କିଏ ଏହି କଳା ଛାତ୍ର ଅଲ୍ଟର, ଯିଏ ମେଡିସିନ ପାଇଁ ପାଇଲେ ନୋବେଲ !

ନୂଆଦିଲ୍ଲୀ: ଚଳିତ ବର୍ଷ ଚିକିତ୍ସା କ୍ଷେତ୍ରରେ ନୋବେଲ ପୁରସ୍କାରର ଘୋଷଣା ହୋଇସାରିଛି । ଏହି ପୁରସ୍କାର ହାର୍ଭେ ଏ ଆଲ୍ଟର, ମାଇକଲ ହ୍ୟୁଟନ ଏବଂ ଚାର୍ଲସ ଏମ ରାଇସଙ୍କୁ ହେପାଟାଇଟିସ ସି’ର ଆବିଷ୍କାର ପାଇଁ ଦିଆଯାଇଛି । ଏହି ତିନି ଜଣ ବୈଜ୍ଞାନିକଙ୍କ ମଧ୍ୟରେ ହାର୍ଭେ ଜେ ଅଲଟରଙ୍କ ଅନୁସନ୍ଧାନରେ ଖୁବ ଗୁରୁତ୍ୱପୂର୍ଣ୍ଣ ଭୂମିକା ରହିଥିଲା । ଏହି ଆମେରିକୀୟ ବୈଜ୍ଞାନିକ ଜଣଙ୍କ ସିପାଞ୍ଜୀ ମାଧ୍ୟମରେ ଜାଣିବାକୁ ପାଇଥିଲେ ଯେ, ହେପାଟାଇଟିସ ଏ’ ଏବଂ ହେପାଟାଇଟିସ ବି’ ବ୍ୟତୀତ ହେପାଟାଇଟିସ ସି’ ମଧ୍ୟ ରହିଛି ଯାହା ଅତ୍ୟନ୍ତ କ୍ଷତିକାରକ ସାବ୍ୟସ୍ତ ହୋଇପାରେ ।

କିଏ ଏହି ବୈଜ୍ଞାନିକ

୮୫ ବର୍ଷିୟ ଅଲ୍ଟରଙ୍କ ଜନ୍ମ ନ୍ୟୁୟର୍କରେ ଏକ ୟହୁଦୀ ପରିବାରରେ ହୋଇଥିଲା । ତାଙ୍କ କ୍ୟାରିୟର ଖୁବ ରୋମାଞ୍ଚକ ଦିଗରେ ଗତି କରିଥିଲା । ପ୍ରଥମେ ଅଲ୍ଟରଙ୍କର କଳା ପ୍ରତି ଖୁବ ରୁଚି ଥିଲା ଏବଂ ସେ ନ୍ୟୁୟର୍କରୁ ହିଁ କଳାରେ ଡିଗ୍ରୀ ହାସଲ କରିଥିଲେ । ଏହାପରେ ସେ କଳା ଛଡ଼ି ମେଡିକାଲ ପଢ଼ାରେ ମନ ବଳାଇ ଥିଲେ । କଳାରେ ଏତେ ପ୍ରତିଭା ଥାଇ ମଧ୍ୟ ସେ କାହିଁକି ଚିକିତ୍ସାରେ ଆଗ୍ରହ ପ୍ରକାଶ କଲେ ଏହାର ଉତ୍ତର ଖୋଦ ଅଲ୍ଟର ମଧ୍ୟ ଜାଣିନାହାନ୍ତି ।

