ଗରିବ ହିତାଧିକାରୀଙ୍କ ଟଙ୍କା ଖାଇଗଲେ ବିଭାଗୀୟ ଅଧିକାରୀ !

ଆନନ୍ଦପୁର :  ପ୍ରଧାନମନ୍ତ୍ରୀ ଆବାସ ଯୋଜନାରେ ମହାଘୋଟାଲା । ହିତାଧିକାରୀ ନାହିଁ କି ଘର ନାହିଁ ତଥାପି ଫେକ୍ ଆକାଉଣ୍ଟକୁ ଟଙ୍କା ଯାଇଛି ।  ବେନାମୀ ହିତାଧିକାରୀଙ୍କ ନାଁରେ ଫାଇଲ ଖୋଲାଯାଇ ଲକ୍ଷାଧିକ ଟଙ୍କା ହଡପ । ଏଭଳି ସଙ୍ଗୀନ ଅଭିଯୋଗ ଆସିଛି କେନ୍ଦୁଝର ଜିଲ୍ଲା ହାଟଡିହି ବ୍ଲକରୁ । ପ୍ରଧାନ ମନ୍ତ୍ରୀ ଆବାସ ଯୋଜନାରେ ରାମ ମୁଣ୍ଡା ପିତା ପ୍ରଶାନ୍ତ ମୁଣ୍ଡାଙ୍କୁ ବାସ ଗୃହ ଯୋଗା ଯାଇଛି । କିନ୍ତୁ ପ୍ରକୃତରେ ରାମ ମୁଣ୍ଡା ନାମକ ହିତାଧିକାରୀ କିଏ ନାହାଁନ୍ତି ।  ଗତ ୨୦୨୩ ମସିହା ଡିସେମ୍ବର ମାସ ୭ତାରିଖରେ ଘରର ଫାଉଣ୍ଡେସନ ପାଇଁ ପ୍ରଥମ କିସ୍ତି ୪୦ ହଜାର ଓ ପରବର୍ତ୍ତୀ  ପର୍ଯ୍ୟାୟରେ ଛାତ ଲେବୁଲ୍ ପର୍ଯ୍ଯନ୍ତ  ନିର୍ମାଣ ପାଇଁ ୬୫ ହଜାର ଯୋଗାଇ ଦିଆଯାଇଛି । ଏମିତି ମୋଟ ୧ ଲକ୍ଷ ପାଞ୍ଚ ହଜାର ଟଙ୍କା ହିତାଧିକାରୀଙ୍କ ଆକାଉଣ୍ଟକୁ ଟ୍ରାନ୍ସଫର କରାଯାଇଛି । ହେଲେ ନାଁ ଅଛି ଘର , ନା ଅଛି ଗାଁରେ ଏଭଳି କିଏ ହିତାଧିକାରୀ ଅଛନ୍ତି । ହାଟଡିହି ବ୍ଯାଙ୍କ ଅଫ ଇଣ୍ଡିଆ ଶାଖାରେ ଏଭଳି କେହି ହିତାଧିକାରୀଙ୍କ ଜମାଖାତା ମଧ୍ଯ ନାହିଁ । ଟଙ୍କା ଯାଇଛି ସେହି ବ୍ଯାଙ୍କ ସାଖାରେ ଥିବା ମାନସ ମହାନ୍ତି ନାମକ ବ୍ଯକ୍ତିଙ୍କ ଜମା ଖାତାକୁ । ବ୍ଲକ୍ ର ବଡବାବୁଙ୍କ ସମେତ କିଛି ଦଲାଲ ମିଳିମିଶି ଟଙ୍କା ହଡପ କରିଥିବା ଅଭିଯୋଗ ହୋଇଛି ।

ହାଟଡିହି ବ୍ଲକ ରୁରାଲ୍ ହାଉସିଂ ବିଭାଗ ପନ୍ଦାଡୋ ପଞ୍ଚାୟତର ଏହି ତଥ୍ଯକୁ ଦେଖିଲେ,  ୨୦୨୩ ମସିହା ସେପ୍ଟେମ୍ବର ୯ ତାରିଖରେ ବ୍ଲକ୍ ରୁରାଲ ହାଉସିଂ ବିଭାଗ ତରଫରୁ ସରଳାପଶି ଗାଁର ହିତାଧିକାରୀ ରାମ ମୁଣ୍ଡା ପିତା ପ୍ରସନ୍ନ  ମୁଣ୍ଡାଙ୍କୁ ଘର ମିଳିଛି । କ୍ରମିକ ସଂଖ୍ଯା OR 154624802 ରେ ତାଙ୍କୁ କାର୍ଯ୍ୟାଦେଶ  ପ୍ରଦାନ କରାଯାଇଛି । ଇଏ ହେଉଛନ୍ତି ପ୍ରକୃତ ହିତାଧିକାରୀ  , ଟଙ୍କା ନେଇ ଘର ମଧ୍ଯ ତୋଳିଛନ୍ତି । ହେଲେ ପରବର୍ତ୍ତୀ ସମୟରେ ହୋଇଛି ଘୋଟାଲା । ରାମ ମୁଣ୍ଡା ପିତା ପ୍ରସନ୍ନ ମୁଣ୍ଡାଙ୍କ ଘର ଫଟୋ ଉଠାଇ ଜିଇଓ ଟ୍ଯାଗ୍ କରି ରାମ ମୁଣ୍ଡା ପିତା ପ୍ରଶାନ୍ତ ମୁଣ୍ଡା ନାମରେ ବେନାମି ଫାଇଲ୍ ଖୋଲାଯାଇଛି  ।  ଘଟଣା ପରେ ହାଟଡିହି ବ୍ଲକ୍ ରୁରାଲ ହାଉସିଂ ବିଭାଗର ବିପିସି ବିନା ଅନୁମତିରେ ରେ କାର୍ଯାଳୟ ଆସୁନଥିବା କହିଛନ୍ତି ବିଡିଓ  । ପ୍ରଧାନ ମନ୍ତ୍ରୀ ଆବାସ ଯୋଜନା ଘୋଟାଲାରେ ଏହା ଭାତ ହାଣ୍ଡିରୁ ଗୋଚିଏ,  ପ୍ରକୃତ ଘଟଣା ତଦନ୍ତ କଲେ ଏପରି ଆହୁରି ଅନେକ  ଆବାସ ଗୃହ ଘୋଟାଲାର ରହସ୍ଯ ସାମ୍ନାକୁ ଆସିବ ।