କୁମ୍ଭମେଳା ଦଳାଚକଟା ମୃତକଙ୍କ ମଧ୍ୟରେ ଓଡ଼ିଆ କେତେ ? ସରକାରଙ୍କ ନାଁରେ ମାନବାଧିକାର କମିଶନଙ୍କ ପାଖରେ ମାମଲା
ଭୁବନେଶ୍ବର: ଭିଭିଆଇପିଙ୍କ ଜୀବନର ମୂଲ୍ୟ ଅଛି । ହେଲେ ସାଧାରଣ ଶ୍ରଦ୍ଧାଳୁଙ୍କ ମୂଲ୍ୟ କ’ଣ ? ଗତକାଲି ମୌନି ଅମାବାସ୍ୟାରେ ଦଳାଚକଟାରେ ପ୍ରାଣହାନୀ ଘଟିଥିବା ଶ୍ରଦ୍ଧାଳୁଙ୍କ ଭିତରେ ଓଡ଼ିଆ ଶ୍ରଦ୍ଧାଳୁଙ୍କ ସଂଖ୍ୟା କେତେ ତାକୁ ନା ରାଜ୍ୟ ସରକାର ଧ୍ୟାନ ଦେଇଛନ୍ତି ନା ଡବଲ ଇଞ୍ଜିନ ସରକାର କିଛି ସ୍ପଷ୍ଟ କରିଛନ୍ତି । ଏ ନେଇ ଜାତୀୟ ମାନବାଧିକାର କମିଶନଙ୍କ ପାଖରେ ଦାୟର ହୋଇଛି ମାମଲା । ପ୍ରତ୍ୟେକ ମୃତାହତଙ୍କ ପରିବାରକୁ ୩୦ ଲକ୍ଷ ଟଙ୍କା କ୍ଷତିପୂରଣ ଦେବା ସହ ଗୁରୁତର ଆହତଙ୍କୁ ୫ ଲକ୍ଷ ଟଙ୍କା ସହୟତା ଦେବାକୁ ଦାବି ହୋଇଛି । ସେପଟେ ବିରୋଧୀଙ୍କ ଦାବି ରାଜ୍ୟ ସରକାର ତୁରନ୍ତ କୁମ୍ଭମେଳାରେ ସ୍ବତନ୍ତ୍ର କ୍ୟାମ୍ପ ପକାଇ ଓଡ଼ିଆ ଶ୍ରଦ୍ଧାଳୁଙ୍କ ସୁରକ୍ଷା ଦାୟିତ୍ବ ନିଅନ୍ତୁ ।
କୁମ୍ଭମେଳାରେ ବୁଡ଼ ପକାଇବାକୁ ଗଲେ । ଦଳାଚକଟାରେ ଜୀବନ ଗଲା । ପ୍ରାଣ ହରାଇଥିବା ଶ୍ରଦ୍ଧାଳୁଙ୍କ ଭିତରେ ଓଡ଼ିଆ ଭକ୍ତ ବି ସାମିଲ ଥାଇପାରନ୍ତି । ଏ ପର୍ଯ୍ୟନ୍ତ କେତେ ଓଡ଼ିଆ ପ୍ରାଣ ହରାଇଛନ୍ତି ? କେତେ ଗୁରୁତର ଆହତ ଓ କେତେ ନିଖୋଜ ଅଛନ୍ତି ? ନା ସେଠାକାର ସରକାର ସ୍ପଷ୍ଟ କଲେଣି ନା ରାଜ୍ୟରେ ମୃତାହତଙ୍କ ବିଷୟରେ ଜାଣିବା ପାଇଁ ତତ୍ପରତା ଦେଖାଇଛନ୍ତି ମୋହନ ସରକାର । ଏ ନେଇ ପୁରୀର ମାନବାଧିକାର କର୍ମୀ ଜୟନ୍ତ ଦାସ ଜାତୀୟ ମାନବାଧିକାର କମିଶନଙ୍କ ପାଖରେ ମାମଲା ଦାୟର କରିଛନ୍ତି ।
କୁମ୍ଭ ଦଳାଚକଟାରେ ୩୦ ଜଣ ପ୍ରାଣ ହରାଇଥିବାବେଳେ ୬୦ରୁ ଅଧିକ ଗୁରୁତର ଥିବା ସରକାରୀ ସ୍ତରରେ ପ୍ରକାଶ କରାଯାଇଛି । ଭିଭିଆଇପି ଓ ଭିଆଇପି କିପରି ସୁରକ୍ଷିତ ବୁଡ଼ ପକାଇବେ ସବୁ ବ୍ୟବସ୍ଥା ହୋଇଛି । ଅଥଚ ସାଧାରଣ ଶ୍ରଦ୍ଧାଳୁଙ୍କ ପାଇଁ କୌଣସି