ତେବେ କଳାରୁ ଚିକିତ୍ସାକୁ ଆସିଥିବା ଅଲ୍ଟର ଏଥିରେ ମଧ୍ୟ ନିଜ ପ୍ରତିଭାକୁ ପ୍ରମାଣ କରି ଦେଖାଇଥିଲେ । ଏହା ପରେ ସେ ଆଉ ପଛକୁ ଅନାଇନଥିଲେ । ମେରୀଲ୍ୟାଣ୍ଡର ନ୍ୟାସନାଲ ଇନ୍‌ଷ୍ଟିଚ୍ୟୁଟ୍‌ ଅଫ୍ ହେଲ୍ଥରେ ସବୁଠୁ ଶୀର୍ଷ ସ୍ଥାନରେ ରହି କାମ କଲେ । ଜଣେ ରିସର୍ଜ ଫେଲୋ ହିସାବରେ ଅଲ୍ଟର ଆରମ୍ଭରୁ ହିଁ ଅନୁସନ୍ଧାନରେ ଲିପ୍ତ ରହୁଥିଲେ । ୧୯୬୪ରେ ସେ ଆମେରିକା ବୈଜ୍ଞାନିକ ଏବଂ ଜେନେଟିକ ବିଶେଷଜ୍ଞ ବରୁଚ ସାମୁଏଲ ବ୍ଲୁମବର୍ଗଙ୍କ ସହିତ ମିଶି ଏକ ଆଣ୍ଟିଜେନ ଆବିଷ୍କାର କରିଥିଲେ । ସୂଚନା ଅନୁଯାୟୀ ଯେଉଁ ବୈଜ୍ଞାନିକଙ୍କ ସହ ମିଶି ଆଲ୍ଟର ଆଣ୍ଟିଜେନ ଆବିଷ୍କାର କରିଥିଲେ, ସେ ମଧ୍ୟ ମେଡିସିନ୍ ପାଇଁ ନୋବେଲ ପୁରସ୍କାର ପାଇସାରିଛନ୍ତି ।

ବରୁଚଙ୍କ ସହ ମିଶି କରାଯାଇଥିବା ଅନୁସନ୍ଧାନ ହେପାଟାଇଟିସ ବି ଭାଇରସକୁ ଅଲଗା କରିବାରେ ଅନେକ ସାହାଯ୍ୟ କରିଥିଲା । ଏହାପରଠାରୁ ଆମେରିକାରେ ରକ୍ତଦାନ ସମୟରେ ରକ୍ତଦାତାଙ୍କର ରକ୍ତ ପରୀକ୍ଷା ହେବା ଆରମ୍ଭ ହୋଇଥିଲା, ଯାହା କାରଣରୁ ୭୦ ଦଶକରେ ରକ୍ତଦାନ କାରଣରୁ ହେଉଥିବା ହେପାଟାଇଟିସ ମାମଲାର ସଂଖ୍ୟା ୩୦ ପ୍ରତିଶତରୁ ହ୍ରାସ ପାଇଁ ଶୂନ ହୋଇଯାଇଥିଲା ।

୭୦ ଦଶକରେ ଅଲ୍ଟର ଏବଂ ତାଙ୍କ ଟିମ ସଂପୂର୍ଣ୍ଣ ଭାବରେ ହେପାଟାଇଟିସ ସମ୍ବନ୍ଧିତ ସମସ୍ତ ପ୍ରକାର ଅନୁସନ୍ଧାନ କରିବା ଆରମ୍ଭ କରିଦେଲେ । ସେ ଜାଣିବାକୁ ପାଇଲେ ଯେ, ହେପାଟାଇଟିସର ସଂକ୍ରମଣ କେବଳ ଏ’ ବା ବି’ରୁ ହେଉନାହିଁ, ବରଂ ଏହାର ଅନ୍ୟ ପ୍ରକାର ମଧ୍ୟ ରହିଛି ଯାହା ସଂକ୍ରମଣ ହୋଇପାରେ । ସିପାଞ୍ଜୀ ଉପରେ ସେ ଏହି ପ୍ରୟୋଗ କଲେ ଏବଂ ନୂତନ ଟାଇପକୁ NANBH ( Non A, Non B Hepatitis) ନାମ ଦେଲେ । ୧୯୮୯ ମସିହାରେ ଏହି NANBH ଭାଇରସକୁ ନୂଆ ନାମ ଦିଆଗଲା- ହେପାଟାଇଟିସ ସି’ ଭାଇରସ । ଏହି ଆବିଷ୍କାର ବୈଜ୍ଞାନିକ ଜର୍ନଲ ସାଇନ୍ସରେ ପବଲିସ ହୋଇଥିଲା । ଯାହାପରେ ଚିକିତ୍ସା ଜଗତରେ ଏକ ପ୍ରକାର ଚହଳ ସୃଷ୍ଟି ହୋଇଥିଲା । ଏହି ଆବିଷ୍କାର ପାଇଁ ଅଲ୍ଟରଙ୍କୁ ଲଗାତାର ଭାବେ ଅନେକ ସମ୍ମାନରେ ସମ୍ମାନିତ କରାଯାଇଛି ।