ବିଶ୍ବ ଗାଉଛି ହକି ହୈ ଦିଲ ମେରା
1 min read
ଓଡ଼ିଶାରେ ହକିର ମହକ ଆଜି ସାରା ବିଶ୍ୱରେ ମହମହ ହୋଇ ବାସୁଛି । ତା’ ସହିତ ରାଜ୍ୟର କଳା, ସଂସ୍କୃତି, ଐତିହ୍ୟ ଓ ପର୍ଯ୍ୟଟନର ଚିତ୍ର ସମସ୍ତଙ୍କୁ ଆକୃଷ୍ଟ କରିଛି । ରାଜଧାନୀ ଭୁବନେଶ୍ୱରରୁ ଗାଁର କୋଣ ଅନୁକୋଣରେ ହକିର ସ୍ପନ୍ଦନ ସ୍ପନ୍ଦିତ ହେଉଛି । ସମସ୍ତେ ଆଜି ସମବେତ ସ୍ୱରରେ ଗାନ କରୁଛନ୍ତି ‘ହକି ହୈ ଦିଲ ମେରା…’ ।
ଦେଶରେ ହକିର ପୁନରୁଦ୍ଧାର ଏବଂ କ୍ରୀଡ଼ାପ୍ରେମୀଙ୍କୁ ପୁଣି ହକି ପ୍ରତି ଆକୃଷ୍ଟ କରାଇବା ଦିଗରେ ଯେଉଁ ବ୍ୟକ୍ତିଙ୍କ ପ୍ରତ୍ୟକ୍ଷ ଭୂମିକା ରହିଛି, ସେ ହେଉଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ହକିର ମଧୁର ମହ୍ଲାର ଆଜି ସବୁଠି ଝଙ୍କୃତ ହେଉଛି ।
କଟକ ବାରବାଟୀ ଷ୍ଟାଡିୟମରେ ବୁଧବାର ଉଦ୍ଘାଟିତ ହୋଇଛି ପୁରୁଷ ହକି ବିଶ୍ୱକପ୍ର ୧୫ତମ ସଂସ୍କରଣ । କ୍ରମାନ୍ୱୟରେ ଦ୍ୱିତୀୟ ଥର ହକି ବିଶ୍ୱକପ୍ ଆୟୋଜନ କରି ଓଡ଼ିଶା ହକି ଇତିହାସରେ ଏକ ନୂଆ ଫର୍ଦ୍ଦ ଯୋଡ଼ିଛି । ପୂର୍ବରୁ ହକି ଥିଲା, ବିଶ୍ୱକପ୍ ବି ଆୟୋଜିତ ହେଉଥିଲା । ୨୦୧୪ ପର୍ଯ୍ୟନ୍ତ ବିଶ୍ୱର ବିଭିନ୍ନ ସହରରେ ୧୩ଟି ସଂସ୍କରଣ ସଫଳତାର ସହ ଆୟୋଜିତ ହୋଇଥିଲା । ତେବେ ମନକୁ ଏଠାରେ ପ୍ରଶ୍ନ ଆସିବା ସ୍ୱାଭାବିକ ଯେ, ଓଡ଼ିଶା ଅଧିକ କ’ଣ କଲା?
