ସ୍ତ୍ରୀର ଅଭିଯୋଗ ପରେ ବାହା ବେଦୀରୁ ଗିରଫ ହେଲା ସ୍ୱାମୀ
ଭୁବନେଶ୍ୱର: ସ୍ତ୍ରୀ ଥାଉ ଥାଉ ଅନ୍ୟ ମହିଳାଙ୍କୁ ବିବାହ କରିବା ମହଙ୍ଗା ପଡ଼ିଛି । ଭୁବନେଶ୍ୱର ନୟାପଲ୍ଲୀ ଅଞ୍ଚଳରେ ବନ୍ଧା ହୋଇଛି ବର । ଗତ ୬ ବର୍ଷ ତଳେ ଯାଜପୁର ଜିଲ୍ଲା ସାଇକ ଗାଁର ଦିଲୀପ କୁମାର ରାଉତ ଜଣେ ମହିଳାଙ୍କୁ ଜଟଣୀ ଠାରେ ବିବାହ କରିଥିଲେ । ବିବାହ ପରେ ସାଲିଆସାହିରେ ଥିବା ଏକାମ୍ରଭିଲ୍ଲାରେ ରହୁଥିଲେ । ଉଭୟଙ୍କ ୫ ବର୍ଷର ଏକ କନ୍ୟା ସନ୍ତାନ ଅଛି । ଗତ କିଛିଦିନଠାରୁ ମହିଳାଙ୍କୁ ଯୌତୁକ ଦାବି କରି ଶାଶୂ ଶ୍ୱଶୁର ଓ ଦିଅରଙ୍କ ସହ ମିଶି ନିର୍ଯାତନା ଦେଇ ଆସୁଥିଲେ ଦିଲୀପ ।
ଏପରିକି ବାପ ଘରୁ ଟଙ୍କା ସୁନା ନଆଣିଲେ ଜୀବନରୁ ମାରି ଦେବାକୁ ଧମକ ଦେଇଥିଲେ । ଏହାକୁ ବିରୋଧ କରି ମହିଳା ଜଣକ ବାପ ଘରକୁ ଚାଲି ଯାଇଥିଲେ । ହେଲେ ଦିଲ୍ଲୀପ ଏପ୍ରିଲ୍ ୨୪ ତାରିଖରେ ଆଉ ଜଣେ ମହିଳାଙ୍କୁ ବିବାହ କରୁଥିବା ଖବର ପାଇଁ ନୟାପଲ୍ଲୀ ଥାନାରେ ଅଭିଯୋଗ କରିଥିଲେ ପ୍ରଥମ ସ୍ତ୍ରୀ । ଏହି ଅଭିଯୋଗ ଆଧାରରେ ଦିଲୀପଙ୍କୁ ଗିରଫ କରିଛି ନୟାପଲ୍ଲୀ ପୋଲିସ ।
