ଦେଶରେ ଖୋଲିବ ସ୍କୁଲ! କେନ୍ଦ୍ର ସରକାର ଜାରି କରିପାରନ୍ତି ସ୍ୱତନ୍ତ୍ର ଗାଇଡଲାଇନ

ନୂଆଦିଲ୍ଲୀ: ଦେଶରେ ସ୍କୁଲ ଖୋଲିବା ଲାଗି କେନ୍ଦ୍ର ସରକାର ଜାରି କରିପାରନ୍ତି ଆଡଭାଇଜରି । ସାମାଜିକ ଦୂରତା, ଅନ୍ୟାନ୍ୟ ନିୟମ ଭିତରେ ସ୍କୁଲ ଖୋଲିବା ଲାଗି କେନ୍ଦ୍ର ସରକାର ଯୋଜନା କରିବେ ବୋଲି ସୂଚନା ମିଳିଛି । କୋଭିଡ-୧୯ ଯୋଗୁ ଦେଶରେ ସ୍କୁଲ ଶିକ୍ଷା ଗଭୀର ପ୍ରଭାବିତ ହୋଇଛି । ସ୍କୁଲଗୁଡିକୁ ଖୋଲିବା ଲାଗି ଅଭିଭାବକମାନେ ବି ବିଭିନ୍ନ ରାଜ୍ୟରେ ଦାବି କରିଆସୁଛନ୍ତି । ଏସବୁକୁ ଦୃଷ୍ଟିରେ ରଖି କୋଭିଡ ଗାଇଡଲାଇନ ଭିତରେ ସ୍କୁଲ ଖୋଲିବା ଲାଗି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ ଗାଇଡଲାଇନ ଜାରି କରିବାର ସମ୍ଭାବନା ଦେଖାଦେଇଛି ।

ବର୍ତ୍ତମାନ କିଛି ରାଜ୍ୟରେ ଦଶମରୁ ଦ୍ୱାଦଶ ଶ୍ରେଣୀ ସ୍କୁଲ ଖୋଲିବା ଲାଗି କେତେକ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳ ଘୋଷଣା କରିସାରିଛନ୍ତି । ଏହି ନିଷ୍ପତ୍ତି ଫଳରେ ଅତିକମରେ ଗୋଟିଏ କୋଭିଡ ଟିକା ନେଇଥିବା ୧୫ରୁ ୧୮ ବର୍ଷ ବୟସର ଛାତ୍ରଛାତ୍ରୀମାନେ ଅଫଲାଇନ କ୍ଲାସରେ ଯୋଗ ଦେଇପାରିବେ । ସମସ୍ତ କର୍ମଚାରୀ ଓ ୧୮ ବର୍ଷରୁ ଅଧିକ ବୟସର ଛାତ୍ରଛାତ୍ରୀ କୋଭିଡର ଉଭୟ ଡୋଜ ନେଇଥିବା ଜରୁରୀ ବୋଲି କୁହାଯାଇଛି । କୋଭିଡରେ ସବୁଠାରୁ ଅଧିକ କ୍ଷତିଗ୍ରସ୍ତ ମହାରାଷ୍ଟ୍ରରେ ସମସ୍ତ ଶ୍ରେଣୀର ସ୍କୁଲ ଖୋଲା ଯାଇଥିବାବେଳେ ହରିଆଣା ଓ ଚଣ୍ଡିଗଡରେ ଦଶମରୁ ଦ୍ୱାଦଶ ଶ୍ରେଣୀ ଯାଏ ସ୍କୁଲ ଖୋଲିବା ଲାଗି ଘୋଷଣା କରାଯାଇଛି । ଦିଲ୍ଲୀର ଲେଫଟନାଣ୍ଟ ଗଭର୍ଣ୍ଣର ମଧ୍ୟ ହରିଆଣା ସରକାରଙ୍କ ପରି ପଦକ୍ଷେପ ନେଇଛନ୍ତି ।