ଫୁଟବଲ, ଟେନିସ, ଆଥଲେଟିକ୍ ଭଳି ହକି ବିଶ୍ୱରେ ଏତେ ଲୋକପ୍ରିୟ ନୁହେଁ । କିନ୍ତୁ ଏହା ଏକ ପ୍ରାଚୀନ କ୍ରୀଡ଼ା ଭାବେ ଆଦ୍ୟରୁ ଅଲିମ୍ପିକ୍ସରେ ସାମିଲ ହୋଇ ଆସିଛି । ପ୍ରଚାର ପ୍ରସାର ଅଭାବରୁ ହକିର ପରିସର ସୀମିତ ହୋଇ ରହିଛି । ଓଡ଼ିଶା ଦୁଇ ଥର କ୍ରମାନ୍ୱୟରେ ବିଶ୍ୱକପ୍ ଆୟୋଜନ କରି ବିଶ୍ୱରେ ହକିର ପ୍ରଚାର ପ୍ରସାର ଦିଗରେ ମୁଖ୍ୟ ଭୂମିକା ଗ୍ରହଣ କରିଛି । ୨୦୧୮ରେ ବିଶ୍ୱର ବିଭିନ୍ନ ମେଟ୍ରୋପଲିଟାନ ସହରରେ ବିଶ୍ୱକପ୍ର ପ୍ରଚାର ପ୍ରସାର କରାଯାଇଥିଲା । ବିଶ୍ୱକପ୍ ଆୟୋଜନକୁ ନୂଆ ରୂପ ଦେବାରେ ଓଡ଼ିଶାର ଭୂମିକା ସବୁଦିନ ହକି ଇତିହାସରେ ଲେଖା ହୋଇ ରହିବ । ଅଲିମ୍ପିକ୍ସ, ରାଜ୍ୟଗୋଷ୍ଠୀ କ୍ରୀଡ଼ା, ଏସୀୟ କ୍ରୀଡ଼ା ଓ ଫିଫା ବିଶ୍ୱକପ୍ ଭଳି ଟୁର୍ଣ୍ଣାମେଣ୍ଟ ଆରମ୍ଭ ହେବା ପୂର୍ବରୁ ରଙ୍ଗୀନ ଉଦ୍ଘାଟନୀ ପର୍ବ ଓ ଆତସବାଜିର କାର୍ଯ୍ୟକ୍ରମ ହୋଇଥାଏ ।
ହକି ବିଶ୍ୱକପ୍ର ୨୦୧୮ ସଂସ୍କରଣରେ ରଙ୍ଗୀନ ଉଦ୍ଘାଟନୀ ପର୍ବ ପ୍ରଥମ କରି ଆରମ୍ଭ ହୋଇଥିଲା । ପୁଣି ୨୦୨୩ ସଂସ୍କରଣରେ ଓଡ଼ିଶା ଆଉ ଦୁଇ ପାଦ ଆଗକୁ ଯାଇ ପ୍ରଥମ ଥର ଦୁଇଟି ସହରରେ ବିଶ୍ୱକପ୍ ଆୟୋଜନ ଏବଂ ଭେନ୍ୟୁ ସ୍ଥାନକୁ ଛାଡ଼ି ସ୍ୱତନ୍ତ୍ର ଉଦ୍ଘାଟନୀ ପର୍ବ ଭିନ୍ନ ସହରରେ ଆୟୋଜିତ ହେବା ବିଶ୍ୱକପ୍କୁ ଅଧିକ ପରିବ୍ୟାପ୍ତ କରିପାରିଛି । ଓଡ଼ିଶାର ଏହି ଧାରା ପରବର୍ତ୍ତୀ ସଂସ୍କରଣକୁ ପ୍ରଭାବିତ କରିଛି । ୨୦୨୬ ସଂସ୍କରଣ ଦୁଇଟି ସହରରେ ନହେଲେ ବି ଦୁଇଟି ଦେଶରେ ଆୟୋଜିତ ହେବ ।
– ଭାରତରେ ହକିର ପୁନରୁଦ୍ଧାର
