ଅଫିସରେ ୫୦ ମିନଟ ଛିଡ଼ା ହୋଇଥିଲେ ବୃଦ୍ଧ ଦମ୍ପତି, ଆଇଏଏସ ଅଧିକାରୀ ପୁରା ଅଫିସକୁ ୩୦ ମିନିଟ୍ ଛିଡ଼ା କରାଇଲେ

ରୋଚକ ଘଟଣା, ବିରଳ ଦୃଶ୍ୟ। ଏବେ ସବୁଠି ଗୋଟିଏ ଚର୍ଚ୍ଚା IAS ହେବ ତ ଏମିତି। ଏମିତି କାମ କଲେ ଯେ,ସବୁଠି ମିଳୁଛି ପ୍ରଶଂସା। ଯିଏ ଶୁଣିଛି ସିଏ କହୁଛି ସାବସ୍‌ IAS ବାବୁ। ନିଜ ସମସ୍ୟାର ସମାଧାନ ନିମନ୍ତେ ବୃଦ୍ଧ ଦମ୍ପତି ସରକାରୀ କାର୍ଯ୍ୟାଳୟ ଦୌଡ଼ି ଦୌଡ଼ି ନୟାନ୍ତ ହେଉଥିଲେ। ଘଣ୍ଟା ଘଣ୍ଟା ଧରି ଛିଡ଼ା ହୋଇ ଗୁହାରୀ କଲେ ବି ହେଉନଥିଲା ସମାଧାନ । ଅଧିକାରୀମାନେ ବୃଦ୍ଧ ଦମ୍ପତିଙ୍କ ସମସ୍ୟାକୁ କର୍ଣ୍ଣପାତ ବି କଲେନି। ସିସିଟିଭିରେ ଏହା ଦେଖୁଥିବା IAS ଅଧିକାରୀ ଜଣକ ଶେଷରେ ନିଜ କର୍ମଚାରୀଙ୍କୁ ଶୁଣାଇଲେ ଏମିତି ଦଣ୍ତ। ଯିଏ ଶୁଣୁଛି, ସିଏ ହେଉଛି ଆଶ୍ଚର୍ଯ୍ୟ ଚକିତ। ଅଫିସ୍‌ କର୍ମଚାରୀଙ୍କୁ ଅଧ ଘଣ୍ଟା ପର୍ଯ୍ୟନ୍ତ ଛିଡ଼ା ହୋଇ କାମ କରିବାକୁ ଦେଲେ ନିର୍ଦ୍ଦେଶ। ଶେଷରେ ଠିଆ ହୋଇ କାମ କଲେ କର୍ମଚାରୀ।

ଏପରି ଏକ ରୋଚକ ଘଟଣା ଘଟିଛି ଉତ୍ତରପ୍ରଦେଶର ନୋଏଡାରେ। ଏକ ବୟସ୍କ ଦମ୍ପତି ନିଜ ସମସ୍ୟାର ସମାଧାନ ଆଶାରେ ନୋଏଡା କର୍ତ୍ତୃପକ୍ଷଙ୍କ ଆବାସିକ ଭୂଖଣ୍ଡ ବିଭାଗ କାର୍ଯ୍ୟାଳୟରେ ପହଞ୍ଚିଥିଲେ। ସେଠାରେ ଘଣ୍ଟା ଘଣ୍ଟା ଛିଡ଼ା ହୋଇ ଅପେକ୍ଷା କରିବା ସତ୍ତ୍ୱେ କେହି ସେମାନଙ୍କ ସମସ୍ୟା ଶୁଣିଲେ ନାହିଁ। ନିଜ କାର୍ଯ୍ୟାଳୟରେ ଲାଗିଥିବା ସିସିଟିଭିରେ ନୋଏଡା ପ୍ରାଧିକରଣ ସିଇଓ ଲୋକେଶ ଏମ୍‌ ଏହା ଦେଖିଥିଲେ। ଏ ନେଇ ସେ ଗଭୀର ଅସନ୍ତୋଷ ପ୍ରକାଶ କରିବା ସହ ତୁରନ୍ତ ସେମାନଙ୍କ ସମସ୍ୟା ସମାଧାନ କରିବାକୁ ନିର୍ଦ୍ଦେଶ ଦେଇଥିଲେ।

କିଛି ସମୟ ପରେ ସିଇଓ ପୁଣି ଥରେ ସିସିଟିଭି ଯାଞ୍ଚ କରି ବୃଦ୍ଧ ଦମ୍ପତି ପୂର୍ବ ପରି ଛିଡ଼ା ହୋଇଥିବା ଦେଖିବାକୁ ପାଇଥିଲେ। ଏହାଦେଖି  ନିଜ କାର୍ଯ୍ୟାଳୟରେ ପହଞ୍ଚି ଅଧିକାରୀ ଓ କର୍ମଚାରୀଙ୍କୁ ତାଗିଦ କରିଥିଲେ ସିଇଓ ଲୋକେଶ । ଏଥିସହ ତୁରନ୍ତ  ଛିଡ଼ା ହୋଇ ଅଧ ଘଣ୍ଟା ପର୍ଯ୍ୟନ୍ତ କାମ କରିବାକୁ କାର୍ଯ୍ୟାଳୟରେ ଉପସ୍ଥିତ ସମସ୍ତ ଅଧିକାରୀ ଓ କର୍ମଚାରୀଙ୍କୁ ନିର୍ଦ୍ଦେଶ ଦେଇଥିଲେ।

ଏନେଇ ସେ କହିଥିଲେ, ‘ଆପଣମାନେ ନିଜେ ଛିଡ଼ା ହୋଇ କାମ କଲେ ବୟସ୍କ ଦମ୍ପତିଙ୍କ କଷ୍ଟ ବୁଝିପାରିବେ। ଏହାପରେ କେବେ ବି ଏପରି ଭୁଲ୍‌ କରିବେ ନାହିଁ।  ସିଇଓଙ୍କ ଏପରି ନିର୍ଦ୍ଦେଶ ପରେ କର୍ମଚାରୀମାନେ ନିଜ ନିଜ ସିଟ୍‌ ପାଖରେ ଛିଡ଼ା ହୋଇ କାମ କରିଥିଲେ। ଏହାର ଭିଡିଓ ଏବେ ସୋସିଆଲ ମିଡିଆରେ ବେଶ୍‌ ଭାଇରାଲ ହେବାରେ ଲାଗିଛି।