ପୂର୍ବ ଶତ୍ରୁତାକୁ କେନ୍ଦ୍ରକରି ଜଣଙ୍କ ଘର ଭାଙ୍ଗିଲେ ୨୦ରୁ ଉର୍ଦ୍ଧ୍ୱ ଲୋକ

ବାଲିଗୁଡ଼ା: ପୂର୍ବ ଶତ୍ରୁତାକୁ କେନ୍ଦ୍ରକରି ପ୍ରଥମେ ଝଗଡ଼ା ଏବଂ ପରେ ଗୁଣି ଗାରେଡ଼ି କରୁଥିବା ସନ୍ଦେହରେ ଜଣକ ଘର ଭାଙ୍ଗିଲେ ୨୦ରୁ ଉର୍ଦ୍ଧ୍ବ ଲୋକ। ଏଭଳି ଏକ ଅଭାବନୀୟ ଘଟଣା ଘଟିଛି ବାଲିଗୁଡ଼ା ଥାନା ଡିଙ୍ଗେଲକିଆ ଗାଁର ବୁଦାରା ପ୍ରଧାନଙ୍କ ପରିବାର ସହ। ପିଡ଼ିତ ପରିବାର ଏବେ ବାଲିଗୁଡ଼ା ଥାନାର ଦ୍ବାରସ୍ଥ ହୋଇଛନ୍ତି। ସୂଚନା ଅନୁଯାୟୀ ଗତ କିଛି ଦିନ ଧରି ବୁଦାରା ପ୍ରଧାନଙ୍କ ସହ ତାଙ୍କର କିଛି ସମ୍ପର୍କୀୟଙ୍କ ଶତ୍ରୁତା ଲାଗି ରହିଥିଲା। ବୁଦାରାଙ୍କୁ ଗୁଣିଆର ଆଖ୍ୟା ଦେବାସହ ଗାଁରେ ଗତ ପନ୍ଦର ଦିନ ତଳେ ଏକ ବୈଠକ ହୋଇଥିଲା ଏବଂ ଆପୋଷ ବୁଝାମଣା ମଧ୍ୟ ହୋଇଥିବା କହିଛନ୍ତି ବୁଦାରା।

କିନ୍ତୁ ସମାଧାନ ସତ୍ତ୍ୱେ ଲୋକଙ୍କର ରାଗ ଥଣ୍ଡା ହୋଇନଥିଲା। ତେବେ ପୁଣି ଶନିବାର ରାତିରେ କିଛି ଯୁବକ ବୁଦାରାଙ୍କ ଘରେ ପହଞ୍ଚି ଥିଲେ। ଘର ଚାରିପଟୁ ଘେରି ଯାଇଥିଲେ ଏବଂ ଗାଁରେ ରଖାଇଦେବୁନାହିଁ କହି ତାଙ୍କ ଘର ଭାଙ୍ଗି ଦେଇଥିବା ଅଭିଯୋଗ ହୋଇଛି। ବର୍ତ୍ତମାନ ସମୟରେ ଗୁଣି ଗାରେଡ଼ିକୁ ଲୋକେ ବିଶ୍ୱାସ କରୁନଥିବା ବେଳେ ପୂର୍ବ ଶତ୍ରୁତାକୁ ଫଳପ୍ରଦ କରିବାପାଇଁ ଏଭଳି କରାଯାଇଥିବା ଚର୍ଚ୍ଚା ହେଉଛି। ବୁଦାରାଙ୍କ ପରିବାର ଏବେ ବାସହରା ହେବା ସହ ଭୟଭୀତ ଅବସ୍ଥାରେ ଅଛନ୍ତି। ସେପଟେ ନ୍ୟାୟ ପାଇଁ ବାଲିଗୁଡ଼ା ଥାନାର ଦ୍ବାରସ୍ଥ ହୋଇଛନ୍ତି। ଅଭିଯୋଗ ପ୍ରକାରେ ପୋଲିସ ତଦନ୍ତ ଆରମ୍ଭ କରିଛି ।