ଦୁର୍ଘଟଣା ସମୟରେ କାର ଏୟାରବ୍ୟାଗ୍ କାମ ନଦେଲେ କମ୍ପାନୀକୁ ଦେବାକୁ ହେବ କ୍ଷତିପୁରଣ
ନୂଆଦିଲ୍ଲୀ: ପୂର୍ବରୁ ଯଦିଓ କାରରେ ଏୟାରବ୍ୟାଗ୍ ଆସୁନଥିଲା ଏବେ କିନ୍ତୁ ନିରାପତ୍ତାକୁ ଦୃଷ୍ଟିରେ ରଖି ପ୍ରତ୍ୟେକ କାର୍ କମ୍ପାନୀ ଗାଡ଼ିରେ ଏୟାର ବ୍ୟାଗ୍ ବା ବେଲୁନ୍ ଦେଉଛନ୍ତି । ଏହାଦ୍ୱାରା ଜଣେ ବ୍ୟକ୍ତି ସହଜରେ ଦୁର୍ଘଟଣାରୁ ବର୍ତ୍ତିଯିବ । ଏହି ନିରାପତ୍ତାକୁ ଦୃଷ୍ଟିରେ ରଖି ଅକ୍ୱୋବର ୧ ତାରିଖରୁ ସମସ୍ତ ୬ ସିଟର ଗାଡ଼ିରେ ୬ଟି ଏୟାର ବ୍ୟାଗକୁ ବାଧ୍ୟତାମଳକ କରାଯିବ ବୋଲି କହିଛନ୍ତି ସରକାର । କିନ୍ତୁ ଏୟାରବ୍ୟାଗକୁ ନେଇ ଏକ ବଡ଼ ନିଷ୍ପତ୍ତି ଶୁଣାଇଛନ୍ତି ସୁପ୍ରିମକୋର୍ଟ । କୋର୍ଟ କହିଛନ୍ତିଯେ, ଯଦି କୌଣସି ଦୁର୍ଘଟଣାରେ ଏୟାରବ୍ୟାଗ୍ କାମ କରିବ ନାହିଁ ତେବେ କମ୍ପାନୀ ସମସ୍ତ କ୍ଷତିପୂରଣ ଭରଣ କରିବ ।
କୋର୍ଟ ଠିକ୍ ଏହିଭଳି ଏକ ମାମଲାରେ କାର ନିର୍ମାତା ହୁଣ୍ଡାଇକୁ କହିଛନ୍ତିଯେ, ଦୁର୍ଘଟଣାରେ ହୋଇଥିବା ଦୁର୍ଘଟଣା ପାଇଁ ଶୈଳେନ୍ଦ୍ର ଭଟ୍ଟନାଗର ନାମକ ଜଣେ ବ୍ୟକ୍ତିଙ୍କୁ ୩ ଲକ୍ଷ ଟଙ୍କା କ୍ଷତିପୂରଣ ଦେବେ । ଯେଉଁ ଦୁର୍ଘଟଣା ୨୦୧୭ ମସିହାରେ ହୋଇଥିଲା । ଶୈଳେନ୍ଦ୍ର ଭଟ୍ଟନାଗର ଅଗଷ୍ଟ ୨୦୧୫ରେ ହ୍ୟୁଣ୍ଡାଇର କ୍ରେଟା କିଣିଥିଲେ । ନଭେମ୍ବର ୨୦୧୭ରେ ତାଙ୍କର ଗାଡ଼ିରେ ଏକ ଦୁର୍ଘଟଣା ଘଟିଥିଲା । ଭଟ୍ଟନାଗର କଂଜ୍ୟୁମର ଫୋରମରେ ଏତଲା ଦେଇଥିଲେ । ତାଙ୍କ କହିବା ଥିଲା କ୍ରେଟାର ନିରାପତ୍ତା ଫିଚରକୁ ନଜରରେ ରଖି ସେ ଉକ୍ତ ଗାଡ଼ି କିଣିଥିଲେ । କିନ୍ତୁ ଦୁର୍ଘଟଣା ଘଟିଲା । ଦୁର୍ଘଟଣା ଘଟିବା ସ୍ୱଭାବିକ କଥା । କିନ୍ତୁ ଏୟାରବ୍ୟାଗ୍ କାମ କଲା ନାହିଁ । ଯାହାଦ୍ୱାରା ତାଙ୍କୁ ଗମ୍ଭୀର ଆଘାତ ଲାଗିଲା ।
କଂଜ୍ୟୁମର ଫୋରମର ଗୋଟିଏ ଆଦେଶରେ ଏହି ମାମଲା ସୁପ୍ରିମକୋର୍ଟରେ ପହଞ୍ଚିଗଲା । କୋର୍ଟ ଗାଡ଼ି କମ୍ପାନୀକୁ ଗାଡ଼ି ରିପ୍ଲେସ ପାଇଁ ଆଦେଶ ଦେଲେ । କମ୍ପାନୀର କହିବା ଥିଲା ଯେପର୍ଯ୍ୟନ୍ତ ସାମ୍ନାରୁ ଶକ୍ତ ଝଟକା ନଲାଗିଛି ଏୟାରବ୍ୟାଗ୍ କାମ କରେ ନାହିଁ । କିନ୍ତୁ କୋର୍ଟ କହିଲେ, ଗ୍ରାହକ ଫିଜିକ୍ସର ବିଶେଷଜ୍ଞ ନୁହଁନ୍ତି । ତେଣୁ କୌଣସି ଘଟଣାରେ ବ୍ୟାଗ ଏବଂ ତା’ର ଶକ୍ତି ବିଷୟରେ ଆକଳନ କରିବା ଅସମ୍ଭବ ।
