ଏକ୍ସ ଗାର୍ଲଫ୍ରେଣ୍ଡକୁ ପିଟିପିଟି ବେହୋସ କରିଦେଲା ଧୋକେବାଜ ଯୁବକର ପ୍ରେମିକା

ଲକ୍ଷ୍ନୌ: ବିଚ୍ ରାସ୍ତାରେ ହାଇ ଭୋଲଟେଜ୍ ଡ୍ରାମା । ମଦ ନିଶାରେ ଜବରଦସ୍ତ ହଙ୍ଗାମା କଲେ ଯୁବତୀ । ମହିଳା ବନ୍ଧୁଙ୍କ ସହ ମିଶି ପ୍ରେମିକଙ୍କ ଏକ୍ସ ଗାର୍ଲ ଫ୍ରେଣ୍ଡକୁ କଲେ ଆକ୍ରମଣ । ଲାତ, ଗୋଇଠାରେ ବେହୋସ ହୋଇଗଲେ ଯୁବତୀ । ଘଟଣାର ଭିଡିଓ ଭାଇରାଲ ହେବା ପରେ ଆକ୍ସନ ମୁଡ଼ରେ ପୋଲିସ । ପୀଡ଼ିତା ଯୁବତୀଙ୍କ ଅଭିଯୋଗ ଆଧାରରେ ମାମଲା ରୁଜୁ କରି ପ୍ରେମିକଙ୍କୁ ବାନ୍ଧିଲା । ଦୁଇ ଯୁବତୀଙ୍କୁ ନେଇ ଚାଲିଛି ତଦନ୍ତ ।

ପୋଲିସ ସୂଚନା ଅନୁସାରେ, ସୋମବାର ରାତିରେ ଆଶିୟାନା ଥାନା ଅନ୍ତର୍ଗତ ସ୍କାଏ ହିଲଟନ ହୋଟେଲ ଆଗରେ ଘଟିଛି ଏହି ହାଇ ଭୋଲଟେଜ ଡ୍ରାମା । ଘଟଣା ସମୟରେ ପୀଡ଼ିତ ଯୁବତୀ ଏକ କାରରେ ଆସି ହୋଟେଲ ଆଗରେ ଓହ୍ଲାଇଥିଲେ । ଏହି ସମୟରେ ତାଙ୍କ ପୂର୍ବତନ ପ୍ରେମିକ ରବୀନ ସିଂହ ନିଶାଶକ୍ତ ଅବସ୍ଥାରେ ସେଠାରେ ପହଞ୍ଚି ଥିଲେ । ତା ସହ ଦୁଇ ଜଣ ଯୁବତୀ ବି ଆସିଥିଲେ ଯେଉଁମାନେ ବି ମଦ ନିଶାରେ ଚୁର ଥିଲେ । ସେମାନେ ପହଞ୍ଚିବା ପରେ କାରରେ ଆସିଥିବା ଯୁବତୀଙ୍କୁ ଗାଳି ଗୁଲଜ କରିବା ଆରମ୍ଭ କରିଦେଇଥିଲେ । ଏହାପରେ ଆରମ୍ଭ ହୋଇଯାଇଥିଲା ରିୟଲ ଫାଇଟ୍ । ଯୁବତୀ ଦ୍ବୟ ନିଶାରେ ଏମିତି ମତୁଆଲା ଥିଲେ ଯେ ଭୁଲି ଯାଇଥିଲେ ସବୁ ହିତାହତ ଜ୍ଞାନ । ପୀଡ଼ିତାଙ୍କୁ ଘୋଷାଡି ଘୋଷାଡ଼ି ଲାତ, ବିଧା, ଗୋଇଠା ମାରିବାକୁ ଲାଗିଲେ । କିଛି ସମୟ ଭିତରେ ଯୁବତୀ ଜଣଙ୍କ ଅଚେତ ହୋଇ ତଳେ ପଡ଼ି ଯାଇଥିଲେ । ପରେ ପୀଡ଼ିତାଙ୍କ ଅଭିଯୋଗ ଆଧାରରେ ପୋଲିସ ରବୀନ ଓ ତାଙ୍କୁ ଦୁଇ ମହିଳା ବନ୍ଧୁଙ୍କ ବିରୋଧରେ ମାମଲା ରୁଜୁ କରିଛି ।

ପୀଡ଼ିତା ଅଭିଯୋଗ କରିଛନ୍ତି, ରବୀନ ତାଙ୍କୁ ପ୍ରେମ ଜାଲରେ ଫସାଇ ଶାରୀରିକ ଶୋଷଣ କରିଛନ୍ତି । ସୋମବାର ଦିନ ହୋଟେଲ ଆଗରେ ରବୀନ ସହ ତାଙ୍କର ଭେଟ ହୋଇଥିଲା । ତାଙ୍କ ସହ ଆସିଥିବା ଦୁଇ ଯୁବତୀ ତାଙ୍କୁ ମରଣାନ୍ତକ ଆକ୍ରମଣ କରିଥିଲେ ।

ଦୁଇ ପିଲାର ବାପା ଧୋକାବାଜ ପ୍ରେମିକ

୨୦୧୬ରେ ଏକ ବିବାହ ଉତ୍ସବରେ ପୀଡ଼ିତାଙ୍କର ରବୀନ ସହ ଦେଖା ହୋଇଥିଲା । କିଛିଦିନ କଥାବାର୍ତ୍ତା ପରେ ଉଭୟ ପରସ୍ପରକୁ ଭଲ ପାଇ ବସିଥିଲେ । ଉଭୟଙ୍କ ମଧ୍ୟରେ ଶାରୀରିକ ସମ୍ପର୍କ ବି ହୋଇଥିଲା । ଯୁବତୀ ରବୀନଙ୍କୁ ବହୁ ମୂଲ୍ୟବାନ ଉପହାର ମଧ୍ୟ ଦେଇଥିଲେ । ପରେ ରବୀନ ବିବାହିତ ଓ ତାଙ୍କୁ ଦୁଇଟି ପିଲା ଥିବା ଯୁବତୀ ଜାଣିବାକୁ ପାଇଥିଲେ । ଏହାପରେ ସେ ରବୀନଙ୍କଠାରୁ ଦୂରେଇବା ଆରମ୍ଭ କରିଥିଲେ ।

ହେଲେ ଧୋକାବାଜ ରବୀନ ପତ୍ନୀଙ୍କୁ ଛାଡ଼ପତ୍ର ଦେଇ ତାଙ୍କ ସହ ବିବାହ କରିବାକୁ ପ୍ରତିଶ୍ରୁତି ଦେଇଥିଲେ । ଏହାସହ ପୁଣି ଶାରୀରିକ ସମ୍ପର୍କ ରଖିବା ଆରମ୍ଭ କରିଥିଲେ । ଯୁବତୀ ଜଣଙ୍କ ଏହାର ବିରୋଧ କରିବାରୁ ଫଟୋ ଭାଇରାଲ କରିଦେବାକୁ ଧମକ ଦେବାକୁ ଲାଗିଥିଲେ । ଏନେଇ ଯୁବତୀ ଜଣଙ୍କ ଥାନାରେ ଅଭିଯୋଗ କରିଥିଲେ ବି ଜଣେ ପୋଲିସ ଅଧିକାରୀ ମାମଲାକୁ ରଫାଦଫା କରିବାକୁ ତାଙ୍କ ଉପରେ ଚାପ ପକାଉଥିବା ଅଭିଯୋଗ କରିଛନ୍ତି ।