କେନ୍ଦ୍ରୀୟ କର୍ମଚାରୀଙ୍କ ପାଇଁ ଖୁସି ଖବର

ନୂଆଦିଲ୍ଲୀ: ୩୧ ଲକ୍ଷ କେନ୍ଦ୍ରୀୟ କର୍ମଚାରୀଙ୍କ ପାଇଁ ଖୁସି ଖବର । ଡିଏ ବଢ଼ିବା ପରେ ଏବେ ଏହି କର୍ମଚାରୀଙ୍କ ଆବାସ ଭତ୍ତା (ଏଚଆରଏ) ବଢିପାରେ । ଖବର ଅନୁସାରେ, ସରକାର ଶୀଘ୍ର କେନ୍ଦ୍ରୀୟ କର୍ମଚାରୀଙ୍କ ଆବାସ ଭତ୍ତା ବଢାଇବାକୁ ଯାଉଛନ୍ତି । କେନ୍ଦ୍ରୀୟ କର୍ମଚାରୀଙ୍କ କାଟାଗୋରୀ ଅନୁସାରେ ୯ ପ୍ରତିଶତ, ୧୮ ପ୍ରତିଶତ ଓ ୨୭ ପ୍ରତିଶତ ଏଚଆରଏ ମିଳୁଛି । ସରକାର ଏହାକୁ ୩ ପ୍ରତିଶତ ବଢାଇବାକୁ ଯୋଜନା କରୁଛନ୍ତି । ଯଦି ଏପରି ହୁଏ କେନ୍ଦ୍ରୀୟ କର୍ମଚାରୀଙ୍କ ସର୍ବନିମ୍ନ ଏଚଆରଏ ୧୦ ପ୍ରତିଶତରେ ପହଞ୍ଚିଯିବ ।

ଟ୍ୟାକ୍ସ ଆଣ୍ଡ ଇନଭେଷ୍ଟ ବିଶେଷଜ୍ଞ ବଲଓ୍ବନ୍ତ ଜେନ୍ କହିଛନ୍ତି ‘ଯଦି ଏଚଆରଏ ବଢାଇବାକୁ ସରକାର ନିଷ୍ପତ୍ତି ନିଅନ୍ତି, ଏହାର ଲାଭ କେନ୍ଦ୍ରୀୟ କମର୍ଚାରୀଙ୍କୁ ମିଳିବ । ପ୍ରତିରକ୍ଷା କ୍ଷେତ୍ରରେ ଥିବା କର୍ମଚାରୀଙ୍କ ପାଇଁ ଏହା କିଛି ଲାଭ ଦେବନି । କାରଣ ସେମାନଙ୍କ ପାଇଁ ଦରମାଠାରୁ ଭତ୍ତା ପର୍ଯ୍ୟନ୍ତ ପ୍ରଦାନ ପାଇଁ ଅଲଗା ବ୍ୟବସ୍ଥା ରହିଛି । କେନ୍ଦ୍ର ସରକାରଙ୍କ ବିଭିନ୍ନ ବିଭାଗରେ ୩୮ ଲକ୍ଷ କର୍ମଚାରୀ ଅଛନ୍ତି । ସେମାନଙ୍କ ମଧ୍ୟରୁ ୩୧.୧ ଲକ୍ଷ କର୍ମଚାରୀ କାର୍ଯ୍ୟ କରୁଛନ୍ତି । ଯଦି ସରକାର ଏଚଆରଏ ବଢାନ୍ତି, ତେବେ ଏହି ୩୧.୧ ଲକ୍ଷ କର୍ମଚାରୀ ଏହାର ଲାଭ ପାଇବେ ।’

ଅନ୍ୟପକ୍ଷରେ ଏଚଆରଏ ବଢାଇବା ଗଣିତ ଏତେ ସହଜ ନୁହେଁ । ୭ମ ବେତନ କମିଶନ ସୁପାରିଶ ଅନୁସାରେ ଏଚଆରଏ ସ୍ଲାବ୍ ୩୦ ପ୍ରତିଶତ, ୨୦ ପ୍ରତିଶତ ଓ ୧୦ ପ୍ରତିଶତ ବଦଳରେ କମାଇ ୨୪ରୁ ୮ ପ୍ରତିଶତ ମଧ୍ୟରେ କରାଯାଇଥିଲା । ଆୟୋଗ ପକ୍ଷରୁ କୁହାଯାଇଥିଲା, ଏହାକୁ ଦୁଇଟି ପର୍ଯ୍ୟାୟରେ ବଢାଯାଇପାରିବ । ଡିଏ ୫୦ ପ୍ରତିଶତ ହୋଇଗଲେ ଏଚଆରଏ ୧ରୁ ୩ ପ୍ରତିଶତ ବଢାଇ ୯-୨୭ ପ୍ରତିଶତ ସ୍ଲାବରେ ରଖିବାକୁ କୁହାଯାଇଥିଲା । ଏହାପରେ ଡିଏ ୧୦୦ ପ୍ରତିଶତ ହୋଇଗଲେ ଦ୍ବିତୀୟ ପର୍ଯ୍ୟାୟରେ ଏଚଆରଏକୁ ବଢାଯାଇପାରିବ ।

ଦରଦାମ ବୃଦ୍ଧିକୁ ନଜରରେ ରଖି ସରକାର ଏଚଆରଏ ବଦଳାଇବାକୁ ଡିଏ ସ୍ତର ୨୫ ପ୍ରତିଶତ ଓ ୫୦ ପ୍ରତିଶତ କରିଛି । ଗତ ଜୁଲାଇରେ ସରକାର ଡିଏ ବଢାଇ ୨୮ ପ୍ରତିଶତ କରିଥିଲେ । କାରଣ ଏହି ୨୫ ପ୍ରତିଶତରୁ ଅଧିକ ଅଧିକ ହୋଇଯାଇଥିଲା । ଏଥିପାଇଁ ଏଚଆରଏ ବଢାଯାଇଛି । ଖବର ଅନୁସାରେ ସରକାର ଡିଏ ୩୪ ପ୍ରତିଶତ ବଢାଇପାରନ୍ତି । ଏମିତି ହେଲେ ୫୦ ପ୍ରତିଶତକୁ ଟପି ଯିବ ଓ ଦ୍ବିତୀୟ ଥର ଏଚଆରଏ ବଢାଇବା ରାସ୍ତା ସଫା ହୋଇଯିବ ।