଜୋ ବାଇଡେନଙ୍କୁ ଅଯୋଗ୍ୟ ଘୋଷଣା ଲାଗି ଦାବି କରିଥିଲେ । ଏହି ଘଟଣାକୁ ନେଇ ଟ୍ରମ୍ପଙ୍କ ଟ୍ୱିଟର ଆକାଉଣ୍ଟକୁ ମଧ୍ୟ ବ୍ଲକ କରିଦିଆଯାଇଥିଲା । ଟ୍ୱିଟରରେ ତାଙ୍କ ଫଲୋୟରଙ୍କ ସଂଖ୍ୟା ରହିଥିଲା ୮୭ ନିୟୁତ । ତେବେ ଗତବର୍ଷ ନଭେମ୍ବରରେ ଏଲନ ମସ୍କଙ୍କ ନିର୍ଦ୍ଦେଶ କ୍ରମେ ତାଙ୍କୁ ଟ୍ୱିଟରରେ ଅନବ୍ଲକ କରାଯାଇଥିଲା । ଟ୍ରମ୍ପଙ୍କ ବୟାନବାଜିକୁ ବିରୋଧ କରି ଆମେରିକାନ ସିଭିଲ ଲିବର୍ଟିଜ ୟୁନିଅନ ପକ୍ଷରୁ ୪୦୦ରୁ ଅଧିକ ଲିଗାଲ ନୋଟିସ ଦିଆଯାଇଥିଲା ।
