‘ଓମିକ୍ରନରେ ମୃତ୍ୟୁ ହୋଇନି, ଭୟ କରନ୍ତୁ ନାହିଁ’

ଭୁବନେଶ୍ୱର:  ଓମିକ୍ରନ ନେଇ ଭୟଭୀତ ହେବାର ନାହିଁ । ଚିହ୍ନଟ ବ୍ୟକ୍ତିଙ୍କର ସ୍ବଳ୍ପ ଲକ୍ଷଣ ଦେଖାଦେଉଛି । ଓମିକ୍ରନରେ ଏଯାଏଁ କାହାରି ମୃତ୍ୟୁ ହୋଇନି । ରାଜ୍ୟରୁ 246 ଆକ୍ରାନ୍ତଙ୍କ ନମୁନା ଜିନମ ସିକ୍ୱେନ୍ସିଂ ଲାଗି ପଠାଯାଇଛି । ଏସବୁ ନମୁନା ବୁର୍ଲା, ମୟୁରଭଞ୍ଜ ସମେତ ବିଭିନ୍ନ କୋଭିଡ କ୍ଲଷ୍ଟରର ନମୁନା । କୌଣସି ବିଦେଶ ଫେରନ୍ତା ଓମିକ୍ରନ ଆକ୍ରାନ୍ତ ହୋଇଛନ୍ତି ନା ନାହିଁ, ଶୁକ୍ରବାର ଜଣା ପଡ଼ିବ ବୋଲି ଡିଏମଇଟି ଡାକ୍ତର ରମାରମଣ ମହାନ୍ତି କହିଛନ୍ତି ।

ଗତକାଲି ସନ୍ଧ୍ୟା ଯାଏଁ କୌଣସି ବିଦେଶ ଫେରନ୍ତା ପଜିଟିଭ ଚିହ୍ନଟ ହୋଇନାହାନ୍ତି । 6 ବିଦେଶ ଫେରନ୍ତା ପଜିଟିଭ ବାହାରିଥିବା ନେଇ ଯେଉଁ ଖବର ଆସୁଛି, ତାହା ତର୍ଜମା କରାଯାଉଛି । ସଂଧ୍ୟା ସୁଦ୍ଧା ଏନେଇ ସ୍ପଷ୍ଟ କରାଯିବ ବୋଲି ସ୍ବାସ୍ଥ୍ୟ ନିର୍ଦ୍ଦେଶକ କହିଛନ୍ତି । ଓମିକ୍ରନ ସଂକ୍ରମିତ ଦେଶରୁ ଫେରିଥିବା ଲୋକଙ୍କୁ ଠାବ କରିବାକୁ ଜିଲ୍ଲା ସ୍ତରରେ ମାଇକ୍ରୋ ଲେଭେଲରେ ପ୍ରଚେଷ୍ଟା ଜାରି ରହିଛି । ଓମିକ୍ରନ ପାଇଁ କରୋନା ଟିକା କାମ କରୁଛି ବୋଲି ସବୁ ବିଶେଷଜ୍ଞ କହିଛନ୍ତି ।

୧୮ ବର୍ଷରୁ କମ ପିଲାଙ୍କ ଟିକାକରଣ ଲାଗି ନିର୍ଦ୍ଦେଶ ଆସିନି । ନିର୍ଦ୍ଦେଶ ଆସିଲେ ଟିକା ଦେବାକୁ ଭିତ୍ତିଭୂମି ପ୍ରସ୍ତୁତ ଅଛି ବୋଲି ସ୍ବାସ୍ଥ୍ୟ ନିର୍ଦ୍ଦେଶକ ଡାକ୍ତର ବିଜୟ ମହାପାତ୍ର କହିଛନ୍ତି ।