୧୯୮୦ ପରେ ଭାରତୀୟ ହକି କିଭଳି ସ୍ଥିିତି ଦେଇ ଗତି କରୁଥିଲା, ତାହା ସମସ୍ତେ ଜାଣିଛନ୍ତି । ଅଲିମ୍ପିକ୍ସରେ ୮ଟି ସ୍ୱର୍ଣ୍ଣ ପଦକ ଜିତିଥିବା ଭାରତ ୨୦୦୮ରେ ଯୋଗ୍ୟତା ହାସଲରୁ ବଞ୍ଚିତ ହୋଇଥିଲା । ସାହାରା ହକି ଇଣ୍ଡିଆର ପ୍ରାୟୋଜକ ଛାଡ଼ିବା ପରେ ଭାରତୀୟ ହକିର ସ୍ଥିତି ଏକ ପ୍ରକାର ଦୋହଲି ଯାଇଥିଲା । ଶେଷରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ହକି ଇଣ୍ଡିଆକୁ ପ୍ରୋତ୍ସାହନ ଯୋଗାଇ ଦେବାର ଘୋଷଣା କଲେ । ଓଡ଼ିଶା ହକି ଇଣ୍ଡିଆର ମୁଖ୍ୟ ପ୍ରାୟୋଜକ ହେଲା ।
୨୦୧୭ ଠାରୁ ଭାରତୀୟ ହକି ଦଳ (ପୁରୁଷ, ମହିଳା) ଓଡ଼ିଶା ନାମ ଲେଖା ଜର୍ସି ପରିଧାନ କରି ଅନ୍ତର୍ଜାତୀୟ ଟୁର୍ଣ୍ଣାମେଣ୍ଟ ଖେଳୁଛି । ଜାତୀୟ ହକିକୁ ଓଡ଼ିଶା ପ୍ରୋତ୍ସାହନ ଯୋଗାଇ ଦେବାର ଫଳ ଟୋକିଓ ଅଲିମ୍ପିକ୍ସରେ ଦେଶକୁ ମିଳିଥିଲା । ଦୀର୍ଘ ୪୧ ବର୍ଷ ପରେ ଭାରତୀୟ ପୁରୁଷ ଦଳ ଅଲିମ୍ପିକ୍ସରେ ପଦକ ଜିତିବାର ସୌଭାଗ୍ୟ ଲାଭ କରିପାରି ଥିଲା । ସେମିତି ମହିଳା ଦଳ ଶ୍ରେଷ୍ଠ ପ୍ରଦର୍ଶନ କରି (ଚତୁର୍ଥ) ଅଳ୍ପକେ ପଦକରୁ ବଞ୍ଚିତ ହୋଇଥିଲେ । ଭାରତୀୟ ହକି ଦଳ ବ୍ରୋଞ୍ଜ ପଦକ ଜିତିବାର ଶ୍ରେୟ ଓଡ଼ିଶାବାସୀକୁ ମିଳିଥିଲା । ସମୟ ଆସିଲା, ଜାତୀୟ ସ୍ତରରେ ଓଡ଼ିଶା ଚର୍ଚ୍ଚାର ଶିରୋନାମା ପାଲଟିଲା; ତାହା ପୂର୍ବର ସେହି କାଳିମାମୟ ଘଟଣାବଳୀ ପାଇଁ ନୁହଁ ବରଂ ହକିର ବିଜୟ ଯାତ୍ରା ପାଇଁ । ହକି ଦଳର ସଫଳତାରେ ଖୁସି ହୋଇ ମୁଖ୍ୟମନ୍ତ୍ରୀ ଆଉ ଦଶ ବର୍ଷ ଭାରତୀୟ ଦଳକୁ ପ୍ରୋତ୍ସାହନ ଯୋଗାଇ ଦେବେ ବୋଲି ଘୋଷଣା କରିଥିଲେ । ବିଶ୍ୱରେ ହକି ଖେଳୁଥିବା ପ୍ରତିଟି ଦେଶ ଓଡ଼ିଶାକୁ ଜାଣିଛି ଏବଂ ଓଡ଼ିଶାର ଆତିଥ୍ୟରେ ପ୍ରୀତ ହୋଇଛି ।
– ଓଡ଼ିଶାରେ ହକିର ବିକାଶ
