ପୁଣି ହାଥରସରେ ହରର୍: ଝିଅକୁ ନ୍ୟାୟ ଦେବା ପାଇଁ ସଂଘର୍ଷ କରୁଥିବା ବାପାକୁ ହତ୍ୟା

ହାଥରସ: ଉତ୍ତର ପ୍ରଦେଶର ହାଥରସରେ ଥମୁନି ଅପରାଧ । ନିଜ ଝିଅକୁ ନ୍ୟାୟ ଦେବା ପାଇଁ ସଂଘର୍ଷ କରୁଥିବା ଜଣେ ବାପାକୁ ଦିନ ଦ୍ୱିପ୍ରହରରେ ଗୁଳି କରି ହତ୍ୟା କରିଛନ୍ତି ଅଭିଯୁକ୍ତ । ଦୁଇ ବର୍ଷର ଏକ ପୁରୁଣା ମାମଲାରେ ଅପରାଧୀ ବାପାର ମୁଣ୍ଡ ଗଡ଼ାଇ ଦେଇଛି । ବାପାଙ୍କୁ ନ୍ୟାୟ ଦେବା ପାଇଁ ଝିଅ କାନ୍ଦି କାନ୍ଦି ମିନତି କରୁଥିବାବେଳେ ପ୍ରଚାର ରାଜନୀତିରେ ମାତିଛନ୍ତି ରାଜ୍ୟ ମୁଖିଆ ଯୋଗୀ ଆଦିତ୍ୟନାଥ ।

ପୁଣି ହାଥରସରେ ହରର୍ । ଜଣେ ଝିଅର ବାପାକୁ ବିଲରେ ଗୁଳି କରି ମର୍ଡର । ଆଇନକାନୁନକୁ ଖୁନୀଙ୍କ ଖୋଲା ଚ୍ୟାଲେଞ୍ଜ । ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ପ୍ରଚାର ରାଜନୀତିରେ ମାତିଥିବାବେଳେ ରାମ ରାଜ୍ୟରେ ଘଟିଚାଲିଛି ଗୋଟେ ପରେ ଗୋଟେ ଛାତିଥରା ଅପରାଧ। କଥା କଥାକେ ଗର୍ଜୁଛି ବନ୍ଧୁକ । ନିଜ ଝିଅକୁ ନ୍ୟାୟ ଦେବା ପାଇଁ ସଂଘର୍ଷ କରୁଥିବା ଜଣେ ବାପାକୁ ଦିନ ଦ୍ୱିପ୍ରହରରେ ବିଲରେ ଗୁଳି କରି ହତ୍ୟା କରିଛନ୍ତି ଦୁର୍ବୃତ୍ତ।

ଏଭଳି ଭୟଙ୍କର ଘଟଣା ଘଟିଛି ଉତ୍ତର ପ୍ରଦେଶ ହାଥରସର ନିଜରପୁର ଗାଁରେ । ଏହା ଗାଁର ଅମ୍ରିଶ ଶର୍ମାଙ୍କୁ ଗୁଳି କରି ହତ୍ୟା କରାଯାଇଛି। ଏକ ପୁରୁଣା ମାମଲାକୁ ନେଇ ପ୍ରତିଶୋଧ ପରାୟଣ ହୋଇ ଏଭଳି କାଣ୍ଡ ଭିଆଇଛନ୍ତି ଅଭିଯୁକ୍ତ ଗୌରବ ଶର୍ମା ଓ ତାର ସହଯୋଗୀ। ୨୦୧୮ରେ ଅମ୍ରିଶଙ୍କ ଝିଅକୁ ଅସଦାଚରଣ କରିଥିଲା ଗୌରବ। ମାମଲାରେ ଜେଲରେ ୧୫ ଦିନ ସଜ୍ଜା କାଟିବା ପରେ ପୁଣି ବାହାରକୁ ଆସି ଅମ୍ରିଶଙ୍କ ପରିବାର ଲୋକଙ୍କୁ ଡରାଉଥିଲା ଅଭିଯୁକ୍ତ। ଆଉ ସୋମବାର ଅପରାହ୍ନରେ ଅମ୍ରିଶଙ୍କୁ ଆକ୍ରମଣ କରିଥିଲା । ମାମଲାରେ ଦୁଇ ଜଣକୁ ଗିରଫ କରାଯାଇ ଥିବା ବେଳେ ଅନ୍ୟମାନେ ନିଖୋଜ ଅଛନ୍ତି । ଦୋଷୀଙ୍କ ବିରୋଧରେ NSA ଲାଗୁ କରି କଡା କାର୍ଯ୍ୟାନୁଷ୍ଠାନ ନେବା ପାଇଁ ଦାବି କରିଛନ୍ତି ମୃତକଙ୍କ ସମ୍ପର୍କୀୟ। ଅନ୍ୟପଟେ ହାଥରସ୍ ଘଟଣାକୁ ନେଇ ଆରମ୍ଭ ହୋଇଛି ରାଜନୀତି। ଘଟଣାରେ ବିରୋଧୀ ଯୋଗୀ ସରକାରଙ୍କୁ ସମାଲୋଚନା କରୁଛନ୍ତି ।