ବେସରକାରୀ କୋଭିଡ୍ ଚିକିତ୍ସା ସେବା ପାଇଁ କେତେ ଦେଉଛନ୍ତି ସରକାର, ଜାଣନ୍ତୁ କେଉଁ ବାବଦକୁ କେତେ ଖର୍ଚ୍ଚ …….

ଭୁବନେଶ୍ୱର : ଘରୋଇ କୋଭିଡ ହସ୍ପିଟାଲରେ ଦୈନିକ ରୌଗୀଙ୍କ ପାଇଁ କେତେ ଖର୍ଚ୍ଚ ହେଉଛି ସେସବୁର ହିସାବ ଦେଇଛନ୍ତି ରାଜ୍ୟ ସରକାର  । ସବୁ ଜିଲ୍ଲା ମୁଖ୍ୟ ଚିକିତ୍ସାଧିକାରୀ ଓ ତିନୋଟି ମହାନଗର ନିଗମ କମିଶନରଙ୍କୁ ସ୍ୱାସ୍ଥ୍ୟ ବିଭାଗ ପକ୍ଷରୁ ଏହି ତାଲିକା ପ୍ରଦାନ କରାଯାଇଛି । ଏହି ତାଲିକା ଅନୁଯାୟୀ ଘରୋଇ ହସ୍ପିଟାଲଙ୍କୁ ସରକାର ଅର୍ଥ ପ୍ରଦାନ କରିବେ । ସାଧାରଣ ବେଡରେ ଚିକତ୍ସା ପାଉଥିବା ରୋଗୀଙ୍କ ପାଇଁ ୧୨ଶହରୁ ୩ହଜାର ଟଙ୍କା ପର୍ଯ୍ୟନ୍ତ ଖର୍ଚ୍ଚ କରାଯିବ । ଖାଦ୍ୟ, ଔଷଧ, ସାନିଟାଇଜର, ବିଭିନ୍ନ ଡାକ୍ତରୀ ପରୀକ୍ଷା, ପିପିଇ କିଟ ଆଦି ବାବଦରେ ୧୭୫୦ଟଙ୍କା ଖର୍ଚ୍ଚ କରାଯିବ । ସେ ମଧ୍ୟରେ ଲଣ୍ଡ୍ରି ପାଇଁ ୨୦୦ ଟଙ୍କା, ସାନିଟାଇଜର ପାଇଁ ୬୦ ଟଙ୍କା, ଖାଦ୍ୟ ପାଇଁ ୨୪୦ ଟଙ୍କା, ଔଷଧ ବାବଦରେ ୩୦୦ ଟଙ୍କା, ପିପିଇ କିଟ ପାଇଁ ୫୦୦ ଟଙ୍କା, ପରୀକ୍ଷଣ ପାଇଁ ୨୦୦ ଟଙ୍କା ଓ ଅନ୍ୟାନ କନଜ୍ୟୁମେବୁଲ ପାଇଁ ୨୫୦ ଟଙ୍କା ଖର୍ଚ୍ଚ ହେବ ।

ଆଇସିୟୁରେ ଚିକିତ୍ସାଧିନ ବ୍ୟକ୍ତିଙ୍କ ପାଇଁ ବେଡ ପିଛା ୨ହଜାରରୁ ୫ ହଜାର ଟଙ୍କା ଖର୍ଚ୍ଚ ହେବ । ଏହାସହିତ ଆଇସିୟୁ ରୋଗୀଙ୍କ ଖାଦ୍ୟ ଓ ଅନ୍ୟାନ କାର୍ଯ୍ୟ ପାଇଁ ୧୨ ହଜାର ଟଙ୍କା ଖର୍ଚ୍ଚ ହେବ । ସେ ମଧ୍ୟରେ ରହିଛି ଲଣ୍ଡ୍ରି ପାଇଁ ୨୦୦ ଟଙ୍କା, ସାନିଟାଇଜର ପାଇଁ ୬୦ ଟଙ୍କା, ଖାଦ୍ୟ ପାଇଁ ୨୪୦ ଟଙ୍କା, ଔଷଧ ପାଇଁ ୭ ହଜାର ଟଙ୍କା, ପିପିଇ ପାଇଁ ୧୫ଶହ ଟଙ୍କା ଓ ଅନ୍ୟାନ କନଜ୍ୟୁମେବୁଲ ପାଇଁ ହଜାରେ ଟଙ୍କା ଖର୍ଚ୍ଚ ହେବ ।ଆଇସିୟୁରେ ଭେଣ୍ଟିଲେଟର ସହ ରହୁଥିବା ରୋଗୀଙ୍କ କ୍ଷେତ୍ରରେ ବେଡ ପିଛା ୨ହଜାରରୁ ୫ହଜାର ଟଙ୍କା ପ୍ରଦାନ କରାଯିବ । ଖାଦ୍ୟ ଓ ଅନ୍ୟାନ କାର୍ଯ୍ୟ ପାଇଁ ୧୩ହଜାର ଟଙ୍କା ପ୍ରଦାନ କରାଯିବ । ସେ ମଧ୍ୟରେ ରହିଛି ଲଣ୍ଡ୍ରି ପାଇଁ ୨୦୦ ଟଙ୍କା, ସାନିଟାଇଜର ପାଇଁ ୬୦ ଟଙ୍କା, ଖାଦ୍ୟ ପାଇଁ ୨୪୦ ଟଙ୍କା, ଔଷଧ ପାଇଁ ୭ ହଜାର ଟଙ୍କା, ପିପିଇ ପାଇଁ ୧୫ଶହ ଟଙ୍କା, ଅନ୍ୟାନ କନଜ୍ୟୁମେବୁଲ ପାଇଁ ହଜାରେ ଟଙ୍କା ଏବଂ ଡକ୍ଟର ଅନ କଲ ପାଇଁ ହଜାରେ ଟଙ୍କା ଖର୍ଚ୍ଚ ହେବ ।

କୋଭିଡ କେୟାର ସେଣ୍ଟରରେ ଚିକିତ୍ସିତ ହେଉଥିବା ରୋଗୀଙ୍କ ପାଇଁ ବେଡ ପିଛା ହଜାରେ ଓ ଖାଦ୍ୟ ଓ ଅନ୍ୟାନ ଖର୍ଚ୍ଚ ପାଇଁ ୧୦୦୦ ଟଙ୍କା ପ୍ରଦାନ କରାଯିବ । ଲଣ୍ଡ୍ରି ପାଇଁ ୨୦୦ ଟଙ୍କା, ସାନିଟାଇଜର ପାଇଁ ୬୦ ଟଙ୍କା, ଖାଦ୍ୟ ପାଇଁ ୨୪୦ ଟଙ୍କା, ଔଷଧ ପାଇଁ ଶହେ ଟଙ୍କା, ମାସ୍କ ପାଇଁ ୨୦୦ ଟଙ୍କା ଓ ବିଭିନ୍ନ ଡାକ୍ତରୀ ପରୀକ୍ଷା ପାଇଁ ୨୦୦ ଟଙ୍କା ଖର୍ଚ୍ଚ ହେବ । ସେହିଭଳି ସରକାର କୋଭିଡ ହସ୍ପିଟାଲ ଓ କୋଭିଡ କେୟାର ହୋମର ଚିକିତ୍ସା ବ୍ୟବସ୍ଥା ଓ ଖାଦ୍ୟର ମାନ ପରୀକ୍ଷଣ ପାଇଁ ଏକ ଟିମ ଗଠନ କରିଥିବା ସୂଚନା ଦେଇଛନ୍ତି ।