ଇଂରେଜମାନେ ଓଡ଼ିଶା ଆଗମନ ପରେ ଓଡ଼ିଶାରେ ହକିର ଉନ୍ମେଷ ଘଟିଥିଲା । ବିଶେଷ କରି ମିଶନାରୀମାନଙ୍କ ଦ୍ୱାରା ସୁନ୍ଦରଗଡ଼ରେ ଏହାର ଲୋକପ୍ରିୟତା ବଢ଼ିବାରେ ଲାଗିଲା । ସମୟକ୍ରମେ ହକି ଆଦିବାସୀମାନଙ୍କର ମୁଖ୍ୟ କ୍ରୀଡ଼ାର ମାନ୍ୟତା ପାଇଲା । ଧିରେ ଧିରେ ଏହାକୁ ନେଇ ପ୍ରତିଯୋଗିତା ଆୟୋଜିତ ହେଲା । ଏହି ପ୍ରତିଯୋଗିତାକୁ ଅଧିକ ଲୋକପ୍ରିୟ କରାଇଲା ସ୍ୱତନ୍ତ୍ର ଖାସି କପ୍ ଟୁର୍ଣ୍ଣାମେଣ୍ଟ । ପ୍ରତିବର୍ଷ ସୁନ୍ଦରଗଡ଼ରେ ପ୍ରାୟ ଦୁଇ ହଜାରରୁ ଊର୍ଦ୍ଧ୍ୱ ଖାସି ଟୁର୍ଣ୍ଣାମେଣ୍ଟ ଆୟୋଜିତ ହୋଇଥାଏ ।
ସୁନ୍ଦରଗଡ଼ର ସମେତ ରାଜ୍ୟର କିଛି ଅଞ୍ଚଳରେ ହକି ଥିଲା, ଖେଳାଳି ବି ଥିଲେ କିନ୍ତୁ ଆଧୁନିକ ଭିତ୍ତିଭୂମି ଏବଂ ଆଧୁନିକ ସୁବିଧା ସୁଯୋଗ ନଥିଲା । ବିଗତ ଏକ ଦଶନ୍ଧି ମଧ୍ୟରେ ରାଜ୍ୟରେ କ୍ରୀଡ଼ା ଭିତ୍ତିଭୂମିର ଅଭୂତପୂର୍ବ ବିକାଶ ଘଟିଛି । ଭୁବନେଶ୍ୱର, କଟକ, ରାଉରକେଲା ଓ ବ୍ରହ୍ମପୁର ଭଳି ସହରରେ ଅନ୍ତର୍ଜାତୀୟ ମାନର କ୍ରୀଡ଼ା ଭିତ୍ତିଭୂମି ଗଢ଼ି ଉଠିଛି । କଳିଙ୍ଗ ହକି ଷ୍ଟାଡିୟମ ପରେ ରାଉରକେଲାରେ ଏକ ନୂଆ ଅନ୍ତର୍ଜାତୀୟ ହକି ଷ୍ଟାଡିୟମ ନିର୍ମାଣ ହୋଇଛି । ସୁନ୍ଦରଗଡ଼ରେ ତୃଣମୂଳସ୍ତରରୁ ହକିର ଆଧୁନିକୀକରଣ ପାଇଁ ୧୭ଟି ବ୍ଲକ ସମେତ ବିଭିନ୍ନ ଜିଲ୍ଲାରେ ମଧ୍ୟ ଆଷ୍ଟ୍ରୋ ଟର୍ଫ ବିଛା ଯିବା ନେଇ କାର୍ଯ୍ୟ ଆଗେଇ ଚାଲିଛି । ସେହିପରି ତୃଣମୂଳ ସ୍ତରରୁ ହକି ଖେଳାଳି ବାହାର କରିବା ପାଇଁ ସୁନ୍ଦରଗଡ଼ ସମେତ ଭୁବନେଶ୍ୱରରେ କ୍ରୀଡ଼ା ଛାତ୍ରାବାସ ଏବଂ ହକି ଉତ୍କର୍ଷ କେନ୍ଦ୍ର ପ୍ରତିଷ୍ଠା କରାଯାଇଛି ।
– ଓଡ଼ିଶାରେ ହକିର ଆଧୁନିକ ପର୍ବ
