ପାହାଡ଼ ଚଢ଼ି ଦୁର୍ଗମ ଗାଁରେ ସ୍ବାସ୍ଥ୍ୟସେବା ଯୋଗାଇଲେ ଡାକ୍ତର ଓ ସ୍ବାସ୍ଥ୍ୟ କର୍ମୀ
ମାଥିଲି: ମାଲକାନଗିରି ଜିଲ୍ଲା ମାଥିଲି ବ୍ଲକ କଟୁଆପଦର ଗାଁରେ ପହଞ୍ଚିଲା ଡାକ୍ତରୀ ଦଳ । ମାଥିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରର ସ୍ଵାସ୍ଥ୍ୟ କର୍ମୀ ଓ ଡାକ୍ତର ଏହି ଦୁର୍ଗମ ଗାଁରେ ପହଞ୍ଚି ସ୍ୱାସ୍ଥ୍ୟ ପରୀକ୍ଷା କରିଛନ୍ତି । ମାଥିଲି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଡାକ୍ତର ଅମୀୟ କୁମାର ସ୍ୱାଇଁ, ସ୍ବାସ୍ଥ୍ୟ କର୍ମୀ ସୁଜିତ୍ ପୂଜାସ୍ଥି, ସଂଗ୍ରାମ କିଶୋରୀ ଦାସ, ମ୍ୟାଲେରିଆ ସୁପର ଭାଇଜର ଅମୁଲ୍ୟ ରତ୍ନ ସଦଙ୍ଗା ମାଥିଲି ବ୍ଲକର ପାହାଡ଼ ଉପରେ ଥିବା ଜଟୁଆପଦର ଗାଁକୁ ୧୨ କିଲୋମିଟର ପାହାଡ଼ିଆ ରାସ୍ତା ଅତିକ୍ରମ କରି ପହଞ୍ଚିଛନ୍ତି ।
ଗାଁରେ ବରିଷ୍ଠ ନାଗରିକ, ଶିଶୁ ଓ ମହିଳାମାନଙ୍କ ରକ୍ତ ପରୀକ୍ଷା ସହ ବ୍ଲଡ୍ ପ୍ରେସର ଚେକଅପ୍, କୋଭିଡ୍ ପରୀକ୍ଷା କରାଯାଇଛି । ରୋଗପ୍ରତିଷେଧକ କ୍ଷମତା ମଧ୍ୟ ପରୀକ୍ଷା କରିଛନ୍ତି ଡାକ୍ତରୀ ଟିମ୍ । ଗର୍ଭବତୀ ମହିଳାଙ୍କ ସ୍ବାସ୍ଥ୍ୟ ପରୀକ୍ଷା ମଧ୍ୟ କରାଯାଇଛି । ଅଙ୍ଗନୱାଡି କର୍ମୀଙ୍କ ସହ ଏହି ୧୨ ଜଣିଆ ସ୍ବାସ୍ଥ୍ୟ ଟିମର କାର୍ଯ୍ୟକୁ ସ୍ଥାନୀୟ ଲୋକ ପ୍ରଶଂସା କରିଛନ୍ତି ।
