ICC T20 World Cup: ନ୍ୟୁଜିଲାଣ୍ଡ-ଅଷ୍ଟ୍ରେଲିଆ ମଧ୍ୟରେ ଟାଇଟଲ୍ ଲଢ଼େଇ

ଦୁବାଇ: ଆଜି ଟି-୨୦ ବିଶ୍ୱକପର ଫାଇନାଲ୍ ଫାଇଟ୍ । ଟାଇଟଲ୍ ପାଇଁ ହେବ ଜୋରଦାର ଲଢ଼େଇ । ସୁପର ସଣ୍ଡେରେ ହେବ ସୁପର୍ ଟକ୍କର । ସନ୍ଧ୍ୟା ୭ଟା ୩୦ରେ ମୁହାଁମୁହିଁ ହେବେ ନ୍ୟୁଜିଲାଣ୍ଡ ଓ ଅଷ୍ଟ୍ରେଲିଆ । ଟ୍ରଫି ହାତେଇବା ପାଇଁ ଉଭୟ ଦଳଙ୍କ ମଧ୍ୟରେ ହେବ କାଣ୍ଟେକି ଟକ୍କର । ବ୍ୟାଟିଂ ଲାଇନ୍ ଉପରେ ଅଧିକ ଭରସା କରିବ କିୱି ଟିମ୍ । ଓପନର ମାର୍ଟିନ ଗୁପତିଲ୍, ଅଧିନାୟକ ୱିଲିୟମସନ୍, ମିଚେଲ, ଗ୍ଲେନ୍ ଫିଲିପ୍ସଙ୍କ ଉପରେ ରହିବ ଗୁରୁ ଦାୟିତ୍ୱ । ଟିମ୍ ସାଉଥି, ଟ୍ରେଣ୍ଟ ବୋଲ୍ଟ  ଓ ସୋଡି ସମ୍ଭାଳିବେ ବୋଲିଂ ଭାର ।

ସେପଟେ କଙ୍ଗାରୁ ଦଳର ଦୁଇ ଓପନର ଆରୋନ୍ ଫିଞ୍ଚ ଓ ଡେଭିଡ୍ ୱାର୍ଣ୍ଣରଙ୍କ ସହ ସ୍ମିଥ, ଷ୍ଟୋନିସ୍, ମାଥ୍ୟୁ ୱାଡେ ଓ ମାକ୍ସୱେଲଙ୍କ ଉପରେ ରହିବ କ୍ରିକେଟପ୍ରେମୀଙ୍କ ନଜର । ବୋଲିଂରେ ମିଚେଲ୍ ଷ୍ଟାର୍କ, ଆଡାମ ଜାମ୍ପା, ଜୋସ ହାଜେଲଉଡଙ୍କ ଉପରେ ଭରସା କରିବ ଦଳ । ନ୍ୟୁଜିଲାଣ୍ଡ ବିପକ୍ଷରେ ମ୍ୟାଚ୍ ଜିତିବା ଅଷ୍ଟ୍ରେଲିଆ ପାଇଁ ଏତେଟା ସହଜ ହେବନି । ଟି-୨୦ ବିଶ୍ୱକପରେ ବ୍ଲାକ୍ କ୍ୟାପକୁ ଆଦୌ ବି ପରାସ୍ତ କରିନି କଙ୍ଗାରୁ ଦଳ ।

ପୂର୍ବରୁ ଖେଳା ଯାଇଥିବା ଟି-୨୦ ବିଶ୍ୱକପରେ ଅଷ୍ଟ୍ରେଲିଆକୁ ହରାଇ ସାରିଛି ନ୍ୟୁଜିଲାଣ୍ଡ । ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ମଧ୍ୟରେ ମୋଟ ୧୪ଟି ଟି-୨୦ ମ୍ୟାଚ୍ ଖେଳା ଯାଇଛି । ଏଥି ମଧ୍ୟରୁ ଅଷ୍ଟ୍ରେଲିଆ ୯ଟିରେ ବିଜୟ ହାସଲ କରିଥିବା ବେଳେ ନ୍ୟୁଜିଲାଣ୍ଡ ୫ଟିରେ ବାଜିମାତ୍ କରିଛି । ଉଭୟ ଟିମ ଏ ପର୍ଯ୍ୟନ୍ତ ଟି-୨୦ ବିଶ୍ୱକପ୍ ଟାଇଟଲ ହାତେଇ ନଥିବାରୁ ଏଥର ନୂତନ ବିଜେତା ଦେଖିବାକୁ ମିଳିବ ।