ଆଦିବାସୀଙ୍କର ହକି ନୈପୁଣ୍ୟତାକୁ ବିଶ୍ୱମୁଖୀ କରାଇବା ପାଇଁ ରାଜ୍ୟ ସରକାର ପ୍ରଥମେ ଭୁବନେଶ୍ୱର କଳିଙ୍ଗ ଷ୍ଟାଡିୟମରେ ଏକ ଅନ୍ତର୍ଜାତୀୟ ମାନର ହକି ଷ୍ଟାଡିୟମ ନିର୍ମାଣ କଲେ । ୨୦୧୩ ମଧ୍ୟଭାଗ ବେଳକୁ ଦୁଇ ଗ୍ୟାଲେରୀ ବିଶିଷ୍ଟ ଷ୍ଟାଡିୟମର ନିର୍ମାଣ କାର୍ଯ୍ୟ ସମ୍ପୂର୍ଣ୍ଣ ହେଲା । ହକି ଇଣ୍ଡିଆର ପ୍ରସ୍ତାବ କ୍ରମେ ରାଜ୍ୟ ସରକାର ହକି ଇଣ୍ଡିଆ ଲିଗ୍ (ଏଚ୍ଆଇଏଲ୍)ରେ ଏକ ଦଳ କ୍ରୟ କଲେ । ତାହାର ନାମ ଥିଲା ‘କଳିଙ୍ଗ ଲାନସର୍ସ’ । ଏହାପରେ ୨୦୧୪ରେ ହକି ଇଣ୍ଡିଆ ରାଜ୍ୟ ସରକାରଙ୍କୁ ‘ହକି ଚାମ୍ପିଅନ୍ସ ଟ୍ରଫି’ ଆୟୋଜନ ନେଇ ପ୍ରସ୍ତାବ ଦେଇଥିଲା । ୨୦୧୪ ଡିସେମ୍ବର ମାସରେ ଚାମ୍ପିଅନ୍ସ ଟ୍ରଫି ଆୟୋଜିତ ହେଲା । ପାକିସ୍ତାନ ସମେତ ବିଶ୍ୱର ୮ଟି ଶକ୍ତିଶାଳୀ ଦଳ ଏଥିରେ ଭାଗ ନେଲେ । ଚାମ୍ପିଅନ୍ସ ଟ୍ରଫି ଆୟୋଜନର ଅଭୂତପୂର୍ବ ସଫଳତା ହାସଲ କଲା । ଏହିଠାରୁ ଓଡ଼ିଶାରେ ଆରମ୍ଭ ହୋଇଥିଲା ହକିର ଆଧୁନିକ ପର୍ବ ଏବଂ ହକି ବିପ୍ଳବ ।
‘ହକି ଚାମ୍ପିଅନ୍ସ ଟ୍ରଫି’ର ସଫଳତା ପରେ ହକି ଇଣ୍ଡିଆ ଭୁବନେଶ୍ୱରରେ ୨୦୧୮ ବିଶ୍ୱକପ୍ ଆୟୋଜନ ନେଇ ପ୍ରସ୍ତାବ ରଖିଲା । ଏଭଳି ସୁଯୋଗକୁ ରାଜ୍ୟ ସରକାର ହାତଛଡ଼ା କଲେ ନାହିଁ । ଭୁବନେଶ୍ୱର ବିଶ୍ୱକପ୍ ଭେନ୍ୟୁ ଘୋଷଣା ହେବା ପରଠୁ ଷ୍ଟାଡିୟମର କଳେବର ବୃଦ୍ଧି ହେଲା । ଆଉ ଦୁଇଟି ନୂଆ ଗ୍ୟାଲେରୀ ସହ ଷ୍ଟାଡିୟମର ଦର୍ଶକ ଧାରଣ କ୍ଷମତା ୧୬ ହଜାରକୁ ବୃଦ୍ଧି କରାଗଲା ।
