ମାଳ ମାଳ ବେଆଇନ ପାଥୋ ଲ୍ୟାବ୍: ମୋଟା ଅଙ୍କର ଅର୍ଥ ଉପାର୍ଜନ କରି ମାଲିକ ମାଲେମାଲ

ମାଳ ମାଳ ବେଆଇନ ପାଥୋ ଲ୍ୟାବ୍ । ଖୋର୍ଦ୍ଧା ଜିଲ୍ଲା ଜଟଣୀ ବ୍ଲକରେ ଅଣ ସ୍ବୀକୃତିପ୍ରାପ୍ତ ପାଥୋ ଲ୍ୟାବ । ୨ଶହରୁ ଅଧିକ ବେଆଇନ ପାଥୋ ଲ୍ୟାବ୍ କରୁଛନ୍ତି ନମୁନା ପରୀକ୍ଷା । ଲୋକଙ୍କ ଜୀବନ ସହ ଖେଳୁଛନ୍ତି ଖେଳ । ମୋଟା ଅଙ୍କର ଅର୍ଥ ଉପାର୍ଜନ କରି ମାଲିକ ମାଲେମାଲ। ବର୍ଷ ବର୍ଷ ଧରି ନମୁନା ପରୀକ୍ଷା କରୁଛନ୍ତି ଅଣ- ସୀକୃତିପ୍ରାପ୍ତ ପାଥୋ ଲ୍ୟାବ । ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀଙ୍କୁ ସୂଚନା ଅଧିକାର ଆଇନ ଦ୍ୱାରା ମଗାଯାଇଥିବା ରିପୋର୍ଟ ଅନୁସାରେ, ଜଟଣୀ ସହରରେ ଏକ ମାତ୍ର ପାଥୋ ଲ୍ୟାବକୁ ସ୍ବୀକୃତି ମିଳିଛି। ତେବେ ଅବଶିଷ୍ଟ ପାଥୋ ଲ୍ୟାବ କିପରି ବେଆଇନ ଭାବେ ନମୁନା ପରୀକ୍ଷା କରୁଛନ୍ତି ତାକୁ ନେଇ ସୂଚନା ଅଧିକାର କର୍ମୀ ପ୍ରଶ୍ନ ଉଠାଇଛନ୍ତି।

ବର୍ଷ ବର୍ଷ ଧରି କିପରି ବିନା ସ୍ବୀକୃତିରେ ନମୁନା ପରୀକ୍ଷା ଚାଲିଛି ତାକୁ ନେଇ ଉଠିଛି ପ୍ରଶ୍ନ । ଜିଲ୍ଲା ସ୍ବାସ୍ଥ୍ୟ ବିଭାଗ ଏ ସଂପର୍କରେ କେମିତି ଜାଣୁନାହାଁନ୍ତି ? କାହା ଅନୁମତିରେ ଖୋଲିଛି ଏହି ଲ୍ୟାବ ? ଡାକ୍ତର କିପରି ଅଣସ୍ବୀକୃତିପ୍ରାପ୍ତ ନମୁନା ପରୀକ୍ଷା ଉପରେ ମେଡିସିନ ଲେଖୁଛନ୍ତି ତାକୁ ନେଇ ଉଦବେଗ ପ୍ରକାଶ ପାଇଛି। ଏ ସମ୍ପର୍କରେ CDMOଙ୍କୁ ପଚାରିବାରୁ ସେ କୌଣସି ଉତ୍ତର ଦେଇନଥିଲେ। ଅଣସ୍ବୀକୃତିପ୍ରାପ୍ତ ପାଥୋ ଲ୍ୟାବ ଉପରେ କେବେ ଜିଲ୍ଲା ସ୍ବାସ୍ଥ୍ୟ ବିଭାଗ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବ ତାକୁ ଅପେକ୍ଷା।