ସୁବିଧା କରାଯାଇ ନଥିବାରୁ ଏପରି ଅଘଟଣ ଘଟିଥିବା ଆବେଦନକାରୀ ତାଙ୍କ ଆବେଦନରେ ଜଣାଇଛନ୍ତି । ମୃତାହତଙ୍କ ପରିବାରକୁ ୩୦ ଲକ୍ଷ ଲେଖାଏଁ ଟଙ୍କା ଅନୁକମ୍ପା ରାଶି ପ୍ରଦାନ କରିବା ସହିତ ଆହତଙ୍କୁ ୫ ଲକ୍ଷ ଟଙ୍କା ଲେଖାଏଁ ଅତିରିକ୍ତ ସହାୟତା ପ୍ରଦାନ କରିବାକୁ ଆଦେଶ ଦେବାକୁ କମିଶନଙ୍କୁ ଗୁହାରୀ କରାଯାଇଛି ।
କୁମ୍ଭମେଳା ଅଘଟଣ ପରେ ଓଡ଼ିଶା ସରକାରଙ୍କ ସ୍ଥାଣୁତାକୁ ଦାୟୀ କରିଛନ୍ତି ବିରୋଧୀ । ଆଗରୁ ମେଳା ପରିସରରେ ଥିବା ଟେଣ୍ଟରେ ନିଆଁ ଲାଗିଥିଲା । ଆଜି ବି ନିଆଁ ଲାଗି ୧୫ଟି ଟେଣ୍ଟ ଜଳିଯିବା ଖବର ଆସିଛି ।
ଏତେ ବଡ଼ ମେଳାରେ କୋଟି କୋଟି ଲୋକ ଏକାଠି ହେବେ ବୁଡ଼ ପକାଇବେ । ସେଥିପାଇଁ ଉଭୟ କେନ୍ଦ୍ର ଓ ଉତ୍ତରପ୍ରଦେଶ ସରକାର ପର୍ଯ୍ୟାପ୍ତ ବ୍ୟବସ୍ଥା ଗ୍ରହଣ କରିଥିବା ପ୍ରଚାର କରୁଛନ୍ତି । କିନ୍ତୁ ଏସବୁ ସତ୍ତ୍ବେ ଏପରି ଅଘଟଣ ଘଟୁଛି କିପରି ? ଓଡ଼ିଶା ସରକାର ସେଠାକୁ ନା କୌଣସି ମନ୍ତ୍ରୀଙ୍କୁ ପଠାଇଛନ୍ତି ନା କୌଣସି ଅଧିକାରୀଙ୍କୁ ପଠାଇ ଭଲମନ୍ଦ ବୁଝିବା ପାଇଁ ମୁଖ୍ଯମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ମୃତକଙ୍କ ପରିବାରକୁ ୨୦ରୁ ୨୫ ଲକ୍ଷ ଲେଖାଏଁ କ୍ଷତିପୂରଣ ଦେବାକୁ ଦାବି କରିଛନ୍ତି ଆପ ଓ କଂଗ୍ରେସ । ଭୁବନେଶ୍ବରରେ ଯେପରି ଭାବେ ଫୁଟପାଥ୍ ଉପରେ ଲୁହା ବାରିକେଡ୍ କରାଯାଇଛି ତାହା ବି ଆଗାମୀ ଦିନରେ ବିପଦ ଟାଣି ଆଣୁଛି । ଏପରିକି ଉତ୍କର୍ଷ ଓଡ଼ିଶା ପାଇଁ ଜନତା ମଇଦାନ ପାଖରେ ମାଳ ମାଳ ଫ୍ଲେକ୍ସ ବ୍ୟାନର ଓ ଲୁହାବାଡ଼ ଲଗାଯାଇ ଲୋକଙ୍କ ଜୀବନକୁ ବିପନ୍ନ କରାଯାଇଥିବା ବାମଦଳ ଅଭିଯୋଗ କରିଛି ।
କୁମ୍ଭମେଳାରେ ଶ୍ରଦ୍ଧାଳୁଙ୍କ ଜୀବନ ସୁରକ୍ଷିତ ନା ନାହିଁ । ମୁଖ୍ୟମନ୍ତ୍ରୀ ମୋହନ ମାଝୀ ଗୁରୁତର ସହ ସେ ଦିଗରେ ଧ୍ୟାନ ଦେବାକୁ ମାନବାଧିକାର କର୍ମୀ ମୁଖ୍ୟମନ୍ତ୍ରୀଙ୍କୁ ଏକ୍ସରେ ଜଣାଇଛନ୍ତି ।
