ସରିଲା କାର୍ତ୍ତିକ ମାସ; ପୁରୀ ବୃନ୍ଦାବତୀ ନିବାସରୁ ଘରକୁ ଫେରୁଛନ୍ତି ହବିଷ୍ୟାଳି
ପୁରୀ: ସରିଲା କାର୍ତ୍ତିକ ମାସ। ପୁରୀ ବୃନ୍ଦାବତୀ ନିବାସରୁ ଘରକୁ ଫେରିଛନ୍ତି ହବିଷ୍ୟାଳି। ଗତକାଲି କିଛି ହବିଷ୍ୟାଳୀ ପୁରୀ ଛାଡ଼ିଥିବାବେଳେ ଅନ୍ୟମାନେ ଆଜି ଘରକୁ ଫେରିଛନ୍ତି । ଏହି ସମୟରେ ସମସ୍ତେ ଭାବବିହ୍ବଳ ହୋଇପଡ଼ିଥିଲେ। କାହା ଆଖିରେ ଲୁହ ଥିଲା ତ ଆଉ କାହା ମନରେ କୋହ। ମାସେ ଧରି ପରସ୍ପର ସହ ନିବିଡ ହୋଇଥିବା ସମ୍ପର୍କକୁ ମନରେ ଧରି ଘରକୁ ଫେରୁଥିଲେ ହବଷ୍ୟାଳି।
ଏକମାସ ଧରି ରାଜ୍ୟ ସରକାରଙ୍କ ଯୋଜନାରେ ଶ୍ରୀକ୍ଷେତ୍ରରେ ରହି କାର୍ତ୍ତିକ ବ୍ରତ ପାଳୁଥିଲେ ହବିଷ୍ୟାଳି। ବୃନ୍ଦାବତୀ ନିବାସ ସହ ଅକ୍ଷୟ ପାତ୍ର ଫାଉଣ୍ଡେସନ, ବଗଲା ଧର୍ମଶାଳା, ମୁନିସିପାଲିଟି କଲ୍ୟାଣ ମଣ୍ଡପ ଓ ବାଗେଡିଆ ଧର୍ମଶାଳାରେ ସମଗ୍ର ରାଜ୍ୟର ୩ ହଜାରରୁ ଉର୍ଦ୍ଧ୍ବ ହବିଷ୍ୟାଳି ରହି ଏକମାସ ହେଲା ବ୍ରତ ପାଳନ କରୁଥିଲେ।
ଦୀର୍ଘ ଏକ ମାସ ଧରି ପ୍ରଶାସନ ପକ୍ଷରୁ ମାଆ ମାନଙ୍କ ରହିବା, ମହାପ୍ରସାଦ ସେବନ, ଶ୍ରୀଜିଉ ଦର୍ଶନ, ପ୍ରବଚନ ଓ ଆଧ୍ୟାତ୍ମିକ ଆଲୋଚନା ଆଦି ବ୍ୟବସ୍ଥା କରାଯାଇଥିଲା। ମହାପ୍ରଭୁଙ୍କ କରୁଣା ଓ ଆଶୀର୍ବାଦ ରହିଲେ ବଞ୍ଚିଥିଲେ ପୁଣି ଆସନ୍ତାବର୍ଷ କାର୍ତ୍ତିକରେ ଦେଖାହେବ ବୋଲି କୋହଭରା କଣ୍ଠରେ କହିଛନ୍ତି ହବିଷ୍ୟାଳୀ।
