ଅଷ୍ଟ୍ରେଲିଆକୁ ମିଳିଲା ନୂଆ ଡେଭିଡ ୱାର୍ନର, ଆଇସିସି ସେୟାର କଲା ମଜାଦାର ଭିଡିଓ

ନନ୍ଦିଘୋଷ ବ୍ୟୁରୋ: କିଛି ଦିନ ତଳେ ଅଷ୍ଟ୍ରେଲିଆର କିମ୍ବଦନ୍ତୀ ବ୍ୟାଟର ଡେଭିଡ ଓ୍ବାର୍ନର ଆନ୍ତର୍ଜାତୀୟ କ୍ରିକେଟରୁ ଅବସର ନେଇଛନ୍ତି । ଡେଭିଡ ଓ୍ବାର୍ନରଙ୍କ ଆନ୍ତର୍ଜାତୀୟ କ୍ୟାରିୟର ଉଜ୍ଜଳ ଥିଲା । ତିନୋଟିଯାକ ଫର୍ମାଟରେ ସେ ଭଲ ବ୍ୟାଟିଂ କରିଛନ୍ତି । ବର୍ତ୍ତମାନ ପ୍ରଶ୍ନ ଉଠୁଛି ଡେଭିଡ ଓ୍ବାର୍ନରଙ୍କ ସ୍ଥାନ ନେବ କିଏ ? ଏମିତି କିଛି ପ୍ରଶ୍ନର ଉତ୍ତର ଦେଇଛି ଆଇସିସି ।

ଆଇସିସି ନିଜ ଅଫିସିଆଲ ସୋସିଆଲ ମିଡିଆ ପ୍ୟାଜରେ ଏକ ଭିଡିଓ ପୋଷ୍ଟ କରିଛି । ଭିଡିଓରେ ଡେଭିଡ ଓ୍ବାର୍ନରଙ୍କ ସହ ହ୍ୟାରୀ ଡିକ୍ସନଙ୍କୁ ଦେଖିବାକୁ ମିଳିଛି । ହ୍ୟାରି ଡିକ୍ସନଙ୍କ ଅନେକ ସଟ ଅଛି ଯାହା ସେ ଠିକ୍‌ ଡେଭିଡ ୱାର୍ନରଙ୍କ ଭଳି ଖେଳନ୍ତି ଯାହା ସୋସିଆଲ ମିଡିଆରେ ଭାଇରାଲ ହେଉଥିବା ଭିଡିଓରେ ଦେଖିବାକୁ ମିଳିଛି । ବର୍ତ୍ତମାନ ଏହି ଭିଡିଓ ସୋସିଆଲ ମିଡିଆରେ ବେଶ୍ ଭାଇରାଲ ହେଉଛି। ଏଥି ସହିତ, ସୋସିଆଲ ମିଡିଆ ୟୁଜର୍ସ ହ୍ୟାରି ଡିକ୍ସନ ଉପରେ ନିଜର ମତାମତ ଦେଉଛନ୍ତି ।

ହ୍ୟାରିଙ୍କ ବିଷୟରେ କହିବାକୁ ଗଲେ ଅଷ୍ଟ୍ରେଲିଆ ୧୯ ବର୍ଷରୁ କମ୍‌ ଦଳ ବ୍ୟତୀତ ଏହି ଖେଳାଳି ବିଗ ବ୍ୟାସ ଲିଗ୍‌ରେ ମେଲବର୍ନ ପାଇଁ ଖେଳିଛନ୍ତି। ଏହି ଯୁବ ବ୍ୟାଟର ତାଙ୍କ ଦକ୍ଷତା ସହିତ ବହୁତ ପ୍ରଭାବିତ କରିଛନ୍ତି । ତେବେ, ହ୍ୟାରି ଡିକ୍ସନ ଡେଭିଡ ୱାର୍ନରଙ୍କ ପରି ଅଷ୍ଟ୍ରେଲିଆ ପାଇଁ ମ୍ୟାଚ ବିଜେତା ବୋଲି ପ୍ରମାଣ କରିବେ କି ନାହିଁ ତାହା ଦେଖିବାକୁ କୌତୁହଳପ୍ରଦ ହେବ? ଅନ୍ୟପଟେ ନିକଟରେ ଡେଭିଡ ୱାର୍ନର ଅନ୍ତର୍ଜାତୀୟ କ୍ୟାରିୟରରୁ ଅବସର ଘୋଷଣା କରିଛନ୍ତି। ସେ ତାଙ୍କ କ୍ୟାରିୟରରେ ୧୧୨ଟି ଯେଷ୍ଟ ମ୍ୟାଚ୍, ୧୬୧ଟି ଦିନିକିଆ ଓ ୯୯ଟି ଟି-୨୦ ମ୍ୟାଚ୍ ଖେଳିଛନ୍ତି । ଏହା ସହ ସେ ୧୭୬ଟି ଆଇପିଏଲ ମ୍ୟାଚ୍ ଖେଳିଛନ୍ତି ।