କରୋନା ପାଇଁ ମରିଗଲା ଏହି ମାରାତ୍ମକ ରୋଗ, ନେଉଥିଲା ଲୋକଙ୍କ ଜୀବନ
ନୂଆଦିଲ୍ଲୀ: ଦୁନିଆର କେତେକ ବିଶେଷଜ୍ଞ ଚେତାବନୀ ଦେଇଛନ୍ତି କରୋନା ଭାଇରସ୍ ଓ ଫ୍ଲୁ, ଦୁଇ ରୋଗ ଏକା ସାଥିରେ ବଡ଼ ଧରଣର ଆତଙ୍କ ସୃଷ୍ଟି କରିପାରନ୍ତି । ତେବେ ଏବେ ଏକ ଆଶ୍ଚର୍ଯ୍ୟକର ତଥ୍ୟ ସାମନାକୁ ଆସିଛି । ବୈଜ୍ଞାନିକ ଜାଣିବାକୁ ପାଇଛନ୍ତି ଫ୍ଲୁ ରୋଗ ଶେଷ ହେଉଛି । କିଛି ବିଶେଷଜ୍ଞଙ୍କ ଅନୁସନ୍ଧାନରୁ ଏହି ସଂକେତ ମିଳୁଛି । ସମ୍ଭବତଃ କରୋନା ପାଇଁ ଫ୍ଲୁ ମାମଲା ହ୍ରାସ ପାଇଛି ।
ବିଶ୍ୱ ସ୍ୱାସ୍ଥ୍ୟ ସଂଗଠନର ସର୍ଭିଲାନ୍ସ ଡାଟାରୁ ଜଣାପଡ଼ିଛି- ଫ୍ଲୁ ମାମଲାରେ ବହୁତ ହ୍ରାସ ଘଟିଛି । ବିଶ୍ୱ ସ୍ତରରେ ଅନୁମାନ କରାଯାଉଛି- ଫ୍ଲୁ ମାମଲା ଗତବର୍ଷ ତୁଳନାରେ ୯୮ ପ୍ରତିଶତ ଖସିଛି ।
ଅଷ୍ଟ୍ରେଲିଆରେ ଚଳିତବର୍ଷ ଏପ୍ରିଲରେ କେବଳ ୧୪ଟି ଫ୍ଲୁ ମାମଲା ସାମନାକୁ ଆସଛି । ଯେତେବେଳେ କି ଗତ ବର୍ଷ ଏହି ସଂଖ୍ୟା ୩୬୭ ଥିଲା । ଅର୍ଥାତ୍ ଫ୍ଲୁ ମାମଲା ୯୬ ପ୍ରତିଶତ ହ୍ରାସ୍ ଆସିଛି । ଅଷ୍ଟ୍ରେଲିଆରେ ଜୁନରେ ଫ୍ଲୁ ମାମଲା ଅଧିକ ଥାଏ । ଚଳିତବର୍ଷ ଫ୍ଲୁର କୌଣସି ମାମଲା ଆସିନାହିଁ । ବିଶ୍ୱ ସ୍ୱାସ୍ଥ୍ୟ ସଂଗଠନ ଅନୁସାରେ, ଏନଫ୍ଲୁଏଞ୍ଜା ଭାଇରସ୍ ଅର୍ଥାତ୍ ଫ୍ଲୁରେ ପ୍ରତିବର୍ଷ ଦୁନିଆରେ ୫ ଲକ୍ଷରୁ ୬ ଲକ୍ଷ ଯାଏଁ ମୃତ୍ୟୁ ହୁଏ ।
ଲିବରପୁଲ ୟୁନିଭର୍ସିଟିର ଭାଇରସ୍ ଏକ୍ସପର୍ଟ ପ୍ରଫେସର ଜେମ୍ସ ଷ୍ଟିୱାର୍ଟଙ୍କ ଅନୁସାରେ- ଇମ୍ୟୁନ୍ ସିଷ୍ଟମ ପ୍ରଥମ ସଂକ୍ରମଣ ପରେ ସକ୍ରିୟ ହୋଇଯାଏ । ଫଳରେ ଭାଇରସ୍ ମରିଯାଏ । ଏହି ସମୟରେ ଯଦି ଅନ୍ୟ କୌଣସି ଭାଇରସ୍ ଶରୀରକୁ ଆସେ ତ ଇମ୍ୟୁନ୍ ସିଷ୍ଟମ ତାକୁ ବି ମାରିଦିଏ । ଏଥିପାଇଁ ସମ୍ଭବତଃ କରୋନାର ଇମ୍ୟୁନିଟି ପାଇଁ ଫ୍ଲୁ ଭାଇରସ୍ ମରିଯାଇଛି ।
ସେଣ୍ଟ ଜର୍ଜ ୟୁନିଭର୍ସିଟି ଅଫ୍ ଲଣ୍ଡନ୍ ବାୟରୋଲଜିଷ୍ଟ ଏଲିସବେଟ୍ଟା କୁହନ୍ତି- ଭୂତାଣୁ ପରଜୀବୀ ଅଟନ୍ତି । ଏହା ଥରେ କୌଣସି ବ୍ୟକ୍ତି ଶରୀରରେ ପ୍ରବେଶ କଲାପରେ ସେହି ବ୍ୟକ୍ତି ଶରୀରରେ ଅନ୍ୟ କୌଣସି ଭାଇରସ୍ ଆସିଲେ ସେ ତାକୁ ମାରିଦିଏ ।
ଚିଲିରେ ଚଳିତବର୍ଷ ଏପ୍ରିଲରୁ ଅକ୍ଟୋବର ମଧ୍ୟ ଫ୍ଲୁର ମାତ୍ର ୧୨ଟି କେସ୍ ସାମନାକୁ ଆସିଛି । ଯେତେବେଳେ କି ଗତବର୍ଷ ଏହି ସମୟରେ ଫ୍ଲୁର ୭ ହଜାର ମାମଲା ଆସିଥିଲା । ସେହିଭଳି ଦକ୍ଷିଣ ଆଫ୍ରିକାରେ ମଧ୍ୟ ଫ୍ଲୁ ମାମଲା ପ୍ରାୟ ୯୯ ପ୍ରତିଶତ ଯାଏଁ ଖସିଆସିଛି ।
ଅନ୍ୟପଟେ ବ୍ରିଟେନରେ ମାର୍ଚ୍ଚରୁ ଏବେ ଯାଏଁ ୭୬୭ଟି ଫ୍ଲୁ ମାମଲା ଚିହ୍ନଟ ହୋଇଛି । ଯେତେବେଳେ କି ଗତବର୍ଷ ମାର୍ଚ୍ଚରୁ ଅକ୍ଟୋବର ମଧ୍ୟରେ ପାଖାପାଖି ୭ ହଜାର ଫ୍ଲୁ ମାମଲା ଚିହ୍ନଟ ହୋଇଥିଲା । କିଛି ବିଶେଷଜ୍ଞଙ୍କ କହିବା ଅନୁସାରେ ଫ୍ଲୁ ମାମଲା ହ୍ରାସ ନେଇ ସ୍ପଷ୍ଟ କହିବା ଲାଗି ଆହୁରି ଅଧ୍ୟୟନ ଆବଶ୍ୟକ ।