ବିଶ୍ୱକପ୍-୨୦୧୮ ଆୟୋଜନ ଅନ୍ତର୍ଜାତୀୟ ହକିରେ ଏକ ନୂଆ ଫର୍ଦ୍ଦ ଯୋଡ଼ିଲା । ହକି ଇତିହାସରେ ପୂର୍ବରୁ କେବେ ଏମିତି ଆୟୋଜନ ବିଶ୍ୱବାସୀ ଦେଖି ନଥିଲେ । ଯାହା ସମସ୍ତଙ୍କୁ ଚକିତ କଲା । ସାରା ବିଶ୍ୱରେ ଓଡ଼ିଶାର ପ୍ରଶଂସା ହେଲା । ପରବର୍ତ୍ତୀ ସମୟରେ ୨୦୧୯ରେ ହକି ସିରିଜ ଫାଇନାଲ୍ସ, ପୁରୁଷ ଓ ମହିଳା ଅଲିମ୍ପିକ୍ସ ଯୋଗ୍ୟତା ପର୍ଯ୍ୟାୟ, ୨୦୨୦ରେ ହକି ପ୍ରୋ ଲିଗ୍ ଏବଂ ୨୦୨୧ରେ ଜୁନିୟର ପୁରୁଷ ହକି ବିଶ୍ୱକପ୍ ଭଳି ପ୍ରମୁଖ ଟୁର୍ଣ୍ଣାମେଣ୍ଟ ଭୁବନେଶ୍ୱରରେ ଖେଳାଗଲା ।
– ବିଶ୍ୱକପ୍ ୨୦୨୩
୨୦୧୮ ବିଶ୍ୱକପ୍ର ସଫଳ ଆୟୋଜନ ପରେ ଅନ୍ତର୍ଜାତୀୟ ହକି ମହାସଂଘ (ଏଫ୍ଆଇଏଚ୍) ହକି ଇଣ୍ଡିଆକୁ ପୁଣି ପରବର୍ତ୍ତୀ ସଂସ୍କରଣ ଆୟୋଜନ ଅଧିକାର ପ୍ରଦାନ କରିଥିଲା । ହକି ଇଣ୍ଡିଆର ପ୍ରସ୍ତାବକୁ ଏଥର ବି ରାଜ୍ୟ ସରକାର ଅଗ୍ରାହ୍ୟ କରିନଥିଲେ । ବରଂ ଭୁବନେଶ୍ୱର ସମେତ ରାଉରକେଲାରେ ବିଶ୍ୱକପ୍ ଖେଳାଯିବା ବିଷୟ ମୁଖ୍ୟମନ୍ତ୍ରୀ ଘୋଷଣା କରିଥିଲେ । ମାତ୍ର ୧୫ ମାସ ମଧ୍ୟରେ ଇସ୍ପାତରେ ନିର୍ମିତ ନୂଆ ଷ୍ଟାଡିୟମ ଇସ୍ପାତ ନଗରୀ ରାଉରକେଲାରେ ଗଢ଼ି ଉଠିଛି । ଯାହାର ନାମ ରଖାଯାଇଛି ବିର୍ସା ମୁଣ୍ଡା ଅନ୍ତର୍ଜାତୀୟ ହକି ଷ୍ଟାଡିୟମ । କେବଳ ଷ୍ଟାଡିୟମ ନୁହଁ, ଏହାର ପରିସରରେ ପଞ୍ଚ ତାରକା ହୋଟେଲର ସୁବିଧା ଥିବା ‘ହକି ଗ୍ରାମ’ ମଧ୍ୟ ନିର୍ମାଣ ହୋଇଛି । ଯେଉଁଠି ବିଶ୍ୱକପ୍ ଦଳ ଗୁଡ଼ିକର ରହିବାର ବ୍ୟବସ୍ଥା କରାଯାଇଛି । ଷ୍ଟାଡିୟମ ଓ ଅନ୍ୟାନ୍ୟ ନିର୍ମାଣ ପାଇଁ ୯ ଶହରୁ ଊର୍ଦ୍ଧ୍ୱ କୋଟି ଟଙ୍କା ଖର୍ଚ୍ଚ କରାଯାଇଛି । ବିର୍ସା ମୁଣ୍ଡା ଷ୍ଟାଡିୟମକୁ କେବଳ ଦେଶରେ ନୁହେଁ, ବିଶ୍ୱରେ ବୃହତ୍ ଷ୍ଟାଡିୟମର କୁହାଯାଉଛି ।
– ୧୬ ଦଳ, ୪୪ ମ୍ୟାଚ୍
