ବନ୍ୟା ପରେ ଦାଉ ସାଜିଛି ବର୍ଷା: ଲଗାଣ ବର୍ଷା ଯୋଗୁଁ ବିରି ଫସଲ ନଷ୍ଟ

ଚଣ୍ଡିଖୋଲ: ଗତ ବନ୍ୟାରେ ବେଶ ପ୍ରଭାବିତ ହୋଇଥିଲା ଯାଜପୁର ଜିଲ୍ଲା । ଏକର ଏକର ଚାଷ ଜମିରେ ବନ୍ୟା ପାଣି ପଶି ବ୍ୟାପକ ଧାନ ଫସଲ ନଷ୍ଟ ହୋଇଥିଲା । ଆଉ ଏବେ ଲଘୁଚାପ ଜନିତ ଲଗାଣ ବର୍ଷା ଚାଷୀର ମେରୁଦଣ୍ଡରୁ ଭଙ୍ଗି ଦେଇଛି । ବର୍ଷା ଯୋଗୁଁ ଜିଲ୍ଲାରେ ବ୍ୟାପକ ରବି ଫସଲ ନଷ୍ଟ ହୋଇଥିବା ଦେଖିବାକୁ ମିଳିଛି । ଧାନ ଫସଲର କ୍ଷତି ରବି ଫସଲରେ ଭରଣା ଆଶା ଥିବା ଚାଷୀ ଏବେ ଭାଙ୍ଗି ପଡିଛି ।

ଲଘୁଚାପ ବର୍ଷାରେ ପ୍ରଭାବିତ ରବି ଫସଲ । ଲଗାଣ ବର୍ଷା ଯୋଗୁଁ ବିରି ଫସଲ ନଷ୍ଟ । ପ୍ରଥମେ ବନ୍ୟା ଉଜାଡିଲା ଆଉ ଏବେ ଲଘୁଚାପ ବର୍ଷା ଦାଉ ସାଜୁଛି । ବନ୍ୟା ଯୋଗୁଁ ଯାଜପୁର ଜିଲ୍ଲାରେ ଚାଷ କାମ ବେଶ ପ୍ରଭାବିତ ହୋଇଥିବା ବେଳେ ଲଘୁଚାପ ବର୍ଷା ଧାର୍ମଶାଳା ବ୍ଲକ୍ ପଟୁଣିଆ ପଂଚାୟତରେ ବ୍ୟାପକ କ୍ଷତି ଘଟାଇଛି । ଲଗାଣ ବର୍ଷା ଯୋଗୁଁ ରବି ଫସଲ ସମ୍ପୂର୍ଣ୍ଣ ଉଜୁଡି ଯାଇଥିବା ଅଭିଯୋଗ କରିଛନ୍ତି ଚାଷୀ ।

କେବଳ ଧର୍ମଶାଳା ବ୍ଲକ ନୁହେଁ  ବଡ଼ଚଣା ଓ ବରୀ ବ୍ଲକରେ ମଧ୍ୟ ଲଗାଣ ବର୍ଷା ରବି ଫସଲକୁ ପ୍ରଭାବିତ କରିଛି । ବିରି ଗଛ ସବୁ ପଚି ନଷ୍ଟ ହୋଇଯାଇଥିବା ବେଳେ ଧାର କରଜ କରି ଚାଷ କରିଥିବା ଚାଷୀ ଏବେ ଚିନ୍ତାରେ ରହିଛନ୍ତି । ଆବଶ୍ୟକ ବିହନ ଓ ସରକାରୀ ସହାୟତା ପାଇଁ ଦାବି କରିଛନ୍ତି ଚାଷୀ । ଅନ୍ୟପକ୍ଷେ ଖୁବ ଶୀଘ୍ର ପଦକ୍ଷେପ ନିଆଯାଇ ଅବଶ୍ୟକ ସହାୟତା ଯୋଗାଇ ଦିଆଯିବ ବୋଲି କହିଛନ୍ତି ଯାଜପୁର ଜିଲ୍ଲା କୃଷି ଅଧିକାରୀ  । ଚାଷୀଙ୍କର ଏଭଳି ସ୍ଥିତିରେ କୃଷି ବିଭାଗ ଶୀଘ୍ର ସମସ୍ୟା ଦିଗରେ ପଦକ୍ଷେପ ନେଲେ ଚାଷୀ କୁଳ ଉପକୃତ ହେବେ ।