ସ୍ତ୍ରୀକୁ ହାଣି ପୋତିବା ବେଳେ ଧରାପଡ଼ିଲା ସ୍ବାମୀ

କାମାକ୍ଷାନଗର: ସ୍ତ୍ରୀକୁ ଟାଙ୍ଗିଆରେ ହାଣି ହତ୍ୟା କରିବା ପରେ ଜଙ୍ଗଲରେ ପୋତୁଥିବା ବେଳେ ଧରାପଡିଲା ସ୍ବାମୀ । ଗ୍ରାମବାସୀଙ୍କଠାରୁ ଖବର ପାଇ ପୋଲିସ ଘଟଣା ସ୍ଥଳରେ ପହଞ୍ଚି ଶବ ଜବତ କରିବା ସହ ଅଭିଯୁକ୍ତ ସ୍ବାମୀଙ୍କୁ ଅଟକ ରଖି ପଚରାଉଚରା କରୁଛି ।

ମହାବିରୋଡ଼ ଥାନା ମଝିକା ଗାଁରେ ଏହି ବିଭତ୍ସ ହତ୍ୟାକାଣ୍ଡ ଘଟିଛି । ମୃତ ମହିଳା ଜଣକ ମଝିକା ଗାଁର ଝୁମୁରି ଦେହୁରୀ । ଗତକାଲି ବିଳମ୍ବିତ ରାତିରେ କୌଣସି କାରଣରୁ ଜଗା, ପତ୍ନୀ ଝୁମୁରିଙ୍କୁ ଟାଙ୍ଗିଆରେ ହାଣି ହତ୍ୟା କରିଥିଲା । ପରେ ମୃତଦେହକୁ ଘର ପାଖ ଜଙ୍ଗଲକୁ ନେଇ ଗାତ ଖୋଳି ପୋତିବା ପାଇଁ ଉଦ୍ୟମ କରୁଥିବା ବେଳେ ଗ୍ରାମବାସୀ ଦେଖିଥିଲେ । ଏନେଇ ଗ୍ରାମବାସୀ ପୋଲିସକୁ ଖବର ଦେଇଥିଲେ । ଖବର ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହକୁ ଜବତ କରିବା ସହ ଅଭିଯୁକ୍ତ ସ୍ୱାମୀଙ୍କୁ ଅଟକ ରଖିଛି । ତେବେ କେଉଁ କାରଣକୁ ନେଇ ଜଗା ନିଜ ସ୍ତ୍ରୀକୁ ଏଭଳି ବିଭତ୍ସ ଭାବେ ହତ୍ୟା କରିଛି ତାହାର କାରଣ ଅସ୍ପଷ୍ଟ ରହିଛି l