ପ୍ରଥମ ଥର ହକି ବିଶ୍ୱକପ୍ ଦୁଇଟି ଭେନ୍ୟୁରେ ଖେଳାଯାଉଛି । ଉଭୟ ରାଉରକେଲା ଓ ଭୁବନେଶ୍ୱର ଭେନ୍ୟୁ ପ୍ରସ୍ତୁତ ରହିଛି । ମୋଟ୍ ୧୬ଟି ଦଳ ଏଥର ବିଶ୍ୱକପ୍ରେ ଭାଗ ନେଇଛନ୍ତି । ଦଳ ଗୁଡ଼ିକ ହେଲେ ଆର୍ଜେଣ୍ଟିନା, ଅଷ୍ଟ୍ରେଲିଆ, ବେଲଜିୟମ, ଚିଲି, ଇଂଲଣ୍ଡ, ଫ୍ରାନ୍ସ, ଜର୍ମାନୀ, ଇଣ୍ଡିଆ, ଜାପାନ, ଦକ୍ଷିଣ କୋରିଆ, ମାଲେସିଆ, ନେଦରଲାଣ୍ଡସ, ନ୍ୟୁଜିଲାଣ୍ଡ, ଦକ୍ଷିଣ ଆଫ୍ରିକା, ସ୍ପେନ ଓ ୱେଲ୍ସ । ବିଶ୍ୱକପ୍ରେ ୪୪ଟି ମ୍ୟାଚ୍ରୁ ରାଉରକେଲାରେ ୨୦ ଏବଂ ଭୁବନେଶ୍ୱରରେ ୪୪ଟି ମ୍ୟାଚ୍ ଖେଳାଯିବାର ସୂଚୀ ରହିଛି ।
ହକିର ଉନ୍ନତି ଏବଂ ପ୍ରଚାର ପ୍ରସାର ପାଇଁ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରି ଚାଲିଛନ୍ତି । ଯାହାକୁ ନେଇ କିଛି ନାପସନ୍ଦ କରୁଛନ୍ତି ।
କିନ୍ତୁ ନାପସନ୍ଦ କରିବାର କିଛି କାରଣ ନାହିଁ । କାରଣ ଏବେ କ୍ରୀଡ଼ାରେ ଯେଉଁ ପୁଞ୍ଜିର ବିନିଯୋଗ ହେଉଛି, ତାହା ଦିନେ ପୁଣି ବଳିଷ୍ଠ ହୋଇ ଆମ ପାଖକୁ ଫେରିବ । ଖେଳ ମାଧ୍ୟମରେ ଓଡ଼ିଶା ବିଶ୍ୱର କୋଣ ଅନୁକୋଣରେ ପହଞ୍ଚି ପାରିଛି । ଆମ ସଂସ୍କୃତି, ପର୍ଯ୍ୟଟନ ଓ ଐତିହ୍ୟକୁ ସାରା ଦୁନିଆ ଚିହ୍ନିବା ଆରମ୍ଭ କଲାଣି । ଧିରେ ଧିରେ ରାଜ୍ୟରେ ବିଦେଶୀ ପର୍ଯ୍ୟଟକଙ୍କ ସଂଖ୍ୟା ବୃଦ୍ଧି ପାଇବ ଏବଂ ଆମ ଆତିଥେୟତା ବିଦେଶୀ ପୁଞ୍ଜି ନିବେଶକୁ ଅଧିକ ତ୍ୱରାନ୍ୱିତ କରିବ । ଶିଳ୍ପ ସମୃଦ୍ଧ ହେବ, ନିଯୁକ୍ତି ବୃଦ୍ଧି ପାଇବ ଏବଂ ଆମ ଜୀବନ ଧାରଣର ମାନ ବଢ଼ିବ । ହକି କିମ୍ବା ଯେ କୌଣସି କ୍ରୀଡ଼ାର ପ୍ରଚାର ପ୍ରସାର ପଶ୍ଚାତରେ ଏ ଜାତିର ସ୍ୱାର୍ଥ ନିହିତ ରହିଛି । ଉପଯୁକ୍ତ ସୁବିଧା ସୁଯୋଗ ଏବଂ ପ୍ରୋତ୍ସାହନ ପାଇ ଦିନେ ଏ ରାଜ୍ୟରୁ ଏକାଧିକ ଅଲିମ୍ପିକ୍ସ ପଦକ ବିଜେତା ବାହାରି ଦେଶକୁ ଗୌରବାନ୍ୱିତ କରିବେ ।
