ହାଥରସ୍ ଗଣଦୁଷ୍କର୍ମ ମାମଲା: ଅଭିଯୁକ୍ତଙ୍କୁ ଜେରା କରିବ CBI, ମେଡିକାଲରେ ବି ପହଞ୍ଚିବ ଟିମ୍
ଉତ୍ତରପ୍ରଦେଶ: ଉତ୍ତରପ୍ରଦେଶ ହାଥରସ୍ ଗଣଦୁଷ୍କର୍ମ ମାମଲାରେ ଅଭିଯୁକ୍ତଙ୍କୁ ପଚରାଉଚରା କରିବ ସିବିଆଇ । ଏଥିପାଇଁ ସୋମବାର ସିବିଆଇର ୧୦ ଜଣିଆ ଟିମ୍ ଆଲିଗଡ଼ରେ ପହଞ୍ଚିଛନ୍ତି । ଏହି ଟିମ୍ ଦୁଇଟି ଭାଗରେ ବିଭକ୍ତ ହୋଇଛି । ଗୋଟିଏ ଟିମ୍ ଜେଏନ୍ ମେଡିକାଲ କଲେଜରେ ଡାକ୍ତରଙ୍କୁ ଭେଟିବାକୁ ଯାଇଥିବା ବେଳେ ଅନ୍ୟ ଏକ ଟିମ୍ ଅଭିଯୁକ୍ତଙ୍କୁ ପଚରାଉଚରା କରିବ ବୋଲି ସୂଚନା ମିଳିଛି ।
ଘଟଣା ଘଟିବା ପରେ ହାଥରସ୍ରେ ପ୍ରାଥମିକ ଚିକିତ୍ସା ପରେ ପୀଡିତାଙ୍କୁ ଆଲିଗଡ଼ ଜେଏନ ମେଡିକାଲକୁ ନିଆଯାଇଥିଲା । ଏଠାରେ ୨୮ ସେପ୍ଟେମ୍ବର ପର୍ଯ୍ୟନ୍ତ ତାଙ୍କ ଚିକିତ୍ସା ଚାଲିଥିଲା । ସେଠାରୁ ଦିଲ୍ଲୀ ନିଆଯାଇଥିଲା ଓ ପରେ ୨୯ ସେପ୍ଟେମ୍ବରରେ ତାଙ୍କର ମୃତ୍ୟୁ ହୋଇଥିଲା । ଏହି ଘଟଣାକୁ ନେଇ ସିବିଆଇ ଗୁରୁତ୍ୱର ସହ ନେଇ ତଦନ୍ତ ଜାରି ରଖିଛି । ଲଗାତାର ଜଣକ ପରେ ଜଣକୁ ପଚରାଉଚରା କରୁଛି ସିବିଆଇ । ହେଲେ ଘଟଣାକୁ ଅନେକ ଦିନ ବିତି ଯାଇଥିବାରୁ ପ୍ରମାଣ ସଂଗ୍ରହ କରିବାକୁ ସିବିଆଇକୁ ସମୟ ଲାଗୁଥିବା କୁହାଯାଉଛି ।
ସେପଟେ ୧୪ ସେପ୍ଟେମ୍ବରରେ ଯେଉଁ ବାଜରା କ୍ଷେତରେ ଏହି ଘଟଣା ଘଟିଥିଲା ସେହି ଜମିର ମାଲିକ ଯୋଗୀ ସରକାରଙ୍କୁ ୫୦ ହଜାର ଟଙ୍କା କ୍ଷତିପୂରଣ ଦାବି କରିଛି । ଘଟଣା ପରଠାରୁ ପୋଲିସ୍ ତାଙ୍କୁ ତାଙ୍କ ଜମିକୁ ଯିବାକୁ ଦେଉନାହିଁ । ଜମି ଚାରିପଟେ ଅବରୋଧ କରାଯାଇଛି । ସେପଟେ ଜମି ମାଲିକ ସୋମ୍ ସିଂହଙ୍କ ଭାଇ ବିକ୍ରମ ଓରଫ ଛୋଟୁକୁ ପୋଲିସ୍ ପ୍ରତ୍ୟକ୍ଷଦର୍ଶୀ ଭାବେ ଦର୍ଶାଇଛି । ତାଙ୍କୁ ସିବିଆଇ ଏବେ ସୁଦ୍ଧା ଦୁଇଥର ଜେରା କରି ସାରିଛି । ଘଟଣା ଦିନ ସେ କ୍ଷେତରେ ଘାସ କାଟୁଥିଲା । ଚିତ୍କାର ଶୁଣିବା ପରେ ଯାଇ ଦେଖିବା ବେଳକୁ ଯୁବତୀ ରକ୍ତାକ୍ତ ଅବସ୍ଥାରେ ପଡିଥିଲେ । ସେଠାରେ ତାଙ୍କ ଭାଇ ଓ ମାଆ ବି ଉପସ୍ଥିତ ଥିବା ସେ ସିବିଆଇକୁ ନିଜ ବୟାନରେ କହିଥିଲେ ।
