ନୂଆଦିଲ୍ଲୀ: ଦିଲ୍ଲୀ ଏମ୍ସର ସର୍ଭର ହ୍ୟାକକୁ କିଛିଦିନ ବିତିଯାଇଛି, ହେଲେ ଏବେ ବି ସମ୍ପୂର୍ଣ୍ଣ ଭାବେ ତାହା ସଚଳ ହୋଇ ପାରିନାହିଁ । ଏହା ଉପରେ ଏବେ ବି କାର୍ଯ୍ୟ ଜାରି ରଖିଛନ୍ତି ସାଇବର ଏକ୍ସପର୍ଟ । ଏହାରି ମଧ୍ୟରେ ହ୍ୟାକର ଆଉ ଏକ ସରକାରୀ ସଂସ୍ଥାକୁ ଟାର୍ଗେଟ କରିଛନ୍ତି । ଇଣ୍ଡିଆନ କାଉନ୍ସିଲ ଅଫ୍ ମେଡିକାଲ ରିସର୍ଚ୍ଚ (ଆଇସିଏମଆର)ର ୱେବସାଇଟ୍ ଉପରେ ସାଇବର ଆଟାକ୍ ହୋଇଛି ।
ରାଷ୍ଟ୍ରୀୟ ସୂଚନା ବିଜ୍ଞାନ କେନ୍ଦ୍ର (ଏନଆଇସି)ର ଏକ ସରକାରୀ ଅଧିକାରୀ କହିଛନ୍ତି, ୩୦ ନଭେମ୍ବରରେ ସାଇବର ହ୍ୟାକର୍ସ ୨୪ ଘଣ୍ଟା ଅବଧିରେ ଇଣ୍ଡିଆନ କାଉନ୍ସିଲ ଅଫ୍ ମେଡିକାଲ ରିସର୍ଚ୍ଚ (ଆଇସିଏମଆର୍)ର ୱେବସାଇଟ୍ ଉପରେ ୬ହଜାରରୁ ଅଧିକ ଥର ଆଟାକ୍ କରିବାକୁ ଉଦ୍ୟମ କରିଛନ୍ତି । ଆକ୍ରମଣକାରୀଙ୍କ ସମ୍ପର୍କରେ ପଚରାଯିବାରୁ ଅଧିକାରୀ କହିଛନ୍ତି, ଆଇସିଏମଆର୍ ୱେବସାଇଟ୍ ଉପରେ ଆକ୍ରମଣର ସିରିଜ୍ ହଙ୍ଗକଙ୍ଗ ସ୍ଥିତ ବ୍ଲାକ୍ ଲିଷ୍ଟେଡ ଆଇପି ଆଡ୍ରେସ ୧୦୧.୧୫୨.୨୨୦.୧୩୩ ସହ କରାଯାଇଥିଲା ।
ଅଧିକାରୀ କହିଛନ୍ତି, ସାଇବର୍ ଆଟାକ୍ ଷଡଯନ୍ତ୍ର କରୁଥିବା ହ୍ୟାକର୍ସ ହ୍ୟାକ କରିବାରେ ସଫଳ ହୋଇପାରି ନାହାନ୍ତି । ତାଙ୍କୁ ଅଟକାଇ ଦିଆଯାଇଥିଲା । ଆମେ ଆମର ଟିମକୁ ଏହି ସମ୍ପର୍କରେ ଆଲର୍ଟ ମଧ୍ୟ କରିଦେଇଛୁ । ଯଦି ଫାୟାରବଲରେ କିଛି ତ୍ରୁଟି ରହିଥାନ୍ତା, ତେବେ ଆକ୍ରମଣକାରୀ ୱେବସାଇଟର ସୁରକ୍ଷାରେ ଘାତ ଲଗାଇବାରେ ସଫଳ ହୋଇଥାନ୍ତେ । ସରକାରୀ ସଂଗଠନର ଅପରେଟିଂ ସିଷ୍ଟମର ସୁରକ୍ଷା ପ୍ୟାଚକୁ ଅପଡେଟ କରାଇବାର ପରାମର୍ଶ ଦିଆଯାଇଛି ।
ଅଧିକାରୀ କହିଛନ୍ତି ସ୍ୱାସ୍ଥ୍ୟ ସଂଗଠନରେ ରୋଗୀ ସୂଚନା ପ୍ରଣାଳୀ ହ୍ୟାକର୍ସଙ୍କ ପାଇଁ ସମ୍ଭାବିତ ଟାର୍ଗେଟ ମଧ୍ୟରୁ ଗୋଟିଏ । ୨୦୨୦ରୁ ସ୍ୱାସ୍ଥ୍ୟ ସଂଗଠନର ବେୱସାଇଟ ଉପରେ ଆକ୍ରମଣ ବଢ଼ିଯାଇଛି । ଦିଲ୍ଲୀ ସ୍ଥିତ ଅଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥା (ଏମ୍ସ)ର ସର୍ଭର ଗତ କିଛି ଦିନ ହେବ ଠପ୍ ରହିଛି । ଯାଞ୍ଚରେ ଦିଲ୍ଲୀ ପୋଲିସର ସାଇବର ସେଲ୍ ଇପ୍ସୋ ଲାଗିଛି ।
