ସ୍ତ୍ରୀ କଳା ବୋଲି ଘରୁ ତଡ଼ିଦେଲା ସ୍ବାମୀ, ଥାନାର ଦ୍ବାରସ୍ଥ ହେଲେ ମହିଳା

ପାଟକୁରା : ସ୍ତ୍ରୀ କଳା ବୋଲି ମାଡ଼ମାରି ଘରୁ ତଡ଼ିଦେଲା ସ୍ବାମୀ । ଥାନାରେ ଅଭିଯୋଗ କଲେ ମହିଳା ।  କେନ୍ଦ୍ରାପଡ଼ା ଜିଲ୍ଲା କୁଦାନଗରୀ ଥାନା ଚାଞ୍ଚଳ ଗାଁରେ ଘଟିଛି ଏଭଳି ଅଭାବନୀୟ ଘଟଣା । ଅଭିଯୋଗ ଅନୁସାରେ, ଗତ ଜୁଲାଇ ମାସରେ କିଶୋର ଦଳାଇ ଭଦ୍ରେଶ୍ୱର ଥାନା ଅଞ୍ଚଳର ଜଣେ ମହିଳାଙ୍କୁ ବିବାହ କରିଥିଲେ । ବାପାମାଆଙ୍କ ପସନ୍ଦ ଅନୁସାରେ ବିବାହ କରିଥିଲେ କିଶୋର । ହେଲେ ସ୍ତ୍ରୀ କଳା ହୋଇଥିବାରୁ ବିବାହ ପରଠୁ କିଶୋର ତାଙ୍କୁ ଘୃଣା କରିବା ଆରମ୍ଭ କରିଥିଲେ । ବାରମ୍ବାର ସ୍ତ୍ରୀଙ୍କୁ କଳା ଓ ଅସୁନ୍ଦର କହି ନିର୍ଯାତନା ଦେଉଥିଲେ । ଅନେକ ସମୟରେ ମାଡ଼ ମଧ୍ଯ ମାରିଥିବା ଅଭିଯୋଗ ହୋଇଛି । ଦୁଇଦିନ ତଳେ ପୁଅର ପ୍ରରୋଚନାରେ ଶାଶୂଶ୍ବଶୁର ମଧ୍ଯ ବୋହୂକୁ ମାଡ଼ମାରି ଘରୁ ବାହାର କରିଦେଇଥିଲେ । ଏନେଇ ମହିଳା ଥାନାରେ ଅଭିଯୋଗ କରି ନ୍ଯାୟ ମାଗିଛନ୍ତି । ବିବାହ ଏକ ପବିତ୍ର ସମ୍ପର୍କ । ହୋମ ନିଆଁ ଆଗରେ ହାତଗଣ୍ଠି ଓ ସାତଘେରା ସାତଜନମ ସମ୍ପର୍କର ସାକ୍ଷୀ । ହେଲେ ସ୍ତ୍ରୀ କଳା ହେଲା ବୋଲି ସ୍ବାମୀ ଘରୁ ତଡ଼ିଦେବା ଯେତିକି ନିନ୍ଦନୀୟ ସେତିକି ପ୍ରଶ୍ନବାଚୀ । ପ୍ରଶ୍ନ ଉଠୁଛି ସ୍ତ୍ରୀଙ୍କୁ ବିବାହ କରିବା ଆଗରୁ ଦେଖିନଥିଲେ କି କିଶୋର ? ଯଦି ଦେଖିଥିଲେ ସେତେବେଳେ କାହିଁକି ବିବାହ ପାଇଁ ମନା କରିନଥିଲେ ? ବାହାଘର ଆଗରୁ ବାପାମାଆ ପୁଅକୁ ଝିଅ ପସନ୍ଦ କି ନାହିଁ ପଚାରିନଥିଲେ କି ? ପୁଅ ଯଦି ରାଜି ନଥିଲା ତେବେ କାହିଁକି ବାଧ୍ଯକରି ବିବାହ କରାଯାଇଥିଲା ? ଗୋଟିଏ ଝିଅର ଜୀବନ ନଷ୍ଟ କାହିଁକି କରାଗଲା ବୋଲି ପ୍ରଶ୍ନ ଉଠିଛି? ତେବେ ଏନେଇ ପୁଅପକ୍ଷର ପ୍ରତିକ୍ରିୟା ମିଳିପାରିନି ।