ନିମ୍ବ ରୋକିବ କରୋନା ସଂକ୍ରମଣ! ଯାଞ୍ଚ କରୁଛନ୍ତି ଭାରତୀୟ ଡାକ୍ତର
ହରିୟାଣା: ନିମ୍ବ ବହୁ ପୁରୁଣା ଏକ ଆୟୁର୍ବେଦିକ ଔଷଧ । ତ୍ୱଚାର ରୋଗ ଠାରୁ ଆରମ୍ଭ କରି ବିଭିନ୍ନ ସମସ୍ୟାରୁ ମୁକ୍ତି ଦିଏ । ସାଧାରଣ ଫ୍ଲୁ’ରୁ ମଧ୍ୟ ରକ୍ଷା କରେ । କିନ୍ତୁ କରୋନା ଉପରେ ଏହା କେତେ ପ୍ରଭାବ ପକାଏ, କିଭଳି ଏହାର ପ୍ରଭାବ ବଢାଯାଇ ପାରିବ, କେଉଁଭଳି ରୋଗୀଙ୍କ ପାଇଁ ଏହା ଲାଭଦାୟକ ହେବ ଭଳି ଏକାଧିକ ପ୍ରଶ୍ନର ଉତ୍ତର ଖୋଜୁଛନ୍ତି ଭାରତୀୟ ଡାକ୍ତର । ଏଥିପାଇଁ ଏକ ଭାରତୀୟ କମ୍ପାନୀ ଅଲ ଇଣ୍ଡିଆ ଇନଷ୍ଟିଚ୍ୟୁଟ ଅଫ ଆୟୁର୍ବେଦ ସହିତ ମିଶି କାମ କରୁଛନ୍ତି । ଏହି ଟିମ କରୋନା ଉପରେ ନିମ୍ବର ଔଷଧୀୟ ଗୁଣକୁ ନେଇ ପରୀକ୍ଷା କରିବେ । ସୂଚନା ଅନୁସାରେ ଡାକ୍ତର ଏବଂ ବୈଜ୍ଞାନିକଙ୍କ ଏକ ଟିମ୍ ହରିୟାଣାରେ ଫରିଦାବାଦ ସ୍ଥିତ ଇଏସଆଇସି ହସ୍ପିଟାଲରେ କରୋନା ଉପରେ ନିମ୍ବର ପ୍ରଭାବର ହ୍ୟୁମାନ ଟ୍ରାଏଲ କରିବେ ।
ନିମ୍ବର ଯଥେଷ୍ଟ ମହତ୍ତ୍ୱ ରହିଛି । ଆୟୁର୍ବେଦିକ ଉପାୟରେ ଉପଚାର କରି ରକ୍ତ, ପାଚନ ଏବଂ ତ୍ୱଚାର କେତେକ ବୃହତ୍ ସମସ୍ୟାକୁ ଠିକ କରାଯାଇପାରେ । ଏହା ସହିତ ସାଧାରଣ ଜ୍ୱର ଠାରୁ ଆରମ୍ଭ କରି ଫଙ୍ଗଲ ଇନଫେକ୍ସନକୁ ଠିକ କରିବାରେ ଏହା ଏକ ପ୍ରମୁଖ ଭୂମିକା ଗ୍ରହଣ କରିଥାଏ । ଯଦି ଆପଣଙ୍କ ତ୍ୱଚାରେ କୌଣସି ପ୍ରକାରର ସଂକ୍ରମଣ ହୋଇଥାଏ, ତେବେ ତୁରନ୍ତ କିଛି ନିମ୍ବ ପତ୍ରକୁ ବାଟି ସେହି ସ୍ଥାନରେ ଲଗାଇ ପାରିବେ । କିଛି ଦିନ ମଧ୍ୟରେ ଏହାର ପ୍ରଭାବ ଦେଖା ଯାଇଥାଏ । ଯଦି କିଛି ପ୍ରଭେଦ ଦେଖା ନଯାଏ ତେବେ କୌଣସି ଆୟୁର୍ବେଦିକ ଡାକ୍ତରଙ୍କ ସହିତ ପରାମର୍ଶ କରିପାରିବେ ।
ଯେଉଁମାନେ ନିମ୍ବ ଦାନ୍ତକାଠି ବ୍ୟବହାର କରନ୍ତି ସେମାନଙ୍କ ନିକଟରେ କେବେ ମଧ୍ୟ ଦାନ୍ତ ଜନିତ ସମସ୍ୟା ଦେଖା ଦେଇନଥାଏ । ଯେଉଁ ବ୍ୟକ୍ତି ଗାଧୋଇବା ସମୟରେ ପାଣିରେ ନିମ୍ବ ପତ୍ର ପକାଇ ଗାଧାନ୍ତି ସେମାନଙ୍କ ନିକଟରେ ତ୍ୱଚା ସମ୍ବଦ୍ଧୀୟ ସମସ୍ୟା ଦେଖାଯାଏ ନାହିଁ । ଯେଉଁ ମାନଙ୍କ ତ୍ୱଚାରେ ସମ୍ବେଦନଶୀଳ ହୋଇଥାଏ ଏବଂ ସାମାନ୍ୟ ସମସ୍ୟାରେ ତ୍ୱଚା ସଂକ୍ରମିତ ହୋଇଥାଏ,ସେମାନେ ଗାଧୋଇବା ପୂର୍ବରୁ ନିମ୍ବ ପତ୍ର ବାଟି ତ୍ୱଚାରେ ଲଗାଇ ରଖିବାର କିଛି ସମୟ ପରେ ଗାଧୋଇବା ଦ୍ୱାରା ସେହି ସମସ୍ୟା ଧୀରେ ଧୀରେ ଦୂର ହୋଇଥାଏ ।
