କରୋନା ପାଇଁ ସତର୍କତା: ଏଣିକି ଘରେ ରହି କାମ କରିବେ ଅଧା କର୍ମଚାରୀ

ଏଣିକି ଘରେ ରହି କାମ କରିବେ କେନ୍ଦ୍ର ସରକାରଙ୍କ କର୍ମଚାରୀ । କରେନା ସଂକ୍ରମଣକୁ ରୋକିବା ଲାଗି ପୂର୍ବରୁ କଛି ଘରୋଇ କମ୍ପାନୀ ପକ୍ଷରୁ ଓ୍ୱାର୍କ ଫର୍ମ ହୋମ୍ ବ୍ୟବସ୍ଥା ଆରମ୍ଭ କରାଯାଇଥିବା ବେଳେ ଏବେ କେନ୍ଦ୍ର ସରକାର ଲାଗୁ କରିଛନ୍ତି ଏହି ବ୍ୟବସ୍ଥା ।  ଗ୍ରୁପ୍ ବି ଓ ଗ୍ରୁପ ସି ବିଭାଗର ମୋଟ କର୍ମଚାରୀଙ୍କ ମଧ୍ୟରୁ ଅନୁନ୍ୟ ୫୦% କର୍ମଚାରୀ ଘରେ ରହି କାମ କରିବେ ।

ପ୍ରଥମ ସପ୍ତାହରେ ଘରେ ରହି କାମ କରିଥିବା କର୍ମଚାରୀ ଦ୍ୱିତୀୟ ସପ୍ତାହରେ ଅଫିସ୍‌ ଆସି କାମ କରିବେ । ଅପରପକ୍ଷରେ ଅଫିସରେ କାମ କରିଥିବା କର୍ମଚାରୀ ଦ୍ୱିତୀୟ ସପ୍ତାହରେ ଘରେ ରହି କାମ କରିବେ । ତେବେ ଅଫିସ୍‌ ନିକଟରେ ରହୁଥିବା କର୍ମଚାରୀ ଯେଉଁମାନେ ନିଜସ୍ୱ ସାଧନରେ ଘରୁ ଆସୁଥିବେ ସେମାନଙ୍କୁ ପ୍ରଥମ ସପ୍ତାହର ପାଇଁ ପ୍ରସ୍ତୁତ କରାଯାଇଥିବା ସିଫ୍ଟରେ ଅନ୍ତର୍ଭୁକ୍ତ କରିବେ । ସମସ୍ତ ବିଭାଗର ଅଧିକାରୀ ଏହା ସୁନିଶ୍ଚିତ କରିବେ । ସକାଳରୁ ୯ଟାରୁ ସନ୍ଧ୍ୟା ସାଢ଼େ ୫, ସକାଳ ସାଢ଼େ ୯ଟାରୁ ସନ୍ଧ୍ୟା ୬ଟା ଏବଂ ସକାଳ ୧୦ଟାରୁ ସାଢ଼େ ୬  । ଏହି ୩ଟି ସମୟ ସାରଣୀ ଅନୁଯାୟୀ ସିଫ୍ଟ କରାଯିବାକୁ ନିର୍ଦ୍ଦେଶ ଦିଆଯାଇଛି ।

ଘର କାମ କରିବା ଦିନ କର୍ମଚାରୀମାନେ ଫୋନ କିମ୍ୱା ଅନ୍ୟ କୌଣସି ଇଲୋକଟ୍ରନିକ୍ସ ମାଧ୍ୟମରେ ଯୋଗାଯୋଗରେ ରହିବେ । ଯଦି କୌଣସି ଜରୁରୀ କାମରେ ଅଫିସ ଆସିବାକୁ କୁହାଯାଏ ତାହା ହେଲେ ସେମାନେ ଅଫିସ ଆସିବେ । ଆସନ୍ତା ଏପ୍ରିଲ ୪ ତାରିଖ ଯାଏଁ ଏହି ନିୟମ ଲାଗୁ ରହିବ ।

ଜରୁରୀକାଳୀନ ସେବାରେ କାର୍ଯ୍ୟରତ କର୍ମଚାରୀଙ୍କ ପାଇଁ ଏହି ନିର୍ଦ୍ଦେଶ ଲାଗୁ ହେବନାହିଁ ।

ଏ ନେଇ ଭାରତ ସରକାରଙ୍କ ଅତିରିକ୍ତ ସଚିବ ସୁଜାତା ଚର୍ତ୍ତୁବେଦୀ କେନ୍ଦ୍ର ସରକାରଙ୍କ ସମସ୍ତ ମନ୍ତ୍ରାଳୟ ବିଭାଗକୁ ଚିଠି ଲେଖି ଜଣାଇଛନ୍ତି ।