ନାବାଳିକା ଝିଅକୁ ଦୁଷ୍କର୍ମ ପରେ ହତ୍ୟା କରି ଶବ ସହ ଫେରାର୍ ହେଉଥିଲେ ଦମ୍ପତି

ପୁନେ: ବାପାମାଆ… ସବୁ ସନ୍ତାନ ସନ୍ତତିଙ୍କ ମଙ୍ଗଳ ଚାହାନ୍ତି । ଛୁଆକୁ କିଏ ଟିକେ କ’ଣ କହିଲେ ବାପାମାଆଙ୍କ ଦେହ ସହେନି । ସେମାନେ ଛୁଆକୁ ରକ୍ଷା କରିବାକୁ ଆଗେଇ ଆସନ୍ତି । ହେଲେ ମହାରାଷ୍ଟ୍ରରେ ହାଇଦ୍ରାବାଦର ଦମ୍ପତି ଘଟାଇଥିବା କାଣ୍ଡ ସମସ୍ତଙ୍କୁ ବିସ୍ମିତ କରିଛି । ଏଠି ନାବାଳିକା ଝିଅର ଶବ ସହ ଟ୍ରେନରେ ଯାତ୍ରା ଦୀର୍ଘ ୬ ଘଣ୍ଟାରୁ ଅଧିକ ସମୟ ଯାତ୍ରା କରିଛନ୍ତି ଦମ୍ପତି ।

ଟ୍ରେନରେ ଥିବା ଯାତ୍ରୀଙ୍କ ଅଭିଯୋଗ ପରେ ହାଇଦ୍ରାବାଦର ଦମ୍ପତିଙ୍କୁ ମହାରାଷ୍ଟ୍ରର ସୋଲାପୁର ରେଲୱେ ଷ୍ଟେସନରୁ ଗିରଫ କରାଯାଇଛି । ନାବାଳିକା ଝିଅକୁ ଦୁଷ୍କର୍ମ ପରେ ହତ୍ୟା କରି ଗିରଫ ଦମ୍ପତି ରାଜସ୍ଥାନ ନେଇ ଫେରାର୍ ହେଉଥିଲେ । ରାଜସ୍ଥାନ ଯିବା ପାଇଁ ସେମାନେ ସିକନ୍ଦରାବାଦ-ରାଜକୋଟ ଏକ୍ସପ୍ରେସରେ ଚଢ଼ିଥିଲେ । ଆଉ ଯାତ୍ରା ଆରମ୍ଭରୁ ଝିଅଟି ଶୋଇ ରହିଥିବାରୁ ସନ୍ଦେହ କରିଥିଲେ ସହଯାତ୍ରୀ ।

ପ୍ରାୟ ୬ ଘଣ୍ଟା ଧରି ଝିଅଟି ଶରୀରର ଅଚଳାବସ୍ଥା ଦେଖି ଅନ୍ୟ ଯାତ୍ରୀ ରେଲୱେ ପୋଲିସକୁ ଜଣାଇଥିଲେ । ଯାହାପରେ ଜିଆରପି, ସୋଲାପୁର ପୋଲିସକୁ ଆର୍ଲଟ କରିଥିଲା । ପୋଲିସ ଟ୍ରେନରୁ ମୃତଦେହ ଜବତ କରିବା ସହ ଦମ୍ପତିଙ୍କୁ ଗିରଫ କରିଛି । ପୋଲିସ ସୂଚନା ଅନୁସାରେ, ନାବାଳିକାର ବାପା ପ୍ରଥମେ ଝିଅକୁ ଦୁଷ୍କର୍ମ କରିବା ପରେ ଗଳା ଚିପି ହତ୍ୟା କରିଛି ।

ଝିଅକୁ ଦୁଷ୍କର୍ମ, ହତ୍ୟା ପରେ ସ୍ତ୍ରୀ ଓ ପୁଅକୁ ଧମକାଇ ପ୍ରମାଣ ନଷ୍ଟ ପାଇଁ ରାଜସ୍ଥାନ ପୈତୃକ ଘରକୁ ନେଇ ଯାଉଥିଲା ସୈତାନ । ଏନେଇ ରେଲୱେ ପୋଲିସରେ ଏକ ମାମଲା ରୁଜୁ କରାଯାଇଛି । ଜିଆରପି ମାମଲାକୁ ହାଇଦ୍ରାବାଦ ପୋଲିସକୁ ହସ୍ତାନ୍ତ କରିଥିବା ବେଳେ ତଦନ୍ତ ଜାରି ରହିଛି ।